24.1 Xanti+Kristina

(Kristinaren tabernan, telefonoak joko du. Jende asko dago)

KRISTINA- Banoa! Banoa! Zergatik jotzen du telefonoak beti gutxien komeni zaidanean?
XANTI- Zu zirikatzen disfrutatzen duelako izango da!
KRISTINA- Eta ez da bakarra, ezta? Bai? Bai, hemen dago. Bai, esango diot jartzeko. A! Beno, konforme, nire kontu.
XANTI- Zer, enkarguren bat?
KRISTINA- Bai. Kafetxo bat jarriko dizut?
XANTI- Nor zen? Ines?
KRISTINA- Ez...
XANTI- Ez didazu esango Inesek beste lan bat topatu duenik, ezta? E? Afaria daukagu jokoan!
KRISTINA- Ez, ez. Kafetxo on bat jarri eta esango dizut.
XANTI- Zer gertatzen da?
KRISTINA- Ezer ez.
KRISTINA- Torizu (Tori ezazu), kargatua.
XANTI- Eskerrik asko!
KRISTINA- Zuri gustatzen zaizun bezalakoa.
XANTI- E, Kristina...
KRISTINA- Esto... Karlos zen!
XANTI- Bazen garaia! Konpondu al du nire printzesa?
KRISTINA- E, beno... pasatzeko bihar.
XANTI- Zer?
KRISTINA- Gaur ondoezik etxean geratu dela!
XANTI- Jode! Nik sendatuko dut hori harrapatzen dudanean! Mekaguenla...

24.2 Xanti+Olatz

(Taxi geltokian daude. Arratsaldea da)

OLATZ- Xanti, mekaniko gizarajoek ere izango dute, ba, gaisotzeko eskubidea!
XANTI- Bai, horixe! Eta nahiago nuke medikuak bihar begiratuko diola esatea! Eta bihar, etzi egingo duela eta etzi, etzidamu! Orduan konturatuko litzateke.
OLATZ- Ez konparatu osasuna eta...
XANTI- Eta zer? Nire taxiaren osasuna? Aizu, niretzat biak dira inportanteak, e!
OLATZ- Bai, Xanti, baina ezin denean ezin da, eta orduan...
XANTI- Konforme, konforme, e! Ez hasi zu ere, zera, sermoigintzan, e! Baina zuetako edonor ikusi nahi nuke nire egoeran! Ba al dakizu gaur zenbat karrera egin ditudan?
OLATZ- Ba, ez!
XANTI- Ba, oraintxe esango dizut.
OLATZ- Egun batzutako kontua da, Xanti.
XANTI- Bai, egun batzutakoa, baina azkenaldi honetan denek lelotzat hartzen nautela pentsatzen hasita nago, ba.
OLATZ- Aizu, eta zergatik esaten duzu hori?
XANTI- Jode! Atzo bertan, Euskadi Irratiko zuzendari horrek jakin nahi nuke zer pentsatu zuen! Xantiri buruz galderak egiten ni, nori eta, zera, zuzendariari berari! Taxista lelo bat naizela pentsatzen ariko da.
OLATZ- Bai, seguruenik ez du lorik egingo zurekin pentsatzen, zera!
XANTI- Aizu, "oye"! Ez, baina ez didazu esango kasualitatea ez denik, e! Nor eraman beharko eta... Joe! Hori niri bakarrik gertatzen zait.
OLATZ- Berezia zarelako, Xanti.
XANTI- Bai horixe, berezia. Zera! Aizu, ba, taxistak bereziak garela esan zidan, e!
OLATZ- Ez denak, ordea. Batzuk zarete bereziak. Ale, kafetxo bat?
XANTI- Et, et, et. Gaurko kupoa beteta daukat nik.

24.3 Kristina+Olatz

(Kristinaren taberna orain lasaiago dago)

KRISTINA- Ez zaitez kezkatu, Olatz, udazkeneko depresioa izango du.
OLATZ- Ai, ez du bururik altxatzen! Eta Xanti ez da horrelakoa!
KRISTINA- Ai, ez dela horrelakoa! Printzesarik gabe uzten duten bakoitzean horrela jartzen da, eta zenbat eta urte gehiago, okerrago. Badakizu 40 urtetako krisia eta...
OLATZ- Zer?
KRISTINA- Beno, adina ere garrantzitsua izaten dela horrelakoetan. Eta gizarajoari hainbeste gauza gertatzen ari zaio, gainera...
OLATZ- 40 urtetako krisia esan duzu?
KRISTINA- Bai, hala esaten dute.
OLATZ- Xantik 40 urte al ditu?
KRISTINA- Paseak izango ditu honezkero.
OLATZ- Paseak?
KRISTINA- Beno, baietz uste dut. Beno, ez dakit seguru, baina...
OLATZ- Baina 40 urte bakarrik?
KRISTINA- Hara bestea! Eta zenbat uste zenuen, ba?
OLATZ- Ez dakit, Kristina, baina gehiago.
KRISTINA- Zuk kontu egizu (egin ezazu) zure aita eta berea elkarrekin lan egindakoak direla.
OLATZ- Bai, bai, baina...
KRISTINA- Ba, hortxe-hortxe, ez dakit. Izan ditzake berrogeita hiru-lau, ez askoz gehiago!
OLATZ- Ba, begira, apustu egingo nuen, zera, gehi...
KRISTINA- Ixo, ixo, hemen dator-eta! Eta hitzik ere ez honetaz, e? Besterik ez du behar gizarajoak!

24.4 Xanti+Serafina

(Etxeko sukaldean, afaltzen. Euskadi Irratian klasikoak entzuten dira)

SERAFINA- Umea, oso gutxi afaldu duzu. Izan ere, asko esan eta gutxi egiten duten horiekin... Neroni joango naiz mekaniko horrengana, ez badizu bihar bertarako zure taxia konpontzen! Mutil gizarajoa horrela eduki egin behar da gero!
XANTI- Lasai, ama, konponduko du. Hori esan zidan!
SERAFINA- Bai, esatea erraza da, egitea da hemen zaila!
XANTI- A, e, zera, ez nizun esan, zera, atzo Euskadi Irratiko zuzendaria eraman nuen taxian.
SERAFINA- Etzazu (ez ezazu) esan! Bai, ala?
XANTI- Bai, bai, bai!
SERAFINA-  Eta galdetu al zenion Euskadi Irratiko taxista horri buruz?
XANTI- Zer, zuk ere ezagutzen al duzu, ba?
SERAFINA- Ezagutuko ez dut! Zeinek ez du ezagutzen?
XANTI- Jode! Neronek!
SERAFINA- A, beno!
XANTI- Eta, aizu, zera, Xanti omen du izena!
SERAFINA- Bai. Bai gizon jatorra, zintzoa, leiala. Eta ez dakizu zer ateraldiak!
XANTI- Nire modu-modukoren bat izango da, orduan.
SERAFINA- Ez du izenak egiten izana!
XANTI- Ez, baina...
SERAFINA- Ez du zure antzik ezertan! Ezertan ez, e?
XANTI- A, ba lasaitzen naiz, ba, ze, aizu, kezkatzen hasita nengoen, e!
SERAFINA- Beno, Xanti! Hark, gutxienez, badauka zer kontatua! Zurekin hasiko balira, bi egunetan akabo radionobela, umea! Ale, segizazu (segi ezazu) lotara!