Mantsoago, azkarrago, azkarregi, mantsoegi.
Aldapan gora, aldapan behera, haize kontra, haize alde.
Atzeraka, aurreraka, aurreko aldean, atzeko aldean, erdian.
Hanka-puntetan, hanka-hutsik, lau hankatan, hiru hankatan, bi hankatan.
Aulkitxoan, besotan, motxilan, buru gainean, andre-sillaka.
Euripean, blai-blai eginda, mela-mela eginda, busti-busti eginda, putzu-putzu eginda.
Elurpean, hoztuta, jelatuta, izoztuta.
Eguzki-galdatan, izerdi patsetan, ilargipean, eguzki-argitan, lainopean.
Gauez, egunez, goizez, arratsaldez, egunsentian, ilunabarrean.
Bakarrik, binaka, hirunaka, launaka.
Taldean, tropelean, pelotoian, lagun artean, ezezagun artean, presoen argazkiekin, eskutik helduta.
Txandalez, praka motzean, mahuka-hutsik, mahukarik gabe.
Dotore, apainduta, apaindu gabe, mozorrotuta.
Oihuka, garrasika, deiadarka, aldarrika, isilik, isilki, mutu.
Erraz, itobeharrean, makal, arnasestuka, aise.
Lasterka, arineketan, antxintxiketan, arrapaladan, presaka.
Korrika
Esan ohi da eskimalek ehunka modu ezberdin dituztela zuri koloreari esateko.
Euskaldunok ere ehunka modu ezberdin ditugu gure hizkuntza zaharra bizirik dagoela esateko.
Ehunka modu ezberdin eta bi mila hirurehun eta hirurogeita hamasei kilometro.