Aldizkari Digitala
Miquel Navarroren eskulturak Kubo-Kutxan
Valentziako artistaren lanak ikusteko aukera dago maiatzaren 21era arte.
“Eskulturak hirirako egiten nituenean
inoiz ez nuen bertako arkitekturaren azterketarik egiten.
Lehendabizi eskultura sortzen nuen, ondoren marrazkia.
Ezohiko jarduera nuen”
Miquel Navarro
Miquel Navarro Mislatan, Valentzian jaio zen 1945. urtean. Valentziako Arte Ederren Eskolan marrazkia, pintura eta akuarela landu zituen. 1970. urtean buztinezko eskulturak lantzen hasi zen, eskuekin materialak ukitzea gustatzen zitzaiolako.
Miquel Navarro kultura mediterraneoaren oinordekoa sentitzen da. Levantekoak aspaldian hasi ziren buztina lantzen. Herriko umeek jolaseko tresnak eta itsasontzi txikiak buztinarekin egin ohi zituzten. Ez da harritzekoa, beraz, bertako artisten lehengaia buztina izatea. Nabarrok egindako oihal-ontzi urdina da horren adibidea. Berak dioen bezala, sormen lan hauek zerikusi handia dute bere haurtzaroko oroimenekin. Bere lehen eskulturak gauzatzeko buztinaz baliatu bazen ere, ondorengo urteetan bere lanak material trinkoagoekin egin ditu: burdina, altzairua, zinka, terrakota, aluminioa...
La ciudad roja, 1994-1995
Navarroren artelanak munduko museo eta galeria askotan banatuta daude. 1970eko hamarkadan, pieza txikiz osatutako "hiriak" egiten hasi zen. 1972. urtean Oviedon, Madrilen eta Sevillan erakutsi zituen. Urtebete geroago "Ciutat" deituriko erakusketa egin zuen Valentzian. Ondoren New York, Florentzia eta Parisko galerietan zabaldu zizkioten ateak. 1986. urtean Espainiako Arte Plastikoen Sari Nazionala jaso zuen. Urte berean Veneziako Bienalerako aukeratua izan zen.
Kubo-Kutxako erakusketan hiru hiri-mota daude ikusgai: "La Ciutat" (l985), "Hiri Gorria" (1995) eta "Harresi artean" (2000). Artelan hauek jolas artistiko hutsak direla dio Navarrok. Etxeak, lantegiak, enparantzak, auzoak... ehunka piezekin osatuak, taldekatuak eta lurrean horizontalean kokatuta daude. Hiri hauek babeslekuak dira eta beraien esanahia sinbolikoa da.
Miquel Navarroren eskulturak bere burutazio, amets, kontraesan eta kezken isla dira. Gehienak aluminioz edo altzairuz egindakoak. Eskulturen neurria bere lengoaia artistikoarekin bat dator. Buztinez egindako gerlari mutilatuak, zakilak, bulbak eta zentzu falikoa duten irudiak txikiak dira, buztinez edo terrakotaz daude gauzatuak. Handiak, berriz, kale edo plazen espazioari egokituta.
Miquel Navarroren erakusketa maiatzaren 21era arte egongo da ikusgai Kubo-Kutxaren aretoan.
Juanjo Dorronsoro
