Jone.- Ai! Ia ahaztuta nengoen, Jon. Nire lehengusinaren ezkontza bi aste barru izango da.

Jon.- A bai?

Jone.- Ikusten dut ilusio handia egiten dizula, e?

Jon.- Ba...

Jone.- Ba... agoantatu egin beharko zara. Joan nahi genuela esan genuen.

Jon.- Eta jakina, zure herriko koadrila osoa hantxe izango da, ezta?

Jone.- Bai, eta ez ipini aurpegi hori.

Jon.- Zer aurpegi jarri dut ba?

Jone.- Ondo dakizu zuk.

Jon.- Ez, ez dakit esadazu zuk.

Jone.- Ba "zure koadrilakoekin pasa behar dut egun osoa" aurpegia.

Jon.- Eta hala al da?

Jone.- Ba bai, eta nire gurasoekin, eta nire familia osoarekin, txupi ezta?

Jon.- Bai, txupi.

Jon.- Baina esadazu niri, gaur egun zergatik ezkontzen da jendea elizatik?

Jone.- Ilusioa egiten die eta, beno, bizitzan behin...

Jon.- Bizitzan behin? Ja, ja, honezkero ez da geratzen horrelakorik...

Jone.- Gu ezik, ezta?

Jon.- Jakina, baina gu eszepzioa gara, e?

Jone.- Ah, bai.

Jon.- Total, udaletxean ere ezkon zitezkeen, ezta?

Jone.- Ay, Jon, lagaiozu (laga iezaiozu) jendeari nahi duen tokian ezkontzen. Zuek, antikle... beno, elizaren kontra zaudetenak, zarete azkenean sermolarienak.

Jon.- Antiklerikalak. Antiklerikalak esan nahi zenuen, ezta?

Jone.- Bai.

Jon.- Eta ez zaizu atera ezta?

Jone.- Ai, Jon, ez egin kilikarik.

Jon.- Ekarri, ekardazu hitz egiten ez dakien aho txiki hori. Nik konponduko dizut, emadazu pikito bat, emadazu pikito bat.

Jone.- Mua, mua!

Jon.- Entsalada tomatearekin egingo al dut?

Jone.- Bale. Aizu, bihar arropa erostera irtengo gara.

Jon.- Nik ez daukat beharrik.

Jone.- Ezkontzarako. Ez zara betiko amerikanarekin joango eta gainera ganorazko zapatak behar dituzu.

Jon.- Ez dago beste erremediorik, ezta?

Jone.- Ez, txikito, hemen ez dago negoziazio posiblerik.

Jone.- Jon, despedida ere antolatu beharko dugu.

Jon.- Ez, ez, ez, gu ez goaz despedidetara, badakizu.

Jone.- Begira, zuk nahi duzuna egin baina ni joango naiz lehengusinaren despedidara.

Jon.- Ba orduan gureak egin du, e? Badakizu hori hiru kondizioetako bat dela, ezta?

Jone.- Ai, zu eta zure txorrada horiek.

Jon.- Ea, lehendabiziko kondizioa: ez dizkidazu kilimak egingo buruan.

Jone.- Burusoilean, esan nahiko duzu.

Jon.- Bigarren kondizioa: ez zara kubatar baten saltsa-klaseetara sekula apuntatuko.

Jone.- Ja.

Jon.- Eta hiru: ez zara soltera-despedidetan ikusten diren plastikozko zakil horietako batekin kalera aterako. Kapitxi?

Jone.- Kapitxi ez, kapitxa.

Jon.- Ez, ez, ez dut uste, e, uste dut aho txiki hori ez dizutela behar bezala konpondu. Etorri zaitez!

Jone.- Biziosoa!

Jon.- Antiklerikala izatearen abantailak, pottoka.

Jone.- Ez esateko pottoka!