Jone.- Jon, bazenekien Bora-Borako Mikelek bigarrena eduki duela?

Jon.- Bai, neska izan du oraingoan.

Jone.- Zelako pasada, e?

Jon.- Zer ba?

Jone.- A, ba gure adina daukalako eta honezkero jada bi seme-alaba... Baina, Jon! Nora zoaz?

Jon.- Maritxuak ureztatzera

Jone.- Hori, hori, ihes egin, kobarde.

Jone.- Zuri gainera arroza pasatzen ari zaizu, Jon. Berrogeitik gertuago zaude hogeita hamarretik baino.

Jon.- Zer?

Jone.- Entzun duzuna.

Jon.- Ni gaztea naiz oraindik, e?

Jone.- Ja, Peter Pan-en moduan, betirako gazte. Ez zaizu gai hauetaz berba egitea batere gustatzen, e?

Jon.- Ezetz neska, ez da hori, baina...

Jone.- Baina, baina... zer?

Jon.- Beno, ikusi al dituzu maritxuak, e? Begira, hostoak ateratzen hasi zaizkie.

Jone.- Nik pentsatzen dut heziketa kontua dela, gure belaunaldiko neskak ikasita gizarteko goiko postuetara heldu gaitezkeela frogatzen pasa ditugu urteak, eta amatasuna ahaztu egin dugu.

Jon.- Baliteke bai.

Jone.- Ia-ia gaizki ikusita dago hogeita hiru urtetako neska batek seme-alabak edukitzea...

Jon.- Zuk ez dituzu hogeita hiru, e?

Jone.- Ez nintzen nire kasuaz ari, baina egia da, badirudi gaztaroa luzatu egin behar dugula, konpromiso barik bizi...

Jon.- Ja.

Jone.- Nik, egia esan, badakit seme-alabak izango ditudala, ez dakit noiz, baina edukiko ditut. Baina, nora zoaz?

Jon.- Ez, ez, bada ez bada ere, igual oraintxe nahi dituzula erabaki, eta eskura daukazun bakarra ni naiz.

Jone.- Edo bizilagun danesa...

Jon.- Bai, baina hura homosexuala da.

Jone.- Eta zer? Homosexualek ere badute aita izateko gaitasuna, e?

Jon.- Ba orduan, "por si acaso", ez naiz oso urrutira joango.

Jone.- Zertan zabiltza komunean, Jon?

Jon.- Ezertan ez.

Jone.- Ez duzu jardungo pildorak kontatzen, ezta?

Jon.- Ez, ez.

Jone.- Ez du ezertarako balio, igual komunetik behera bota ditut.

Jon.- Ez zenidake hori egingo, ezta?

Jone.- Beno, nire amatasun-senaren arabera.

Jone.- Jon, badakizu ez nizukeela horrelakorik egingo, ez?

Jon.- Aizu, nik ere badaukat haurren bat izateko asmoa, e, eta badakit arroza pasatzen ari zaidala, baina pisua erosi berri dugu eta dena...

Jone.- Beno, nik aitatxo itxura ikusten dizut.

Jon.- A, bai?

Jone.- Bai, nik uste guk biok umea egin ezkero, majo-majoa irtengo zela, e?

Jon.- Horretan zalantzarik ez. Hori bai, behin hasita, gutxienez parea.

Jone.- Beno, beno, Jon, "umea" hitza entzun eta ihes egitetik bi izatera pasatu behar duzu?

Jon.- Bi minimo, igual hiru edo lau. Baina nora zoaz, Jone?

Jone.- Maritxuak ureztatzera