Ikusi bideoa jakiteko haurrek (gizakiek) eta makinek nola ikasten duten.

Argazkia: Pixabay

Esataria. Ipuinetan agertzen diren elefante, krokodilo eta lehoi exotikoez aparte, txakurra izango da ziurrenik haur batek ikusten duen lehenengo animalia erreala. Baina nola daki txakur bat dela? Nola bereizten ditu txakurrak beste animalia guztietatik? Erantzuna entrenamendua da.  

Txakur asko ikusten ditu haur batek kalean, tamaina, kolore eta ilaje desberdinetakoak badira ere, bere burmuinak ezaugarri komunak bilatzen ditu guztien artean: lau hanka ditu, buztana mugitzen du, ez du hegan egiten, zaunka egiten du. Horregatik kanitxe (kanixe) bat zein artzain-txakur aleman bat ikusten duenean argi dauka: au, au!   

Makinek ere antzera ikasten dute. Demagun sailkatzaile automatiko bat sortu nahi dugula. Helburua da makinak bere kabuz erabakitzea aurrean duen irudi hori botila gorri bat zen ala ez.  

Ezer baino lehen adibide-multzo bat eman beharko diogu. Orain arte adibide horiek eskuz etiketatu behar ziren. Hau da, banan-banan esan behar zitzaion sistemari irudian zegoena botila bat zen ala ez eta gorria zen ala ez, eta berak estatistika erabiltzen zuen erantzuna asmatzeko. Adimen artifizialari esker, nahikoa da adibide horiek botilak gorriak diren ala ez esatea, eta sistemak automatikoki erauziko ditu ikasi nahi duen irudiaren ezaugarriak: zenbat eta adibide gehiago hobeto trebatuko da. Izan ere, ziklo bakoitzean bere algoritmoak edo formulak egokitzen joaten da. Ikusi eta ikasi.