42.1 Serafina+Feli

(Gela berdean. Espiritismo saioa)

FELI- Hemen baldin bazaude, azaldu zaitez!
(Aulki bat lurraren kontra joango da)
SERAFINA- Bera da, Feli! Beti bezain baldarra jarraitzen du!
FELI- Etzazu (ez ezazu) horrelakorik esan, Serafina! Haserretzen bada, ez da hobea izango!
SERAFINA- Gizon txikia, zalaparta handia!
FELI- Santiago, zure laguntza behar dugu.
SERAFINA- Beno, behar-behar...
FELI- Beno, Serafina, jarraitu nahi duzu ala ez?
SERAFINA- Ez dakit, ba, Feli, hildakoak bakean uztea hobea ez ote den.
FELI- Ale, ba, Santiago, amaitu dugu gaurkoz! Tira, ireki pertsiana!
(Pertsiana irekiko da)
FELI- Begira zer sinpatikoa! Laguntzeko prest dago, gainera!
SERAFINA- Garai ederrean hasi da laguntzen hau ere!

42.2 Xanti+M.Dolores+Ines

(Taxi barruan doaz)

M.DOLOR- Hau ordaindu egingo dizut, e, Xanti!
XANTI- Baita zera ere!
M.DOLOR- Aizu! Nik deitu dizut, eta niri dagokit ordaintzea!
XANTI- Bai, Maria Dolores, egon zaitez lasai.
M.DOLOR- Gauza bat da zuk zure borondate onarekin gu eraman eta ekarri egitea, baina...
XANTI- Baietz ba, baietz ba, Maria Dolores, egingo ditugula, ba, kontuak.
INES- Kanpoaldera doan bakarren bat? Inor bai hirigunetik kanpo?
M. DOLOR- Ikusten? Orain ere ni eramateagatik beste lanen bat galdu duzu.
XANTI- Maria Dolores, isilik ez bazara egoten, e, ezingo dut emisora entzun.
M. DOLOR- Tira, tira, barkatu, Xanti!
XANTI- Ines! Hemen, 1777, zentralera deika! Oraintxe noa zerbitzu batekin hirigunetik kanpora eta non behar duzu autoa?
INES- Zentro komertzialean
XANTI- Ondo da, ba! Berehala noa, e!
M. DOLOR- Ni utzi hementxe, Xanti. Inguratuko naiz oinez.
XANTI- Maria Dolores, nire etxera eramango zaitudala esan dut, eta nire etxera eramango zaitut, eta ez dut hitz erdi bat gehiago entzun nahi,e!
M. DOLOR- Beno, beno.
XANTI- Honbre!

42.3 Serafina+Feli

(Gela berdean jarraitzen dute)

FELI- Ez naiz haserretu, Serafina, ez naiz haserretu.
SERAFINA- Ai, erreparoa ematen dit, neska.
FELI- Baietz, ba, ulertzen dudala. Eta, gainera, Santiago dela jakinda, gehiago.
SERAFINA- Hori da. Beste edozein balitz, baina Santiago berriz hemen ibiltzea...
(Kaleko atea itxi da kolpe batez)
FELI- Hara! Begira! Joan egin dela uste dut.
SERAFINA- E, zer esaten ari zara?
FELI- Hori ez al zen kanpoko atea?
SERAFINA- Baietz uste dut.
FELI- Serafina, berriz ere zurbiltzen ari zara.
SERAFINA- Ai, inpresioa.
FELI- Joateko esan diogu eta joan egin da, eta listo! Ez dauka beste misteriorik!
(Pauso hotsak)
SERAFINA- Ei! Hemen dago, Feli! Ez al dituzu oinotsak entzuten! Ez da joan!
(Serafina erori egingo da)

42.4 Serafina+Feli+Xanti+M.Dolores

(Etxeko sukaldean daude)

XANTI- Zer, hobeto, ama, e?
SERAFINA- Bai, umea! Lasai egon!
XANTI- Eramango zaitut medikutara, e!
SERAFINA- Ezetz, ba, ez dela ezer.
XANTI- Jode! Tentsioa begiratu beharko zenuke.
SERAFINA- Atzo begiratu nuen, eta ondo neukan.
FELI- Inpresioa izan da, Xanti!
XANTI- Bai, ni ikusteak egin dion inpresioa, e?
M. DOLOR- Zu ikusteak ez dakit, ni ikusteak, beharbada!
XANTI- Mek... Ines!
M. DOLOR- Ines? Maria Dolores.
XANTI- Ai, esto, Maria Dolores! Ez, zera, Ines!

42.5 Xanti+Ines

(Zalapartaka taxian sartzen entzungo dugu Xanti)

XANTI- Ines! Ines! Hemen 1777, hemen Xanti! Zentrala?
INES- Jakin al liteke non sartu zaren, Xanti?
XANTI- Esplikatuko dizut, Ines, baina ezin naiz joan, e!
INES- Konturatuta nago.
XANTI- Bidaltzazu (bidal ezazu) besteren bat.
INES- Bale, tio!
XANTI- Bar... barkatu, e, Ines, baina etxera etorri naiz eta ama ondoezik zegoen eta...
INES- Laguntzarik behar?
XANTI- Ez, ez, ez, eskerrik asko, Ines. E... pasa da, pasa da, e, baina oraingoz ezin joango naiz.

42.6 Serafina+Feli+M.Dolores+Xanti

(Sukaldean jarraitzen dute)

FELI- Zer txorakeria klase da hori, Maria Dolores? Zuk inpresionatu Serafina! Besterik ez genuen behar!
M.DOLOR- Ez, nola ez ninduzuen espero. Garbi dago ez ninduzuela espero. Zuek biok bakarrik zaudete hemen.
SERAFINA- Ez gaizki hartu, Maria Dolores.
FELI- Utziozu (utz iezaziozu), Serafina! Era guztietara ere gaizki hartuko du.
M.DOLOR- Eta azaldu naizenean, ondoezak eman dizu.
SERAFINA- Ez dizut deitu, Maria Dolores, ba, zera, badakizu. Beste horretan aritzekoak ginen, eta nola esan zenuen zuk ez zenuela aritu nahi, ba, pentsatu dugu...
(Edalontzi bat bat eroriko da lurrera eta txikitu)
FELI- Zer zabiltza?
M.DOLOR- Ni ez naiz izan.
SERAFINA- "Ni pekatari" ez du honek ikasi oraindik.
(Orain platera erori eta txikituko da)
SERAFINA- Aiiii!
FELI- Ix... Serafina, Maria Dolores, uste dut Santiago zerbait esan nahiean ari zaigula. Iruditzen zait ez duela joan nahi. Ezta, Santiago? Ez duzu joan nahi. Gurekin geratu nahi duzu!
(Iturria ireki eta itxi egingo da)
SERAFINA- Aiii! Gurutzetako ama!
XANTI- (Sukaldera sartuko da) Beno, beno, nahi-nahi. Ondo zaudetela esaten badidazue, lasai joango naiz, e, baina... Señorak, zer gertatzen zaizue? Zergatik begiratzen didazue horrela, e? Eta nork egin du txikizio hau?