Dokuteka
Euskara, Europako hizkuntzarik zaharrena
Euskara hizkuntza bakana dugu, Kontinente Zaharrean sustraitu ziren hizkuntza indoeuroparren aurreko azken lekukoa dugulako. Kristo aurreko lehen Milurtekoaren hasieran mendebalde europarra inbaditu zuten hizkuntzak baino lehenagokoa, beraz.
Euskaldunak historiaurreko garaietatik bizi izan dira gaur eguneko lurraldeetan. Euskara, duen historia luzeagatik eta, batez ere, bizirik iraun duelako, tresna ezin hobea bilakatu da Europako iragan etnolinguistikoa ikertzeko. Asko teorizatu da euskararen jatorriaz eta ahaidetasunaz, baina ezin izan da horietako bat ere frogatu oraindik. Teoria horietariko askok euskara hizkuntza kaukasiarrekin, indoeuropar aurreko iberiarrekin eta iparraldeko afrikar hizkuntzekin duen ahaidetasunaz egin dituzte hipotesiak.
