Irratia urrutian entzuten da orain.

TXARO: Aizue, ideia bat.

TXETE: Beste bat?

TXARO: Ea zer iruditzen zaizuen...

TXUSMA: Ez duk azkenekoa izango!

TXARO: E... gustura al zaudete lan honekin?

TXETE: Joe, gustura... Zer egin behar dugu bestela?

TXARO: Neuk kulpak hiri galdetzeagatik!

TXETE: Egia dun eta! Besterik ba al zeukanagu, ba?

TXARO: Horregatik, ba!

TXUSMA: Ni, bai, ni gustura ari ninduan atzoko hori arte.

TXARO: Eta... lana zertxobait aldatuko bagenu?

TXETE: Hori dun arrazoia! Oraintxe juxtu-juxtu, paper guztia ikasita daukagunean!

TXUSMA: Hi, aizan; hik jakingo dun zer pentsatu dunan, baina, edozein moduz ere, oraintxe bertan esan beharko dun. Ez gaitun hemen, beti bezala, atzera eta aurrera ibiliko!

TXARO: Horregatik egin dizuet galdera!

TXETE: Ba, nire bototik, ez. Nik ez dinat orain ezer aldatzerik hasi nahi.

TXARO: Beno, nik zer pentsatu dudan kontatuko dizuet, eta gero hitz egingo diagu, bale?

TXETE: Hitz egin eta hitz egin! Besterik ez zekinagu egiten!

TXUSMA: Isilik egotea adinakoa baduk!

TXARO: Beno, ez zaitezte orain elkarrekin sesioan hasi!

Kotxe barruan, motorra arrankatu nahian.

MAITE: Zer? Gaur ere gasolina auzoan?

AITA: Ez, ba! Depositua bete-bete eginda dago. Begira! Baina ez du arrankatu nahi.

MAITE: Ba, gaur presaka naiz, ba!

AITA: Ez dakit zergatik uzten dizudan nahi duzuna egiten!

MAITE: A, ez? Nik esango dizut: zerorrek ere hankasartze galanta egin duzulako.

AITA: Ez dakit, ba... Oraindik ere... Zergatik ez zidan zure amak dena ondo esplikatu, gauzak horrela izanda?

MAITE: Lehenengoz, amak ezer esplikatzen ez dakielako; eta, hori gutxi ez dela, bigarren, zuk ere ezer entzuten ez dakizulako.

AITA: Ezetz? Zertan ari naiz, ba, oraintxe ere, zuri entzuten ez eta?

MAITE: Niri izanenean, amari ez, behintzat! Harekin ez dakit zer gertatzen zaizun.

AITA: A, niri? Hari ez zaio ezer gertatzen?

MAITE: Baita hari ere, bioi!

AITA: Antzerki-lan bat! Sinistea ere!

MAITE: Ez duzula oraindik sinisten?

AITA: Kontu aldrebesagorik oraindik!

MAITE: Aldrebesa zeu zara zu! Ea, zer pintatuko zukeen Txarok han erdian, ama bi maitalerekin egon izan balitz? Horixe pentsatzeko adina ere ez al zara? Horixe ikusteko ere gauza ez?

AITA: Baina... bera ere jakinaren gainean egon, eta nahita egiten ari zela ematen zuen, ordea!

MAITE: Ai! Amak ala zuk, nork ikusten ote ditu telenobela gehiago!

AITA: Zure amak, dudarik gabe.

MAITE: Ez zen galdera bat... Eta, saia zaitez berriro, ea arrankatzen duen.