4.1 Jose Luis+Bixente

(Jose Luis eta Bixente tailer paretik pasa dira eta taxia ikusi dute)

JOSE LUIS- Bixente, begiraiozu (begira iezaiozu) tailerraren atarian dagoen taxi horri.
BIXENTE- Begiratu diot, eta?
JOSE LUIS- Ez al zaizu ezaguna egiten?
BIXENTE- Taxi bat da.
JOSE LUIS- Taxi bat? Ez, ez da taxi bat.
BIXENTE- Nola ez dela taxi bat? Esan ez didazu taxi horri begiratzeko?
JOSE LUIS- Ez da taxi bat. Xantiren taxia da!
BIXENTE- Seguru al zaude?
JOSE LUIS- Lepoa jokatuko nuke.
BIXENTE- Lepoa joan den astean ere galdu zenuen.
JOSE LUIS- Okerrago egin dut zuri galdetzearekin.
BIXENTE- Adios gure gaurko pelota partidua! Jose Luis, nora zoaz?

4.2 Jose Luis+Bixente+Ines

(Taxiko atea zabaldu eta barrura sartuko da Jose Luis. Barruan dagoela hasiko da irratiz Ines)

JOSE LUIS- Ez dago dudarik. Bere kartela, begira, bere asientua, liburua...
INES- Hiriaren irteeran autorik bai? Inor bai irteeran?
JOSE LUIS- Nola demontre hitz egiten da hemendik?
BIXENTE- Utziko al duzu hori bakean?
JOSE LUIS- Bat, bat, bat. Bai, horrela. Telefonista, telefonista, kanbio!
INES- Zer telefonista eta zer...
JOSE LUIS- Aizu, galdera bat egiteko da. Xantik ez al du gaur lanik? Kanbio!
INES- Eta nik zer dakit? Nor demontre zara zu?
BIXENTE- Uzteko bakean, Jose Luis! Inork ikusita ere!
JOSE LUIS- Bere lagun batzuk gara, pilotazaleak esanda ulertuko luke berak, eta nola bera ez dagoen... eta taxia hemen, tailerrean daukan, ba, hori... Kanbio!
INES- Eta bera hor ez badago, zer egiten duzu zuk bere taxian, e? Fuera hortik!
JOSE LUIS- Ez haserretu, emakumea! Aurkituko dugu. Kanbio y korto!

4.3 Xanti+Ines

(Zentralitan: Ines lanean ari da. Xanti abisatu gabe sartuko da)

INES- Bai. Segituan bidaliko dizut. Nor inguratuko da epaitegira? Epaitegiaren inguruan dabilenen bat? Konforme! Zuretzat. Taxi onenak, esan?
XANTI- Hola, keai!
INES- Momentu bat. Erdialdean autorik? Zer? Bai. Segituan. Barkatu, zer nahi zenuen?
XANTI- Beno, ba, lehendabizi, behintzat, zu ezagutu.
INES- Ahots hori...
XANTI- Xanti, 1777, zure agindutara!
INES- Zu al zara Xanti?
XANTI- Ni naiz, siseñora, nahi duzunerako. Gustua ematen du nola lan egiten duzun ikusteak. Eta zu...
INES- Ni? Ines! Eta barkatu, baina... Taxi Onenak, esan? Oraintxe joango zaizu bakarren bat! Baina ez daukat hizketan aritzeko betarik, e!
XANTI- Besterik egiten al duzu, ba? Broma zen, emakumea, ez horrela begiratu!
INES- Ba, begira, bromatarako ere... Bai, esan?
XANTI- Ez daukazu betarik, bai ikusten dut. Beno, e, bale! Beste batean beharko du, eta...
INES- A, aizu, aizu, gauza bat. Norbait aritu zait zure taxitik hizketan.
XANTI- Nire taxitik?
INES- Bai, bai, zure taxitik. Zergatik esan arazten dizkidazu gauza guztiak bi aldiz?
XANTI- Gizonezkoa ala emakumezkoa?
INES- Gizonezkoa. Pilotazalea dela esan du. Barkatu! Bai? Momentu bat, mesedez!
XANTI- Akabaramos! Bai, Bixente eta Jose Luis. Bien! Aizu, esto... depaso, oraindik... zera, maletinarena...
INES- Xanti! Inork ez du galdetu hemen maletin bati buruz! Galdetzen duten egunean, akordatuko naiz. Ez izan dudarik!
XANTI- Estimatuko dizut. Inportantea da eta...

4.4 Xanti+Olatz

(Taxi geltokian. Kalean)

XANTI- Olatz, polit hori, fabore bat egin behar didazu!
OLATZ- Maletinaren jabea aurkitzen lagundu!
XANTI- Ez, ez, hori baino presazkoagoa da.
OLATZ- Hori baino presazkoagoa? Baina zer da bost milioiren jabea aurkitzea baino presazkoagoa?
XANTI- Zer, irratiz esan al dute, edo zer kristo?
OLATZ- Pakok esan dit.
XANTI- Jode, kostatzen zaiola hitz egitea, baina hasten denean, mekaguen!
OLATZ- Lasai, lasai, Xanti, nik ez dut kontua zabalduko eta.
XANTI- Nahiago, badaezpada, e, Olatz.
OLATZ- Aizu, eta zer sentitzen da bost milioiren jabe izanda?
XANTI- Komisaldegian utzi ditut, neska.
OLATZ- Komisaldegian?
XANTI- Bai!
OLATZ- Xanti, zu zoratuta zaude?
XANTI- A, ez! Zer nahi duzu? Pasieran eramatea edo zer?
OLATZ- Zuk daukazu gibela, Xanti!
XANTI- Zurea utziko al didazu?
OLATZ- Gibela?
XANTI- Ez, neska, taxia, biaje bakar baterako. Gaur pilotazaleak, badakizu... Edo zerorrek eraman bestela.
OLATZ- Ez, ez, hartzazu (har ezazu), baina ez dadila Pruden handia enteratu, e!
XANTI- Ez, ez, ez.

4.5 Xanti+Jose Luis+Bixente+Ines

(Auto barruan daude. Trafiko handia)

BIXENTE- Beldurtu gara, Xanti, gaur taxirik gabe geratuko ote ginen.
XANTI- Bai zera!
JOSE LUIS- Beno, beldurtu hau beldurtu da, badakizu nolakoa den.
XANTI- Beno, gizonak, lasai! Noiz huts egin dizue Xantik, e?
JOSE LUIS- Han ikusi dut, tailerrean, eta pentsatu ere bai: adios.
BIXENTE- Eta esan, esan zer ibili zaren, barrura sartuta.
JOSE LUIS- Ibili? Galdetu besterik ez dut egin.
INES- Adi! Ohar berezia. Ohar hau 1777rentzat. Jarri harremanetan zentralarekin!
XANTI- Hori ni naiz!
JOSE LUIS- Horrekintxe hitz egin dut nik ere. Hori jenioa!
XANTI- Jenioa galanta! Eta baita gainontzekoa ere! Hemen 1777, zure agindutara, Ines!
INES- Ahal duzunean, deitu zentralera.
XANTI- Hara! Eta zertan ari naiz, ba?
INES- Deitu telefonoz, mesedez.
XANTI- Mesedez esan al du?
JOSE LUIS- Bai, hala esan du.
BIXENTE- Nik ere hori entzun dut, ez dakit!
XANTI- Ai, Ines, Ines...