MAITE: Ba, gauza garbirik ez nizuke esango, baina, dirudienez, kartak eta guzti idazten dizkion maiteminduren bat badarabil amak bere atzetik. Eta auskalo noiztik, gainera! Kontua da delako amorante horrek lehengo etxe zaharrera idazten kartak, eta, klaro... aitak denak irakurri! Amaren izenean zetozen kartak aitak irakurri, lehengo etxe zaharreko zuzenbidea zeukatelako! Haietxek entregatzea etorri zaio gaur.

AMONA: Eta nor ote da, ba, karta-idazle hori?

MAITE: A! Hori berak ere ez omen daki!

AMONA: Ene, ba! Eta zer egiteko asmoa du, orduan?

MAITE: Horixe ez, ba, nik jakin! Entzun diozu, lehendabizi behintzat gauzak ondo pentsatu...

AMONA: Jesus! Behin-behingoa, a zer bingoa...