Hiztegi lagungarria

Anabasa. Nahaspila, ordenarik gabea. Adibidez: Umeok, a ze anabasa! Txukundu gela eta jaso jostailuak dena txukun-txukun utzi arte!

Baratza. Edo baratze, ortua. Lur-zati ez handia, jateko landareak hazteko. Adibidez: Baratzak porruak ematen ditu, tipulak, marrubiak... denetik. 

Berrerabili. Berriz erabili. Adibidez:  Normalean ahizpa txikiak zaharrenaren arropak berrabiltzen ditu.

Bilbon behar du. Ia seguru Bilbon dela. Adibidez: Autobusa aspaldi abiatu da Gasteiztik, eta honez gero, Bilbon behar du.

Bukatu berria. Bukatu zaharra ez, orain dela gutxi bukatua. Adibidez: Idazleak bukatu berria du bere azken poema liburua. 

Elkarri diosala egin. Elkarri kaixo esan, agur egin. Adibidez: Mendizaleek elkarri diosala egiten diote mendian, nahiz ezezagunak izan.

Gotikoen zakuan. Gotikoen sailean, atalean, alorrean. Adibidez: Josuk aurpegi zuritua eramaten du, beltzez janzten da, eta ezpainak eta azazkalak ere beltzez margotuta eramaten ditu. Gotikoen zakuan sartzeko, nahikoa!

Irizpide. Zerbait epaitzeko araua. Adibidez: Saskibaloian bi epaile daude, eta jokaldi bat desberdin epaitzen badute, epaile nagusiaren irizpideak balio du. 

Neure burua ez dut hippytzat hartzen. Neure burua ez dut uste hippya denik. Adibidez: Neure burua ez dut hippytzat hartzen estetika aldetik. Jarrera aldetik, agian, bai.

Tira! Beno! Adibidez: - Miren, ordubete atzeratuko dugu afaria? - Tira, ados.

Zaletasun. Afizioa. Adibidez: Jende askok bere zaletasuna lanbide bihurtu nahi du.

Zorri. Intsektu parasitoa, buru-zorria. Adibidez: Tximuek elkarri zorriak kentzeko ohitura dute.

Zuen tankera(tsu)koa. Zuen antzekoa (gutxi gorabehera). Adibidez: Olatz izan zen koadrilan sartu zen azkena, baina zuen tankeratsukoa al zen arropa kontuetan?