Jon.- Jone! Aspirinarik ez da geratzen...

Jone.- Eta?

Jon.- Ba hori, ez direla geratzen.

Jone.- Ba, badakizu, erosi.

Jon.- Baina zer pasatzen zaizu? Nirekin haserre al zaude?

Jone.- Zurekin haserre? Badaukat zurekin haserre egoteko arrazoirik, ala?

Jon.-  Baina, Jone, ezkontza bat zen... Normala da ezkontza batean apur bat mozkortzea, ezta?

Jone.- Apur bat? Mahai gainean sirtakia dantza egitea ere normala da, ezta?

Jon.- Mahai gainean dantzatu nuen?

Jone.- Bai, mahai gainean dantzatu, orkestrara igo eta bongoa jo, begiratu zoologikotik ihes egindako tximino baten moduan ibili zinen atzo.

Jon.- Benetan mahai gainean dantzatu nuela?

Jone.- Ehun eta berrogeita hamar pertsonen aurrean.

Jon.- Eta zure anaiak ere nirekin egin zuen dantza.

Jon.- Jone, Alcasersik ba al daukazu?

Jone.- Ba ez, eta gainera horrek ez dizu kenduko biharamuna, e?

Jon.- Ba atzokoaren ostean zure aitak pare bat matoi siziliar kontratatuko ditu ni akabatzeko.

Jone.- Bai, hark ere nahiko zepelin harrapatu zuen.

Jon.- Zure aitak? Zure aitak bai?

Jone.- Galdeiozu (galde iezaiozu) amari, uste dut etxera bueltatzeko taxia hartu zutenean kristoren bronka eduki zutela.

Jon.- Pena bat da ezertaz ez akordatzea.

Jone.- Jon, ekarriko didazu ezkontzara eroan zenuen amerikana?

Jon.- Jone, ez dut amerikana topatzen.

Jone.- Ba bilatzen jarraitu.

Jon.- Eta zertarako nahi duzu amerikana?

Jone.- Benetan ez zara gogoratzen?

Jon.- Ez, zertaz ari zara? Esadazu!

Jone.- Hobe ezer ez esatea.

Jon.- Benetan ez daukazula aspirinarik? Zure poltsa horretan farmazia osoa izaten duzu eta!

Jone.- Benga, tori eta hobe duzu ohean sartu eta lo hartzea. Zelako begi-zuloak dituzun, Jon.

Jon.- Bai, eske ez daukat jada parrandan ibiltzeko adinik, e?

Jone.- Adina, bai. Zuri falta zaizuna fundamentua da.

Jon.- Aizu, eta amerikana azaldu al da?

Jone.- Baina, Jon, ez duzu ezer gogoratzen?

Jon.- Joder, eske ez dakit zertaz ari zaren, neska!

Jone.- Ba beitu (begiratu), zure amerikana nire herriko parkean egongo da oraindik, atzo putzuko ahate bat ehizatzen ahalegindu zinen harekin. Beno, udaltzaina agertu arte.

Jon.- Ez da egia.

Jone.- Egia? Takoi bat apurtu nuen handik korrika ihesean irten genuenean.

Jon.- Patetikoa naiz, e, Jone?

Jone.- Bai, pato ehiztari patetikoa.

Jon.- Gelatik ateratzerakoan itzalidazu (itzal iezadazu) argia, mesedez.

Jone.- Zer, ez didazu pikitorik emango, ala?