Docutec
Lapurren artean bertsotan
Bertso-saioetan gai-jartzaileak bertsolariak ataka estuetan jartzen saiatzen dira. Kantariek asmatzen dute, ordea, edozein egoerari aurre egiten.
Irudia: bertsoa.eus
|
HIZTEGI LAGUNGARRIA Badauka ahulezia bat. Badauka gainditu ezineko joera bat. |
Ainhoa Comas Muguruza: Bai, zuek lapurrak zarete, eta espezialitatea daukazue bankuen lapurretan (lapurreta). Gaur ere bankura joan zarete, eta plana zera zen: Ametsek kutxan zegoen langilea entretenitu behar zuen, eta Sustraik, bitartean, aterako zuen dirua; baina Ametsek badauka ahulezia bat, eta da oso erraz maitemintzen dela. Orduan, Sustraik bere zatia egin du eta dirua atera du, baina, atera denean, hor zegoen Amets langilearekin hitz egiten: dagoeneko, ja egin du pentsio-plana, eta hipoteka bat sinatzen ari da.
Sustrai Colina:
Caja fuerte-tik igo
eta instantean
pentsio-plana firmatzen
zeunden bat-batean,
ta hipoteka sinatzen
eternitatean.
Nola konpontzen diren
lapurren artean!
Amets Arzallus:
Ustez aski hoztasun
ta aski zuhurtzi.
Ta hor ikusi dut bere
rimel eta guzi;
paperean, elkarri
behatzez igurtzi.
Segi lapurtzen, Sustrai!
Ni bakean utzi!
Sustrai Colina:
Nahiz ta gauza ederra
izan maitasuna,
ta zu erostear zauden
ezkonteraztuna.
Poliziak zai daude
kanpoan, laguna;
bizi-aseguru bat
da behar duguna.
Amets Arzallus:
Ai, beraz, poliziak
horko leihoan joz,
nahi baduzu ihes egin,
zaldiz edo mandoz.
Alperrik dabiltz gero
halako komandoz;
Zu ja bakarrik zaude,
ni aldatu naiz bandoz.
Sustrai Colina:
Beraz, bandoz aldatu
eta erregutzen,
zure fideltasuna
nahiz ta eredu zen.
Ni leihotik ihesi
nihoa, hain zuzen.
Zuk jarraitu ezazu
bihotzak lapurtzen.
Amets Arzallus:
Bai, ze kolpez hautsi dut
itsulapikoa.
Esan dit: Euriborra, interes-tipoa,
holako gauzak eta
horren lexikoa...
dena egin zait oso
erromantikoa.
Sustrai Colina:
Beraz, jarraitu zazu hain
sen liluragarriz,
zure begiak bere
eskutxoan jarriz.
Ni poteora noa,
poz eta alegriz.
Pobrearena egin
beharko dut berriz.
Amets Arzallus:
Lehenik, ziega batean
hartzazu atseden.
Nik ezkontza ondoren
pentsa ze astelehen!
Zu esposatuta ta ni
ezkonduta hemen.
Ea gu biotan zein
askatzen den lehen!
OHARRA: Ohikoa da bertsolariek hainbat lizentzia hartzea testua bertsoan sartu ahal izateko. Transkripzioak bertsolariek erabilitako moldea jaso da, gramatika- zein lexiko-arauak gorabehera.
