Din-don!

Jon.- Jone! Ireki ezazu atea, mesedez!

Jone.- Baina pijamatan nago eta!

Jon.- Eta ni komunean.

Jone.- Bale, baina amaitzen duzunean hemen ez banago zure errua izango da, igoal bahitzaile bat da eta berarekin eramango nau.

Jon.- Beno, arriskatuko naiz.

Jone.- Bai?

Aseguru saltzailea.- Egunon, andere.

Jone.- Egunon.

Aseguru saltzailea.- Begira, andere, bi minutu ba al dituzu? Zuretzat oso interesgarria izan daitekeen zerbaitetaz hitz egin nahi dut zurekin.

Jone.- Ez dut uste beharrezkoa denik, beitu (begiratu), honezkero ezagutzen dut mormoien erlijioa, Smith eta konpainiarena.

Aseguru saltzailea.- Zertaz ari zara?

Jone.- Gainera zuek beti binaka etortzen zarete, Elder 1 eta Elder 2. Non laga duzu beste misioneroa?

Aseguru saltzailea.- Barkatu, uste dut nahasten ari zarela.

Jone.- Jehovakoa zara, hori fijo, horiei hona bueltatzeko gogorik ez zaie geratzen.

Aseguru saltzailea.- Barkatu, andere, baina uste dut...

Jone.- Eta argi da Hare Krisna bat ez zarela.

Aseguru saltzailea.- Andere, ni Lagunarokoa naiz.

Jone.- Nongoa?

Aseguru saltzailea.- Lagunarokoa.

Jone.- Eta hori zer da, soziedade gastronomiko bat edo zer?

Aseguru saltzailea.- Ez, ez, aseguruak. Ez al duzu irratian iragarkia entzun?

Jone.- Ba, ez. Irrati iragarkiei ez diet inongo jaramonik egiten, egia esan.

Aseguru saltzailea.- Aizu, andere, galdera bat: bakarrik bizi al zara?

Jon.- Aizak, eta hik zertarako jakin nahi duk hori, e? Ziur al hago Lagunarokoa haizela? Identifikatu hadi, aber.

Aseguru saltzailea.- Tori, tori, hementxe nire txartela.

Jon.- Eta zertara etorri haiz ba, aber.

Aseguru saltzailea.- Lagunaroko seguru-agentea naiz.

Jone.- Bai, hori esan diguzu lehen.

Aseguru saltzailea.- Etxe honetako jabeak ote zareten galdetzen dizuet. Hala bada, aseguru poliza berri baten abantailak esplikatuko dizkizuet.

Jon.- Gu etxe honen jabe gaituk, bai, eta bankua gure jabe.

Aseguru saltzailea.- Beno, bale.

Jon.- Ba niri batere graziarik ez dit egiten, e?

Aseguru saltzailea.- Begira, nik hemen uzten dizuet informazioa eta datorren astean pasako naiz lasaiago hitz egitera. Ondo iruditzen zaizue?

Jone.- Beno, bale, bai.

Aseguru saltzailea.- Nik uste dut merezi duela gainera, nik horrelako poliza bat badut etxean eta nahiko konpletoa da, eta gainera prezio polita du. Beno, ni banoa, mila esker atea irekitzeagatik.

Jon.- Baina ez didak esan zergatik galdetu diok ea bakarrik bizi den, e? Nik dakidala horrek ez dauka zerikusirik polizarekin, etorri hadi.

Aseguru saltzailea.- Barkatu, presaka nabil, itzuliko naiz, pentsatu eskaintzan mesedez eta hitz egingo dugu datorren astean.

Jon.- Nik uste bahitzailea zela, e?

Jone.- Ba ez zegoen batere txarto!

Jon.- Ah ez, e? Aurrerantzean nik irekiko dut atea.

Jone.- Bale. Baina hurrengo batean bota komuneko bonba atera etorri aurretik, usaina honaino heltzen da eta.