35.1 Serafina+Ines

(Serafina telefonoz. Inesen ahotsa zentralean, zuzenean)

INES- Taxi onenak, esan?
SERAFINA- Señorita, mezu bat daukat Xantirentzat.
INES- Ba, ez dakit hartuko ote duen!
SERAFINA- Esaiozu (esan iezaziozu) orduerdi barru pelukeriatik pasatzeko nire bila.
INES- Nik, esan esango diot, baina egunotan arraro samar dabil eta...
SERAFINA- Aizu! Bere amarekin ari zara, e! Errespetu pixka bat!
INES- Errespetuz ari naiz! Azken egunotan ez du nire mezurik jaso nahi!  Barkatu! Taxi onenak? Momentu bat.
SERAFINA- Mutil onari izen txarra jartzeko deseatzen ibiltzen dira bakar batzuk! Arraro baldin badabil, izango ditu bere arrazoiak!
INES- Zer esaten ari zara?
SERAFINA- Eta jakingo duzu gauza onak ez direla tximinitik behera etortzen, ala?
INES- Bale! Nahikoa dugu, e?
SERAFINA- Inpertinentea halakoa!

35.2 Xanti+Ines

(Xanti autoan. Ines emisoratik)

INES- Zentrala 1777ri deika! 1777, mezu bat daukat zuretzat.
XANTI- Ai, printzesa, nire Mertxe! Emakumeak? Nola ulertu emakumeak? Nik deitzen badiot, latosoa, eta orain bera, jo eta ke, deitu eta deitu.
INES- Xanti, 1777, entzuten al duzu? 1777, Zentralera deitu! 1777, entzuten ari al zara?
XANTI- Ea zenbat aldiz deitzen duen! Bitartean eskua altxata dagoen gizonezko hori hartuko dugu, e. Hori da!
XANTI- (Autoa geratuko du bezero baten parean) Pasa, pasa, libre nago-eta.
XABIER- Eskerrik asko! Liburutegira, mesedez!
INES- Xanti, erantzuten ez baduzu, zuretzat kalte.
XANTI- E, Momentu bat, e, emisora itzaliko dut, bestela ez dit hizketan ere utziko-eta.

35.3 Xanti+Xabier

(Autoa barruan, abian)

XANTI- A zer inbidia! Horrela, astegunean liburutegira, e!
XABIER- Beno, badakizu edozeinentzat dago zabalik hura, e!
XANTI- Ja, ja, badakit, baina hori ez da hain erraza, e!
XABIER- Bai, ulertzen dizut. Ni ere, ez pentsa, ni ere lanera noa, e!
XANTI- Han idazten al duzu? Zer? Zer uste zenuen, ez zaitudala ezagutu ala?
XABIER- Beno, idaztera ez noa, e! Orain liburu baten aurkezpenera.
XANTI- A! Eta nola egiten da hori?
XABIER- Nola egiten den? Ba, begira, han idazleak eta argitaletxekoek liburua eramaten dute, eta kazetariei, ba, esplikatu egiten diete zertaz den, nolakoa den, eta horrelako gauzak.
XANTI- A, begira, begira! Horregatik jakiten dute gero hainbeste kazetariek!
XABIER- Bai, horixe, besteek esanda. Eta gero kazetariek, ba, gainontzeko guztiei, ba, kontatu egiten diete.
XANTI- Ja, ja. Eta, aizu, nik joaterik izango al nuke?
XABIER- Ba, zergatik ez, ba! Hura denentzat zabalik dago.
XANTI- Aizu, ba, igual egunen batean, e, ze, neri idazleen kontuak-eta asko gustatzen zaizkit eta...
XABIER- A, bai, e?
XANTI- Bai, bai, bai. Nik ere izango nuke makina bat kontu liburuetan jartzeko.
XABIER- A, badakizu zer egin behar duzun! Hori erraza da.
XANTI- Kita! Kita! Nik kontatu, eta beste batek apuntatu.
XABIER- Ba, orduan, badakizu zer egin behar duzun: idazleren bati kontatu zuk eta...
XANTI- Hori da! Eta zu zer, zer moduz zabiltza denboraz?
XABIER- Ba, oraintxe bertan ez daukat nik denbora gehiengi, baina... Gero Durangoko hori, badakizu, orain gertu daukagu.
XANTI- Bai, Durangoko feria.
XABIER- Bai, bai, baina... Feria edo azoka edo horrela esaten diogu. Abenduan, badakizu, abendu hasieran, baina, hori pasa eta gero, lasaixeago ibiliko naiz, e!
XANTI- Bai? Eta gero liburuan aterako al zenuke, e? Niri asko gustatzen zait leitzea gero, e!
XABIER- Gauza ederra da-eta!
XANTI- Beti eramaten dut hemen aurrean liburu bat. Orain ere... hemen behar du. Itxaron, itxaron pixka bat!
XABIER- Lasai, lasai, lasai, sinisten dizut, e!
XANTI- Ez da siniste kontua, ordea! Ea, hemen (Bozina hotsa kanpotik) Zer gertatzen zaik hiri, babalorea, e? Barkaidazu (barka iezadazu), baina batzuetan...
XABIER- Lasai, lasai, lasai.
XANTI- Hau ez gero kontatu zure liburuetan, e?
XABIER- Ez, ez, ez. Ez kezkatu. Badakizu, liburuetan kontatzen da nahi dena bakarrik.
XANTI- Bien, bien! Nik uste zuk eta nik lan polita egingo genukeela! Bai horixe! Tipo sinpatikoa ematen duzu, e!
XABIER- Eskerrik asko!
XANTI- Xanti, Xanti Irusta da nire izena. Apuntatu, nahi baduzu.

