Xabier Euzkitze:

Tarte berezi bat merezi du

aroaren egoerak

Elurte latzak utzi dizkigu

Santa Ageda bezperak.

Giroa asko negutu zaigu

azkenaldiko boladan

Siberian legez ibili gara

Bizkaian eta Araban.

Siberiako haizeagatik

Euskal Herrian elurra

Adiskideok, har ezazue

koplari honen agurra.

Unai Ugarte Gasteizen da

han ere elurte handia

(e)ta goiz-goizetik izan duzue

makina bat komeria.

Unai Ugarte:

Aurrez elurra genuen eta

ondoren izotza trinko

Gasteiztarrek dituzte

makina bat ipurdiko.

Xabier Euzkitze:

Gure Lierni Bilbon daukagu

hotzez, baina alai-alai

hirian ez du asko ezarri

baina inguruetan bai.

Lierni Agirrezabala:

Bilbon bertan ez, baina inguruan

Gasteiztarren igualtsu

Artxandak ia ematen zuen

Baqueira edo Candanchu.

Xabier Euzkitze:

Nafarroako mendialdea

Elur-tokia da berez

(e)ta Aralarren pozez zoratzen

Ibili da Aitor Perez.

Aitor Perez:

Arrazoi duzu, Aitor poz-pozik

elurra bada nahikoa

(e)ta hotza, berriz, ideiak ere

izozteko modukoa.

Xabier Euzkitze:

Gure gazteak noiznahi eduki

Oinak beldurrak airean

Aizu, Hodei, zer gertatu zaizu

Gernikarako bidean?

Hodei:

Abiatu naiz istripu baten

berri denoi ematera

baina bidean gelditu gara

ez aurrera ez atzera.

Xabier Euzkitze:

Naiara, berriz, herririk herri

eta gaurkoan Zumaian

bertakoekin Santa eskeko

ohiturak berritu nahian.

Naiara:

Orain koplari ni hasi arren

lasaitu zaitezte denak

hemen baititut ni baino hobe

abestuko digutenak.

Xabier Euzkitze.- Arratsalde on dizuela, jaun-andreok! Tira ba, Santa Ageda bezpera denez, eta gure saioa koplari bikainez beterik dagoenez, kantari ekin diogu gaurko honi.