Aurkezlea: Estatu Batuetako farmazietan saltzen hasi zen digestiorako lagungarria zelako. Gaur egun, munduko bazter ia guztietan eskatu eta edaten da. Coca-Colak ehun eta hogei urte bete ditu.

Olga Zabalgogeaskoa esataria: Buruko mina kentzeko sirope berria salgai jarri zuten gaur 120 urte. Buruko mina kendu ezezik, burutik kendu ezineko marka asmatu zuten.

Gaztetasuna eta poztasunaren iturri, laster hedatu zen Atlantatik mundu osora. Bilbora ere 50eko hamarkadan etorri zen. Ordutik, munduko taberna, denda eta ia etxe guztietako ateak zabalik izan ditu. Botila, loga eta marketing-a batera doaz. Coca-Colaren historia iragarkiei lotuta dago, eta unean uneko izarrek markarekin bat egin izan dute.

Inoiz egin diren iragarkirik onenetarikoak edaria saltzeko egin dira. Sekretupean gordetako formulak emaitza ezin hobeak izan ditu, edateaz gain, ahoz aho dabilen edaria da.

OK hitza eta Coca-Cola dira aditu eta gehien esaten dutenak munduko hizkuntza guztietan.