Hiztegi lagungarria

Ararteko.- Euskadiko Herriaren Defendatzailea edo Ombudsmana da. Arartekoa Eusko Legebiltzarrak pertsonen eskubideak babesteko duen goi ordezkaria da. Adibidez: Bizilagunek Arartekoarengana jo dute arazo hori konpontzeko. 

Agerpena. Agertzeko ekintza, zerbait bistaratu. Adibidez: Zenbaitek ez du ontzat ematen homosexualen arteko maitasun-agerpena.

Etorkin. Bertakoen ikuspuntutik kanpotik datorren pertsona. Adibidez: Gaur egun etorkin asko dabil gure aiton-amonak zaintzen.

Gainbehera egin. Goitik behera egin, ahuldu. Adibidez: Batzuek esaten dute familia tradizionalaren ikuspegia gainbehera doala.

Kili-kolo. Zalantzaz beterikoa, hala moduzkoa, gorabeheratsua. Adibidez: Saskibaloi-talde hori kili-kolo dabil, ondo hasi zen urte hasieran, baina jarraipen oso gorabeheratsua izan du. 

Lurrundu. Metaforikoki, lausotu, difuminatu. Adibidez: Jakintsuaren iritzi sendo hori, urteak joan ondoren, lurrundu egin da.

Ikuspegia. Ikusteko moldea, modua. Adibidez: Eztabaida hori ez duzu konponduko ikuspegi bakarretik begiratuta.

Onarpena. Onartzea, ontzat ematea. Adibidez: Ama, eskolan esan didate txangora joateko gurasoen onarpen idatzia behar dudala.

Jarrera. Jokaera, jokabidea, portaera. Adibidez: Ez du entzuten berea besterik, ez du ikusten berea besterik, eta jarrera itsu horrekin ez da harritzekoa bakarrik gelditzea. 

Laxatu. Lasaitu, sosegatu. Adibidez: Eskola horretan sartzeko baldintzak laxatu egin dira, orain ez dira hain gogorrak.