35.4 Serafina+Aintzane

(Ileapaindegian)

SERAFINA- Ene! Ui! Oso ondo, Aintzane! Oso egoki utzi didazu!
AINTZANE- Bai, ezta?
SERAFINA- Ai, baina noiz ez didazu zuk egoki uzten ilea?
AINTZANE- Ai, Serafina! Kontrakoa larriagoa izango litzateke! Ez zenuen, ba, ahaztuko pelukera naizenik!
SERAFINA- Ez horixe! Ez daukat ahazteko! Baina alde ederra dago batetik bestera!
AINTZANE- Iletik ilera adina!
SERAFINA- Oraintxe esan duzu!
AINTZANE- Xanti bila etortzekoa al duzu?
SERAFINA- Bai, deitu diot.
AINTZANE- Rebistaren bat nahi?
SERAFINA- Ai, estimatuko dizut, Aintzane. Etortzen den bitartean, ba...
AINTZANE- Eskumuinak eman nire partetik.
SERAFINA- Emango dizkiot, egon lasai! Edo zerorrek saludatu, bestela, etortzen denean. Ai, ba...
AINTZANE- Ikusiko dut lanez nola nabilen.

35.5 Xanti+Ines

(Xantik bezeroa utzi berri du. Atea entzungo dugu. Emisora piztuko du)

XANTI- Bale! Ea dena ondo joaten den! Bai, hitz egingo dugu, bai! Ai! Aber, ba! Aber, ba, Ines hemen ote zauden.
INES- 1777. Mezu hau 1777rentzat da. Honezkero ama pelukerian zain izango duzu!!!!
XANTI- Ines! Ines? 1777 zentralera hoska!
INES- Zer?
XANTI- Zer esan duzu?
INES- Honezkero ama pelukerian zain izango duzula!
XANTI- Kaguenlarrusia! Eta zergatik ez didazu, ba, lehenago esan?
INES- Xanti, batzutan... Barkatu! Momentu bat. Batzutan... Zenbat aldiz deitu dizut?
XANTI- Ja! Eta nik zer nekien zer mezu eman behar zenidan?
INES- Hori deituta jakiten da, ala? Ba, horixe da mezua!

35.6 Xanti+Aintzane

(Xanti arnasestuka sartuko da pelukerian)

XANTI- Iepa!
AINTZANE- Ai! Beranduegi, Xanti!
XANTI- Zer?
AINTZANE- Joan da!
XANTI- Meka... Jode! Gozoa jarriko zait!
AINTZANE- Jo, jarri da! Sunsunkorda bati buruz gaizki esaka alde egin du hemendik!
XANTI- Mekaguenzotz! Errua nirea izan da, e!
AINTZANE- Ai, gera zaitez arnasa itzuli arte, behinik behin!
XANTI- Jode!
AINTZANE- Ito egingo zara, gizona! Zerbait hartu nahi duzu?

35.7 Serafina+Ines

(Serafina telefonoz; Ines zentralean, zuzenean)

SERAFINA- Eta jakin ezazu hau ez dela horrela geratuko, e! Nire kexa ailegatuko da ailegatu behar duen lekura, e!
INES- Aizu, señora! Nik eman diot mezua!
SERAFINA- Jakin nahi nuke noiz eman diozun!
INES- Zuk deitu eta segituan hasi naiz, bale? Eta zure seme babalore horrek ez badu erantzun, berak jakingo du zer dabilen!
SERAFINA- Babalorea? Nire semea babalorea? Non da zuzendaria? Don Zeferinorekin hitz egin nahi dut segituan!!