6.1 Xanti+Serafina

(Etxeko sukaldean. Serafina bazkaria prestatzen ari da)

SERAFINA- Baboa halakoa! Bost milioi aurkitu eta ertzainei eman? Dena? Beno, beno, Santiago!
XANTI- Ama, on eginak, damurik ez, akordatzen al zara? Zuk erakutsitakoa da!
SERAFINA- On eginaren saria, esker txarra!
XANTI- Lapurra baino lapurragoa, lapurrari laguntzen diona!
SERAFINA- Lapurrari lapurreta egin ezkero, Jaungoikoak barre egiten du!
XANTI- Kaguensos, zuk nahi duzun eran erabiltzen duzu zuk zera... zaharren jakinduria!
SERAFINA- A, ez! Eta zertarako da, ba, bestela, e?
XANTI- Nik kontzientzia lasai daukat, behinik behin!
SERAFINA- Hori da! Hori da, Santiago, biziko gara zure kontzientziaren errentatik! Zozo hori!

6.2 Xanti+Kristina

(Kristinaren tabernan ez dago inor. Xanti bakarrik)

XANTI- Eta batere bazkaldu gabe alde gin dut, dedio! Nire onetik atera nau-eta!
KRISTINA- Jarriko dizut pintxo bat.
XANTI- Eskerrik asko, Kristina.
KRISTINA- Hala ere, zure amak ez du arrazoi faltarik.
XANTI- Hasi zaitez zu ere!
KRISTINA- Hara, den-dena eraman ez bazenu ere, zeinek jakingo zuen?
XANTI- Etzazu (ez ezazu) pintxorik jarri, Kristina, ze denon artean gosea kendu didazue-eta!

6.3 Xanti+Ines

(Taxi barruan, geldirik dago)

INES- Taxi geltoki nagusian autorik bai? Geltokitik gertu zerbitzu bat behar dut.
XANTI- 1777 prest.
INES- Kaixo, Xanti!
XANTI- Ni libre.
INES- Xanti, egia al da bost milioi taxian aurkitu eta komisaldegira eraman dituzula?
XANTI- Zer, irratian esan al dute?
INES- Irrati honen bidez dena jakiten da.
XANTI- Oraintxe esan duzu. Bai, bai, egia da, eta zer?
INES- Gizon zintzoa zaren seinale. Zorionak!
XANTI- Benetan hala iruditzen al zaizu?
INES- Bai, benetan. Auto bat behar dut, plaza nagusirako.
XANTI- Eta zintzoa bada, igual ote dio?
INES- Zuretzat. Taxi onenak, esan?

6.4 Xanti+Emakume exekutiboa

(Taxian doaz. Sekulako ataskoa dago. Bozinazoak, motor soinua)

EMAKUMEA- Begira, kasik hementxe jaitsiko naiz, e? Lehenago iritsiko naiz.
XANTI- Beno, nahi duzun bezala, baina hau errotondara iritsi bitartekoa da, e?
EMAKUMEA- Seguru?
XANTI- Aizu, ondo daki herriaren berri alkate baino lehenago izan denak aguazil.
EMAKUMEA- Aguazila izandakoa al zara?
XANTI- Ez, emakumea! Bakoitzak dakiela bere etxeko berri!
EMAKUMEA- Baina zer gertatzen da? Denak batera ateratzea erabaki al dute?
XANTI- Hala ematen du, ezta? Ez. Ordua da. Beno, ordua eta obrak, eta aldaketak. Badakizu. Begira hemen ere, espaloi guztia altxatuta! Despatxuan ari denak erraz ikusten baitu dena paper gainean! Lehen gora zena, orain behera, eta beste hartan dirección-prohibida jarrita, listo! Hemen ibili egin behar baita egun osoan gora eta behera! Dabilenak daki. Eta etxean dagoenak, etxeko berri bakarrik daki!
EMAKUMEA- Ondo da. Geratu hementxe. Zenbat da?
XANTI- Esto... sei euro!
EMAKUMEA- Sei euro? Zoratu egin zara! Nola ordainduko dizkizut sei euro? Hamar metro ez ditugu egin-eta!
XANTI- Aizu, metroak ehun zentimetro besterik ez ditu gero!
EMAKUMEA- Tori (har ezazu/itzazu) hiru euro! Eta zentimetroa metroa adina ordainduta!

(Autotik irtengo da, ateari danbatekoa emanez)

6.5 Xanti+Pako+Kristina

(Kristinaren tabernan. Jende asko)

XANTI- Azkenean egia izango da.
KRISTINA- Ez zaitez horrela jarri, gizona!
XANTI- Egia izango da baboa naizela, amak esaten duen bezala!
PAKO- Ez, Xanti. Antza baduzu, baina ez zara.
KRISTINA- Hori da, Pako! Zuk animatu, gainera!
XANTI- Eta zer egin behar nuen, e? Atzetik jarraitu? Autoarekin jo?
KRISTINA- Ai, hara, kafe eder-eder bat jarriko dizut, kargatu-kargatua, eta ikusiko duzu nola pasako zaizun.
XANTI- Eskerrik asko, Kristina. Eta maletina zeraman bestea...
PAKO- Ahaztu, Xanti
XANTI- Ahaztu, ahaztu! Bateko maletina eta bost milioiak. Besteko, ertzainen abixua, gainera! Ezin dela zurea ez den maletina ireki, jode! Eta orain ordaintzen ez duten bezeroak! Eta maletinarekin, gainera!
PAKO- Lasai!
XANTI- Bai, ni lasai, oso lasai, baina...
KRISTINA- Torizu (tori ezazu/har ezazu)!
XANTI- Eskerrik asko, Kristina!

6.6 Xanti+Kristina

(Xanti taxi aldera doa oinez. Atzetik korrika etorriko zaio Kristina)

KRISTINA- Xanti!!! Xanti!!!
XANTI- Zer da? Aizu, kafea ordaindu dizut, ezta?
KRISTINA- Bai, badakit. Ez da hori.
XANTI- Bai arraroa, zu gerri parean barrarik gabe ikustea, Kristina!
KRISTINA- Ez zaitez orain adarra jotzen hasi, e?
XANTI- Zer, zer gertatzen da?
KRISTINA- Hara, lehen ez dizut esan, jende gehiegi dago-eta, baina...
XANTI- Zer susto eman behar didazu orain?
KRISTINA- Ez, txorakeria bat da, baina... gaur tabernan jende arraro asko ibili da. Hori esateko zen.
XANTI- Jende arraroa? Zer jende arraro?
KRISTINA- Ba, ez dakit seguru, baina ertzainak akaso... edo ez. Ez dakit.
XANTI- Eta beldurtu egin zara.
KRISTINA- Ez, gizona! Ni ez naiz edozerekin beldurtzen!
XANTI- Orduan?
KRISTINA- Galdera arraroak egiten aritu dira: maletinaz, diruaz, zutaz... Badaezpada esaten dizut.