Poliki-poliki aterik jo gabe gu guztion etxeetan sartu zen. Aurretik, irratia eta egunkariak ere baziren, baina etxean zer toki hartu duen ikusi besterik ez dago, telebistaren garrantziaz ohartzeko. Egongelan egongo da ziur asko (askorentzat etxeko gelarik garrantzitsuenean), eta besaulkiak bere baitan antolatuta egongo dira, toki guztietatik ongi ikusteko moduan.

Egongelaren antolamendua telebistaren baitan egiten da (Argazkia: Emily May).

Duela 60 urte, gure aitona-amonen bizimoduan ez zegoen egongelarik. Etxean zeudenean, sukaldean edo logelan egoten ziren, bazkaltzen edo lotan. Ez zegoen, “egongela” hitzak ongi dioen moduan, egoteko bakarrik balio zuen lekurik, ez baitzuten horretarako astirik izaten. Baina gaur egungo bizimodua guztiz aldatu da. Etxean denbora asko pasatzen dugu, eta gaur egungo herri-hirietako bizilekuetan ez dago lehengo baserrietan adina lan. Beraz, egongelak zentzua du eta etxebizitza askotan egongela baten faltan, bi ere izango dira. Gela horietan normalean telebista, armairu bat, besaulkiak eta mahaitxo bat egoten dira. Familia bakoitzak bere modura, bere estilora eta bere gustura izango du, baina denetan antzeko banaketa izaten du. Telebista armairuaren gainean izaten da, edo horman eskegita, eta hari begira egoten dira bai mahaitxoa eta bai besaulkiak ere. Etxeko seniderik fidelena da, beraz, telebista.

 Gaur egungo telebista ordenagailua ere bada.

    Hala ere, badirudi gero eta telebista gutxiago daudela gure etxeetan. Nielsen kontsultoraren arabera, bi arrazoi nagusi daude: batetik, pobrezia; gaur egungo krisi-egoera dela medio, familia askok ezin dituzte aparatu digital eta antena berriak eskuratu, eta, beraz, pixkanaka telebistak gutxitzen ari dira familia horietan; eta, bestetik, azken urteetan sortu den Internet erabiltzeko ohitura dago. Gazte gehienek, independizatzerakoan, telebista propioa ez erostea erabakitzen dute eta Internetekin moldatzen dira; izan ere, Interneten bertan baitago telebistan dagoena. Beraz, ordenagailua eta Internetekin telebistako edukiak ikus ditzakegu eta pixkanaka-pixkanaka ordenagailua telebistari urteetan izan duen lekua kentzen ari zaio.
   
    22 laguni galdetu diegu ea zenbat telebista eta ordenagailu (Interneteko sarrerarekin) dituzten. Lehenengo galdera telebista-kopuruarena izan da. 22tik bakarrak esan du ez duela telebistarik, zehazki etxetik kanpo ikasle-pisu batean bizi denak. 8k telebista bakarra daukate, horietatik gehienak 25 urtetik gorako pertsonak dira eta ez dira gurasoen etxean bizi. 22tik 10ek bi telebista dituzte, eta 10 horietatik 8 familiak dira. Eta azkenik, 3 pertsonak soilik esan digute lau, bost edo sei telebista dituztela beraien etxeetan. Beraz, ia etxe guztietan telebista bat edo bi izan ohi ditugu.
   
    Ordenagailuen kasuan, berriz, 22tik bik bakarrik ez dute ordenagailurik, 85 urtetik gorako bi andrek. Beste lagun guztiek badute ordenagailua, % 70ek bere ordenagailu propioa dauka eta bi kideren artean partekatzen dute ordenagailua gainerakoek.

    22 lagun horietako hiru gazteri galdera gehiago egin dizkizkiegu. Zehazki Ioar Tainta lesakarrari, Izaro Toledo oiartzuarrari eta Nerea Mandiola markina-xemeindarrari.
   
    Ioarrek esan digu 3 pertsona bizi direla bere etxean, ama, aita eta bera, eta bi telebista dituztela etxeko bi egongeletan. Berak ohitura handia du telebista ikusteko. Goenkale, Hitzetik Hortzera eta “La que se avecina” saioak ikusten ditu. Bere etxean telebista-mandoa normalean aitak izaten duela kontatu digu eta orduan beste egongelara joaten da. Izan ere, ama eta biak gustu antzekoak omen dituzte eta aitak, aldiz, ez. Baina Internet edo telebista erabakitzeko orduan, Ioarrek Internet nahiago duela esan digu, entretenitzeko baliabiderik onena dela ziurtatu digu.
   
    Izaroren familian 4 kide dira, gurasoak, anaia eta bera. Beraiek ere bi telebista dituzte, baina bata sukaldean eta bestea anaiaren logelan. Mandoari dagokionez, Izarok garbi esan du bere etxean ere gizonezkoek izaten dutela normalean haren kontrola, amak eta berak ez daukatelako ohiturarik telebista gehiegi ikusteko. Izarok, esaterako, telebista ingelesa ikasteko ikusten du, filma jatorrizko hizkuntzan jarri eta ingelesera praktikatzeko. Gainera, Izarok dio gaur egun Internetek telebistak daukan guztia daukala eta, beraz, nahi dugunean interesatzen zaigun hori ikusteko aukera dugula. Hortaz, Izarok ere telebista baino askoz ere nahiago du Internet.
   
    Nerearen etxean 6 pertsona bizi dira, gurasoak eta lau neba-arreba. Bi telebista dituzte, egongela handi batean bat eta gelatxo txiki batean bestea. Mandiolatarren etxean ere normalean mandoa aitak kontrolatzen du eta berak telebistarik ia ez duela ikusten kontatu digu, ez zaiolako batere gustatzen izaten den programazioa. Nereak ez du zalantzarik Internet edo telebista aukeratzeko orduan: zalantzarik gabe Internet nahiago du, Interneten ikasi eta entretenitu bi gauzak egin ditzakegula defendatzen baitu.
   
    Eta zuk, zenbat telebista dituzu etxean eta non? Nork kontrolatzen du mandoa gehienetan? Eta zer nahiago duzu, Internet ala telebista?