Jon.- Neka-neka eginda nago, e!

Jone.- Paliza ederra hartu dugu, Jon, e?

Jon.- Beno, baina atzokoa kenduta, motorra ondo portatu da, e?

Jone.- Atzokoa kenduta bai. Baneukan etxera bueltatzeko gogoa, e?

Jon.- Bai? Benetan?

Jone.- Bai, beti pasatzen zait, etxean nagoenean bidaia bat egiteko prest nago beti, eta bidaiatzen dudanean etxera bueltatu nahi dut.

Jon.- Horrek oso ondo erakusten du nolakoa zaren, Jone.

Jone.- Eta nolakoa naiz ba?

Jon.- Haize-orratzen modukoa.

Jone.- Eta zer da haize-orratza?

Jon.- Aizu, zuk arkitektura ikasi duzu? Benetan?

Jone.- Zer da haize-orratz bat, Jon?

Jon.- Baserri teilatuetan ikusiko zenuen inoiz metalezko oilar bat, ezta, norabideak markatzen dituena, badakizu, Iparra, Hegoa...

Jone.- Baietz, badakidala.

Jon.- Beno, ba horixe zara zu, haizeak nondik jo, oilarra hara begira.

Jone.- Eta hori txarra da?

Jon.- Nik ez dut halakorik esan, e, nik haize-orratzen modukoa zarela esan dizut.

Jone.- Ba orduan zu baserriko tximinien modukoa zara: harria legez egoskorra, laukia kanpotik eta beltza barrutik.

Jon.- Badakizu zer? Afaldu aurretik dutxatu egingo naiz.

Jone.- A, ba ni zeurekin, horrela lehenago amaituko dugu.

Jon.- Eta gainera ura aurreztuko dugu.

Jone.- Hori da, hori da, gu beti izan gara oso ekologistak, derrigorrezkoa beharko luke bikotea batera dutxatzeak, ezta, Jon, ura aurkezteko baino ez bada...

Jon.- Badakizu? Behingoz ados gaude.

Jone.- E, baina ez ezazu dutxan txizarik egin.

Jone.- Jon, bizkarrean xaboia emango didazu? Horrela, horrela, eta igurtzi, e? Zer ondo! Pixka bat gora, gora, lepo parean.

Jon.- Hemen?

Jone.- Ez, ez, apur bat gorago, hor, hor. Zer ondo, pixka bat fuerteago.

Jon.- Beno, baina gero zuk niri, e?

Jone.- Bai, baina segi, e?

Jon.- Masaje saio horrekin ez dut uste urik aurreztu dugunik guk, e?

Jone.- Ez da hainbesterako izango.

Jon.- Ezetz? Begira nire behatzak, mahaspasen moduan geratu zaizkit.

Jone.- Ba pentsa bi bakarrik garela. Seme-alabak eduki ezkero...

Jon.- E?

Jone.- Askoz ere ur gehiago gastatuko genukeela.

Jon.- Eta hori ez da ekologikoa, e?

Jone.- Zer?

Jon.- Ura gastatzea.

Jone.- Ah, uste nuen seme-alabak edukitzeaz ari zinela. Nerbioso ipintzen hasi zara.

Jon.- Nor, ni?

Jone.- Bai, gauza horietaz hitz egiten hasten garenean urduri ipintzen zara.

Jon.- Keba, keba.

Jone.- Biharko despertadorea ipini duzu?

Jon.- Bai, Bai.

Jone.- Zuk, Jon, zer nahiago zenuke, mutila edo neska?

Jon.- Lo nago.

Jone.- Bai, hori, hori, lo hartu.

Jon.- Jone!

Jone.- Zer?

Jon.- Berdin zaidala esan behar nizun, baina nik uste nahiago nukeela neska.