GAI-JARTZAILEA: ... eta nahi duzun neurri eta doinuan beste hiru bertso osatzeko gaia, honako hau: "Gau-eskola bateko irakaslea zara. Aurrean dituzu dozena bat pertsona neka-neka eginda, eta hala ere, gogotsu. Hiru bertso, nahi duzun neurri eta doinuan":

ANDONI EGAÑA

Ordiziarra naiz, baina Santurtzin
hautatu nuen langintza,
izan nintekeen zenbaitentzako
behar zuten argi-printza,
Ezkerraldea erdalduna zen
neretzat a ze desditxa,
Euskaldun izan nahi zuten haiek
behar nituen zerbitza.
Ia hamarrak jo dute eta
nekaturikan gabiltza,
hala ere eutsi pixka batean
eta dantzatu lapitza,
ia euskeraz pentsatu eta
euskeraz luzatu hitza;
ez al da hori euskaldun baten
lehendabiziko baldintza?

Ea, Edurne, etorri zaitez,
orain pizarra aldera,
ahal den goxoen egingo dizut
ikasgaiaren galdera,
bueno, mesedez, ez hainbat neka,
ez al zintezke hor gera?,
kontatuko dut nik zenbat amets
egingo dudan aurrera.
Hau sumatzen det zonalde dena
Euskalduntzeko bezpera,
ahalegin hortan zuek eta nik
lana daukagu ospera,
eta gauza bat bururatu zait
hau jartzea buruz behera,
nor-nori-nork hau nabarmena da
zuek, ni eta euskera.

Ekarri ditut pastaren batzuk
gainera hainbat kutizi,
ari den har(e)k nola gustora
ari behar dun lehenbizi,
zatoz Leandro, alde hontara,  
zure koaderno ta guzi,
atzo idazlan oso politik
nola ez nizun ikusi,
aitzazu* Mertxe, etzazu egin
gela hontan aharrausi,
ez ezazula logurea ta
gure helburua nahasi,
lortzen badegu hiru hitzetan
hau egingo dugu kasi,
ordu mordo bat galduta ordea
mundutxo bat irabazi.

*aitzazu: adi ezazu.