Imanol Perez de Albeniz (Gasteiz, 1999) ilusionista eta bigarren batxilergoko ikaslea da. Mago gisa, D´Albeniz izen artistikoa erabiltzen du eta berentzat magia “bizitzeko modu bat da”. Egunero, eskolatik itzultzean, hiruzpalau ordu ematen ditu bere trukoak entsegatzen. Imanolek gaztea bada ere, hainbat sari irabazi ditu: Granadako Magiako bigarren saria, Frantziako Magiako hirugarrena, eta Europakoan ere, hirugarrena. Guztiak karten manipulazioan, hori baita bere espezialitatea. Gasteizen bere talentuaz gozatzeko aukera izan dugu.

1.    Zer da magia zuretzat? Noiz erabaki zenuen mago izatea?
Niretzat magia bizitzeko modu bat da. Besteek hemen mahai bat ikusten dute, baina nik ideia bat ikusten dut. Nire aita ere magoa da. Horregatik, txikitatik Gasteizko Magialdiara joan izan naiz, niretzat Europako festibalik onena. Ikusle nintzenean, hori egin nahi nuela pentsatzen nuen, ziur nengoen; lan egin dut eta urteekin lortu dut. 6 urte nituenean hasi nintzen aitarekin eta 14 urterekin serio hartu nuen, gaur arte.

2.    Nondik datorkio aitari mago joera hori?
Nire aitak 30 urte zituenean, lagun batekMagialdiara gonbidatu zuen, zer zen ikustera. Nire aitak mago-ibilbidea hasi zuen eta bere lagunak, berriz, alde batera utzi zuen.

3.    Nola sortu zen magia edo lehenengo magoa?
Antzina magoek jendeari ziria sartzen zioten: dirua lortzeko, magia beltza egiteko… Beranduago, magia antzokira heldu zen, ikuskizun bat izatera eta, gaur egun, truko bat bezala hartzen da.

4.    Magia adin guztietako jendearentzat da aproposa?
Bai, noski. Umeei asko gustatzen zaie eta helduei ere bai, gaztarora eramaten ditugulako magiaren bidez. Beste batzuk trukoa bilatzen saiatzen dira. Horien aurrean ezin dugu ezer egin. Nire ustez, gozatzen ez badute, ez dute magia ikustera joan behar.

5.    Zure ustez, zein herrialdetakoak dira magorik onenak?
Azken hamarkadan, espainiar estatuak eman ditu mago gehien, baina Txina eta asiar herrialdeak kontuan hartu gabe, haiek oso onak baitira kategoria gehienetan. Espainiak kartomagia eta gertuko magian ditu magorik onenak, batez ere.

6.    Euskaldunoi magia gustatzen zaigu? Zein motatakoa? Zergatik?
Nik baietz uste dut. Euskal Herrian festibal asko daude: Eibarren, Gasteizen, Bilbon… Jendeak interesa duelako. Nik karten manipulazioa egiten dut eta, agian, umeei beste zerbait gehiago gustatzen zaie, baina helduek dena atsegin dutela iruditzen zait.

7.    Zer eduki behar du mago batek? Eta zu, zerk bereizten zaitu?
Mago batek ilusionatzeko eta besteei zerbait emateko gogoa eduki behar du. Ni agertokiaren gainean eroso nago; horrela sentitzen naiz. Nire ustez, magoak naturaltasunez egin behar du, horrek axola du.

8.    Nolako trukoak egiten dituzu?
Ni karta-manipulatzailea naiz: horiek agertzea eta desagertzea da nire ikuskizuna. Modalitate hau Eszenatokiko Magia kategoriaren barruan dago, baina ez manipulazioa bakarrik: Magia Orokorra (animaliekin edo gauzekin sortutako magia) eta Ilusio Handiak (norbait kutxa batean sartu eta ezpatak sartzea, adibidez) ere bai.
Bestalde, Gertuko Magiak ere hainbat alor biltzen ditu: Mikromagia (txanponekin eta gauza txikiekin egindakoa), Kartomagia (ikuslearengandik gertu, baina kartekin) eta Mentalismoa (pentsamenduekin jokatzea). Orokorrean, hori da sailkapena.

9.    Hainbat sari irabazi dituzu: Granadan bigarren saria; Frantzian hirugarrena, eta Europa mailan ere hirugarrena, duela gutxi… Zer izan dira sari horiek zure lan-ibilbidean?
Hori ez nuen espero eta nire adinarekin oraindik gutxiago. Nik aita etxean ikusten nuen eta zaila zen pentsatzea ona nintzela, ohituta geundelako magia egin eta ikustera. Gero, kalera atera eta hori esan zidaten “maila handia duzu”, eta jendea ni ezagutzen hasi da… Etxetik ateratzen naiz eta lana eskaintzen didate. Abenduan, adibidez, Alemaniara joango naiz nire bikotekidearekin. Bertan, bi pieza egingo ditugu: biok elkarrekin egiten duguna eta karten manipulazioa. Gainera, Ingalaterrara eta Frantziara ere eraman nau magiak.

10.    Europako hirugarrena geratu zinen. Nolakoa izan zen egun hura?
Ikaragarria izan zen; ezin dut azaldu. Kategoria horretan esperientzia handiko magoak zeuden, adinean ez baitago mugarik eta nik 17 urte bakarrik nituen. Ez genuen espero eta ikaragarria izan zen.

11.    Eta une honetan, zer duzu eskuartean?
Nire bikotekidearekin pieza berri bat sortu dut, ilusio handien kategoriakoa. Horrez gain, Jaiki dantza taldearekin ‘Ilusioaren doinua’ ikuskizuna estrenatu genuen duela hilabete Agurainen. Azkenik, nire manipulazioko pieza ere lantzen ari naiz. Beraz, lanpetuta nago.

12.    Nor da zure idoloa?
Nire aitaz gain, Eduardo Galeano argentinarra, bera da manipulatzaileen maisua. Nire lagun baten bidez ezagutu nuen, eta nire irakaslea izan zen bi urtez. Berak irakatsitakoa nire kabuz landu dut.