Jone.- Jon, goazen.

Jon.- Itxoin momentu bat, palak hartu behar ditut eta.

Jone.- Begira, Jon, esan dizut ez dudala zurekin palan aritzeko asmorik.

Jon.- Zer ba?

Jone.- Badakizu zer pasatu zen azkeneko aldian.

Jon.- Bai, pikatu egin zinela.

Jone.- Ni pikatu?

Jon.- Bai. Ikusten? Orain bezala, oraindik ez gara hondartzara iritsi eta dagoeneko pikatuta zaude.

Jon.- Gaur gainera eguraldi kaxkarra egiten du hondartzara joateko.

Jone.- Ba hobe, jende gutxiago egongo da, hondartza guztia guretzako.

Jon.- Nik badaezpada palak ekarri ditut.

Jone.- Begira, ez dut esan duzun hori entzun, hortaz, ez dizut erantzungo.

Jon.- Eta entzun ez baduzu, nola esan dezakezu ez didazula erantzungo?

Jone.- Aizu, Jon, eta palez gain, zer daramazu motxila horretan?

Jon.- Ba, begira, palak, pilota, toaila, tabakoa, uretan jolasteko baloia eta Kevlar bainujantzia.

Jone.- Kevlar bainujantzia?

Jon.- Bai, hondartzara joateko ar guztientzat derrigorrezkoa beharko lukeena.

Jone.- Begira, Jon, ez dut ezer ulertzen.

Jon.- Nola ez duzula ezer ulertzen? Zer da Kevlar?

Jone.- Ba material gogorra baina malgua.

Jon.- Ba horixe, ar orok hondartzara joateko beharko lukeen bainujantzia: gogorra eta malgua. Badakizu, hondartzan ikusten dena ikusita oso erraza da...

Jone.- Jon, txantxetan ari zara.

Jon.- Ez, ez, ez, egia da, animaliak gara, eta, pentsa, halako batean hondartzan tentetzen hasten bazaizu...

Jone.- Jon, gaixoa zara zu.

Jon.- Zuk esan ezazu nahi duzuna baina pentsa tente jartzen hasten zaizula. A zer espektakulua. Ez duzu ba pentsatuko hobea dela gerrillari baten moduan uretaraino joatea, ezta?

Jon.- Jone, txantxetan ari nintzela, neska!

Jone.- Ez dut ezer entzuten.

Jon.- Baina nola eramango dut Kevlar bainujantzi bat? Ez da existitzen!

Jone.- Bakean lagatzeko, Jon! Ez gara hondartzara heldu eta zutaz titietaraino nago jada.

Jon.- Noraino?

Jone.- Ba, begira, gaur behintzat ukituko ez dituzun titietaraino.

Jon.- Jone! Utziko didazu nire toaila zurearen ondoan jartzen?

Jone.- Beitu, (begiratu) nahi duzuna egizu.

Jon.- Jone, nirekin palan jolastu nahi al duzu?

Jone.- Ez.

Jon.- Jone!

Jone.- Zer?

Jon.- Zer iruditzen baloiarekin uretara joango bagina?

Jone.- Joan zaitez zu nahi baduzu, ni hemen geratuko naiz.

Jon.- Jone!

Jone.- Zer?

Jon.- Zergatik zaude hain haserre nirekin?

Jone.- Ez dakit, Jon, ez daukat berba egiteko gogorik.

Jon.- Ui, tanta bat erori zaidala iruditu zait.

Jone.- Amorrua ematen dit euriak hondartzan harrapatzen nauenean.

Jon.- Ba goazen uretara!

Jone.- Uretara?

Jon.- Bai, baloirik gabe eta euripean, e?

Jone.- Eta arropa zer?

Jon.- Arropa motxilan sartuko dugu. Benga, neska, pelikuletan bezala, Jone, maiteminduak egongo bagina bezala.

Jone.- Ez gaude, ala?