Dokuteka
Fagor, multinazional bihurtua
Herenegun halako bi da Fagor Etxetresnak gaur: lan taldea, ekoizpena eta salmentak bikoiztu ditu, Frantzian liderra den Brandt enpresa erosita.
Brandt erosita, tamaina bikoiztu du Fagorrek, nazioartera begira
Ia 2.000 milioi euro fakturatuko ditu 2006an, 11.000 langile dauzka orain, eta 100 herrialdetara hedatuko da
Herenegun halako bi da Fagor Etxetresnak gaur: lan taldea, ekoizpena eta salmentak bikoiztu ditu, Frantzian liderra den Brandt enpresa erosita. Sektoreko bost konpainia ahaltsuenen artean dago. Ia 2.000 milioi euro fakturatuko ditu 2006an, 11.000 langile dauzka, eta ehun herrialdetara hedatzera doa, 16 lantegi eta 12 markaren bitartez. «Aro berri bati» ekin dio.
«Nazioartera begira jarri gara behin betiko», azaldu zuen Fagor Etxetresnetako zuzendari nagusi Pablo Mongelosek atzo, iazko emaitzei eta Brandti buruzko prentsaurrekoan. «Mugarri izango da enpresa horretaz jabetu izana». Tamainak «garrantzi handia» dauka nazioarteko merkatuan, eta globalizazioari neurria hartu nahi dio MCCko enpresak.
Fagorrek 162,5 milioi eurotan erosi du Brandten %90 aurretik berea zuen %10. Kapital propioaz gain, MCCren baliabideak (pagatutakoaren %18) eta kanpoko kredituak (%55) erabili ditu erosketarako, eta astearteaz geroztik, lantegiak dauzka Europan, Asian eta Afrikan. «Linea zuriko multinazional bakarra gara Espainian».
Urtero zazpi milioi etxetresna baino gehiago ekoitziko ditu talde jaio berriak, eta lanak hartuko ditu Fagorren eta Brandten arteko elkarlana pizteko. «Erronka zera da, etekinak orain halako hiru izatea laster». Fagorrek 16,8 milioi euro irabazi zituen iaz. Hurrengo hiru urteetan, gainera, 8.300 milioi euroren salmentak lortu gura ditu.
«Ez dugu lantegirik itxiko»
Ikerkuntza eta berrikuntzan inbertitzen segituko du, eta funtsezkoa deritzo kostuak gutxitzeari, baina ez lan baldintzen kontura: «Ez dugu lantegirik itxiko, eta ez gara hemendik joango. Espainian eta Frantzian aberastasuna eta enplegua eragin behar ditugu, aurrerantzean ere liderrak izateko».
Fagorrek «konpromiso argia» dauka gizartearekin eta, besteak beste, berrikuntzaren bitartez lehiatuko da Europa Ekialdean eta Asian merkeago ekoizten duten konpainiekin.
Bestela ere, Fagorrek %3 inguru garestituko ditu etxetresnak aurten, Poloniara eramango du gama apaleko produktu batzuen ekoizpena, eta Txinako plataforma erabiliko du lehengaietan dirutza aurrezteko.
Pablo Mongelos Fagor Etxetresnetako zuzendari nagusia «Aukera aparta daukagu gure balioak filialetan hedatzeko» Etxetresnen merkatuan tamainak berebiziko garrantzia daukala nabarmendu duzu. Multinazional bihurtzeak zer edo zertan aldatuko du Fagorren izaera kooperatibista? Kudeaketa parte-hartzaileagoa bultzatuko duzue, nolabait. Nazioartean ez diegu ez ikusiarena egingo gure ezaugarriei. Gure kultura ezarriko dugu eta, aldi berean, tokian tokikoa errespetatuko. Agian, Poloniako langileak ez dira sentituko Fagorreko kide %100ean. Beren gizarteari ekarpenak egiten dizkiogula senti dezakete, ordea. Brandt erosi izanak zertan egingo die mesede euskal langileei eta, oro har, euskal gizarteari? Atzerrian gero eta lantegi gehiago izateak gutxituko al ditu lanpostuak Euskal Herrian? Irabaziak eta enplegua uztartzea da gure konpromisoa. Dirutza inbertitzen ari gara hemengo lantegietan, eta enplegua sortzen segituko dugu, negozio esparru berrien bitartez, batik bat. Betiko lantegietan baino lanpostu gehiago sortuko ditugu enpresa berritzaileetan. Multinazionalak ohituta daude lantegiak ixtera. Gu ez, ordea. Fagorrek Espainian saltzen du etxetresna gehien. Zer irudi dauka? Espainiarrei galdetu beharko genieke. Dena den, guk zera diogu beti: Fagor Espainiako merkatuko marka liderra da. |
