KIKE AMONARRIZ

Euskaraz ez dakiten arren, eta beharbada horregatik, seme-alabak D ereduan matrikulatu dituzte. Haurren hezkuntzak, ordea, kezkatu egiten ditu eta beraiek, haurren ikas-prozesua jarraitu egin nahi dute eta lagundu. Baina ez dakite euskaraz edo gutxi dakite eta egoera honek zalantza ugari sortzen dizkie; etxeko lanetan nola lagundu, dakiten apurra erabili ala ez, nola lortu haurrek euskaraz egin dezaten...

Nola motibatu?

- Arreta erakutsiz eta seme-alaben ikasketa prozesuan lagunduz.

- Beren ahalegina baloratuz eta zorionduz.

- Beraiekin batera ikasiz eta beren "ikasle" bihurtuz.

- Etxeko erabilera pasiboa bermatuz: zaintzaileak, musika, telebista, liburuak...

- Irakurketarako ohitura sistematizatuz.

- Euskarazko ekintza eta jardueretan esku har dezaten bermatuz.

Etxeko lanak

- Etxeko lanen helburu nagusia ikasteko ohiturak sortzea eta eskolan ikasi dutena barneratzea da.

- Etxeko lanak haurrek egin behar dituzte. Gurasoek lagundu besterik ez, eta norberak ahal dezakeen neurrian, noski.

- Guraso euskaldun askok ere ulermen arazoak ditu, euskarak bizi izan duen egoerarengatik. Askotan soluzioak berdintsuak dira: hiztegiak, itzulpenak...

- Edukiak landu behar direnean gurasoek dakiten hizkuntzan azalduko dituzte eta ondoren haurrak euskarara egokituko ditu.

- Ikasitakoaren errepasoa egin behar denean, paragrafoak, marrazkiak, letra belztuak, eta abar lagungarri gerta daitezke euskara ez dakienarentzat.

- Zalantzak edo kezkak tutoreekin kontsultatu.