Jon.- Begira, Jone, begira zer ekarri dudan.

Jone.- Bai, ikusten dut, kaxa handi bat.

Jon.- Bai, eta kaxaren barruan zer dagoen? Ezetz asmatu?

Jone.- Ezetz!

Jon.- Kafetera berria.

Jone.- Eta zertarako nahi dugu kafetera berria?

Jon.- Baina, hau ez edonolako kafetera, pottoka, hau tabernetako, kafetegietakoen modukoa da hau.

Jone.- Zer?

Jon.- Ba hori, kafe ona egiten duena, aparrarekin eta. Ummm!

Jone.- Baina, Jon, zu burutik zaude ala? Zertarako nahi dugu horrelako kafetera? Taberna ipini behar duzu etxean ala zer?

Jon.- Ez tentatu ni, ez tentatu, e?

Jon.- Jone, Jone, ya está, jarri dut. Begira, zer iruditzen zaizu?

Jone.- Beno, ez da hain handia, nahikoa potxoloa da.

Jon.- Hasi zaizu gustatzen, e?

Jone.- Eske (es que) kafetera ekarri duzula esan duzunean tabernetako handi horietako bat etorri zait burura.

Jon.- Estreinatzeko kafea egin beharko dugu, ezta?

Jone.- Bale, eta, aizu, kafetera zaharrarekin zer egingo dugu?

Jon.- Estudiora eramatea pentsatu dut, han akaso probetxua aterako diogu.

Jon.- Usaindu, usaindu aroma hau.

Jone.- Bai, bai.

Jon.- Goxoa, e? Gustua ematen du etxean horrelako kafetera edukitzeak. Ez dakit nola egon garen orain arte hau eduki gabe.

Jone.- Jon!

Jon.- Zer?

Jone.- Ea, zer izen ipiniko diogu?

Jon.- Zer izen?

Jone.- Ba bai, izena baino ez zaio falta. Ume batez berbetan ari zarela ematen du.

Jone.- Beno, auzoko kafeterarik modernoena daukagunez, bizilagunak kafea hartzera gonbidatu beharko ditugu, ez?

Jon.- Bai, zuk nahi duzuna zera da, Björn hori gonbidatzea da.

Jone.- Adibidez.

Jon.- Ba guk kafea baina berak ekar ditzala gaileta danesak, e? Baina ez Eroskiko merke nazkagarri horietakoak, ez, Danimarkako gaileta danesak. Bestela, jai dauka horrek etxe honetan.

Jone.- Jon, umearen modukoa zara.

Jon.- Bai, bai. Beste kaferik nahi?

Jone.- Beste bat?

Jon.- Bai, bai. Eske (es que), nik beste bat hartu behar dut.

Jone.- Hainbeste kaferekin Juan Saimazaren aurpegia jartzen ari zaizu, Jon.

Jon.- Jone!

Jone.- Zer?

Jon.- Lo al zaude?

Jone.- Bai, lo nengoen, bai.

Jon.- Nik ezin dut lorik egin.

Jone.- A, ez? Zergatik ote?

Jon.- Ez dakit.

Jone.- Ba igual hartu dituzun hamar kafeek badaukate zerikusirik.

Jon.- Jone!

Jone.- Zer?

Jon.- Pakito jarriko diogu, e?

Jone.- Zer?

Jon.- Bai, kafeterari, Pakito jarriko diogula kafeterari. Pakito, kafea mesedez!