irakurgai-mailakatuak-fitxa
L.A.A
Indarkeria matxista du ardatz Zugastiren 'L.A.A.' nobelak. Donostian kokaturiko thriller psikologiko honek egileari jazotako gertaera hunkigarri batzuk ditu abiapuntu.
Egilea: Maixa Zugasti
Argitalpena: Algaida
Argitalpen-urtea: 2017
Maria espetxeko psikologoa da eta bertan ezagutuko du Luis. Harremanak jarraitu egingo du espetxetik kanpo. Eta kanpoan Luisi laguntzen saiatuko da Maria, baina honek ez dio lana asko erraztuko.
Benetako gertakari batean dago oinarrituta nobela hau. Izan ere, orain dela urte batzuk L.A.A. emakumeak telefonoz deitu zion Maixa Zugasti idazleari. Emakumea jipoitu egin zuen senarrak, eta Zugastik aurrez aurre ikusi zuen biktima, orbanez josia. Zugastik XLII. Irun Hiriko Kutxa Literatura Saria jaso zuen nobela honengatik.
Hona pasarte bat:
Etxera sartu bezain laster, ordenagailuaren aurrean eseri nintzen oinetako bustiak erantzi gabe, ilea tantaka nuela. Google-en “Luis Andueza Abasolo” idatzi nuen, azken egunetako mugimendu errepikakorrez. Ordenagailuko karpeta batean jasoak nituen kasuaren inguruan prentsa digitalean agertutako albiste urriak.
(91. or.)
