Docutec
Ablazioa
Hainbat herrialdetan ohitura zaharra omen den mutilazioaren berri emango digute, ikuspegi kritiko batetik.
27. zinta / 02:14:04
Aitziber Azkondo.- Badaude hainbat gauza inola ere ulertu ezin ditudanak. Ohiturak ongi; ohiturak gorde egin behar dira; kultura dira; gure iragana eta gure iraganagatik gara garen bezalakoak. Baina benetan dena gorde beharra dago? Askotan entzun izan ditugu kritika amorratuak zezenak direla-eta; ongi, ados, baina ablazioa ezin dut ulertu; ezin dut. Kultura ote da hori? Ze pertsona izan daiteke horrelako iraganarekin?. Ablazioa nola izan daiteke kultura eta ez krimena?
Berriemailea.- 132 milioi emakume mutilazio genitalaren biktima dira. Egunean 6000 bat emakumek jasan behar dute halako bortxakeria. Heriotza ere ekar dezakeen tradizio hori, immigrazioa dela-eta, mendebaldean ere zabaldu da .
Klitoria mozteko ohiturak lau mila urte ditu eta Afrikako kontinentean oso zabaldua dago. Emakumeek klitoria kendu ezean euren gizartearen barruan bazterturik gera daitezke.
A.A.- Ez dute anestesiarik erabiltzen eta emakumeak ezin du oihu egin, horrek familia desohoratu egingo luke-eta.
B.- Somalia eta Egipton, adibidez, emakumeen ehuneko 98 mutilatuak izan dira. Lau eta hamar urte bitarteko neskatoei egiten zaie ebakuntza. Ondorioak, heriotzara ekar dezaketen odol-jarioak eta infekzioak, haurrak izateko arazoak, antzutasuna, eta HIESa edo beste gaixotasun batzuk hartzeko arriskua, besteak beste. Mutilaturiko emakumeek izandako lau haurretatik bat malformazioren batekin jaiotzen da.
A.A.- Neskek lepoko bat eramaten dute ablazioa jasan duten sinbolo gisa.
B.- Ablazioa egiten duen emakumeak estatus berezia du gizartean. Ebakuntza baldintza mediku kaxkarretan egiten da ; inongo garbitasunik gabe eta laban batez edo beste edozein trena zorrotzez; bizarra kentzeko aizto batez edo beira zati batez, esaterako. Emakume askok beren alabak klitoria moztera bultzatzen dituzte, pentsatzen baitute hori egin gabe ezinezkoa izango zaiela etorkizunean haurrak izatea.
A.A.- Noraino heldu daiteke sinesmena?. Beharbada batzuek pentsatuko dute gu ez garela inor beste batzuen jarrera epaitzeko, baina nik uste horrelako gauza baten aurrean ez dagoela inolako zalantzarik: hori krimen bat da eta sinadurak bildu edo beste edozein ekintza egin behar bada horrelako ohiturak ezabatzeko, ba aurrera eta pentsa ezazu gutxi egin arren, badela zerbait.
