EAEko kazetarien profil digitalak eta audientziekiko elkarrizketa

Inkesta bat egiten den bakoitzean, itaunketa horrek, besteak beste, funtsean, galdera-sortaren xede den sektoreak dituen arazoak antzemateko balio izaten du. Eta, esku artean dugun ikerketa lan hau, hain justu, uneotan kazetaritza lanbideak «pairatzen» duen guztiaren eguneratzearen etsenplu argia da.

Euskal Herriko Unibertsitateak eta Euskal Kazetarien Elkarte zein Elkargoak ere, une kritiko honetan, erredakzioetan, kazetarien artean, zer bizitzen ari den ezagutu nahi izan dugu. Egoera larri hau ez da soil-soilik Covid-19 izurriaren ondorio. Aurretik, 2008ko krisi ekonomikoak astindu zuen lanbidea eta azken hogei urteotan hedabideetan ezarritako esparru digitalaren eta sare sozialen garapen teknologikoak ere izan du bere eragina.