Liburuak Joseba Sarrionandiaren obraren inguruko ikuspegi sakona eskaintzen du, bederatzi artikuluren bidez egilearen bizitza eta literaturgintza uztartuz. Lanak gai ugari jorratzen ditu, hala nola berridazketa, itzulpenaren eragina, sinbolismoa eta Haur eta Gazte Literatura, ikuspegi akademiko zorrotza eta tonu pertsonala uztartuz. Helburua idazlearen obra modu integralean irakurtzeko aukera ematea da, ikerketa zientifikoari ekarpen esanguratsua eginez eta irakurle ororentzat eskuragarri bihurtuz.

Lan honek Luis Pepe Stinusen bildumako postal zaharren aukeraketa biltzen du, eta duela mende bat baino gehiagoko hirian zehar bidaia egiteko aukera ematen du. Irudiek Donostiako txoko enblematikoak erakusten dituzte: Foruen Pasealekua, antzinako Zurriolako Plaza, Gran Kursaal, hondartzak, portua eta hiria inguratzen duten mendialdeak.

Erizaintzako Graduan pertsonei zainketak ematen irakasten da. Zainketen beharrak sortzen badira, pertsonek berek (paziente, gaixo edo erabiltzaileek berek) hartzen dituzte zaintzen ardurak, ezagutza, indarra eta borondate nahikoa dutenean. Hala ere, beste hainbatetan erizainen laguntza behar izaten dute beren osasun-beharrak asetzeko. Zainketa horiek emateak ezagutzak eta trebezia eskatzen ditu ezinbestean.

Liburu honetan erizaintzako oinarrizko zainketak lantzen dira: haien artean, mikroorganismoak ez barreiatzeko neurriak, higiene pertsonala, bizi-konstanteak, botiken ematea, laginen jasotzea, larruazalaren zainketak eta lehen sorospenak. Guztiak oso gai garrantzitsuak dira pertsonaren ongizatea eta segurtasuna bermatzeko.

Lugoko hegoaldeko lurralde gogorra da Caurel. Hango baso eta larreetako fauna eta flora bereziak dira. Mendizerretan, oraindik ere, arranoak hegan ikus daitezke, eta baso itxi eta ilunetan otsoen ulua entzuten da. Hantxe kokatu zuen Folek dorretxe eder antzinako bat. Negua da, gaztaina sasoia amaitzear dago, Abrantes etxeko ugazabak etxera itzuli dira. Mendizerran ehizan egitera etorri dira, baina elurte handi baten ondorioz, ezin izan dira mendira atera, eta etxe barruan geratu behar izan dute ugazabek zein zerbitzariek. Denak beheko su handi baten inguruan eserita daude. Kontu-kontari hasi dira beldurrezko ipuinak esaten eta, ezerezetik, sorginak, otsoak eta mamuak ateratzen hasi dira. Kanpoan, elur-malutak leihoen kristalen kontra joka ari dira, haize indartsuak ekarrita. Horixe da Kriseiluaren argipean liburuaren abiapuntua. Sutondoko ipuinen bilduma egiteko aitzakia. Anxel Folek hautemateko ahalmen izugarria eta jakin-min aseezina erakusten ditu. Ipuin horietako batzuk idazleak berak entzundakoak dira eta, gero, edukiaren mamia eta esatearen sena errespetatuz, Lugoko taberna edo kafetegi bateko txokoren batean eskuz idatzitakoak. Beste batzuk, ordea, Folek berak asmatutakoak dira, agian, interesgarrienak literatura aldetik.

Narruzko uztai txindaduna eskuartean hartuta bazter guztiak astindu zituen panderojole nekaezina izan zen Romualda Zuloaga. Hura lako gutxi ikusten zen sasoian bidea gura barik egin zuen aparteko koplaria. Musikari nekaezina, euskal kulturarentzako urterik latzenetan trikitixa atzerrian erakustera heldu zena. Herri-kulturarenganako zeukan grinak oraindik gogoratzekoak diren irri eta animoak eragiten zizkion. Panderoaren bizipoza zen Romualda.

Kultura euskaraz egiteko apostua. Ezkultura arrapostuka. Euskal kulturaren aurrekari penalen errepasoa, orainaldia ulertzeko. Puzzle bat, nahiago bada. Hauexek piezak: Kepa Akixo Zigor (artista plastikoa), Xabier Amuriza (bertsolaria, idazlea), Yolanda Arrieta (idazlea), Klara Badiola (aktorea), Itxaro Borda (idazlea), Mixel Ducau (musikaria), Andoni Egaña (bertsolaria, idazlea), Dani Fano (komikilaria, irudigilea), Asun Garikano (itzultzailea, idazlea), Edorta Jimenez (idazlea), Mikel Martinez (aktorea), Miren Agur Meabe (idazlea), Xabier Olarra (itziltzailea), Joseba Tapia (musikaria), Mizel Theret (dantzaria, koreografoa) eta Arantxa Urretabizkaia (idazlea). Hamasei kulturgile, euskal kulturaren mende erdi luzeko bilakaeraren lekukotza zuzena eskainiz.

Artziniegako bihotzean, ezer ez da dirudiena. Uda honetan, Maiak ez ditu oporrak Bilbon igaroko: amamaren eta aitititeren baserrira bidali dute. Han, mendien eta kondairen artean ezkutatuta, gauza arraroak gertatzen hasiko dira. Gauez, kolpeak entzuten dira ganbaratik; haizeak izenak xuxurlatzen ditu eta giltza zahar batek bere barruan magia gordetzen duela dirudi. Nor dago ganbaran? Eta zer erlazio dute baserriko gauza arraro guztiek basoko izaki misteriotsuekin (Inguma, Lamia eta Basajaunekin)?

Abentura, misterio eta euskal mitologiaz beteriko istorio zirraragarri honetan, ausardiak, adiskidetasunak eta sekretuek ate zaharrenak irekitzeko gai dira.

Gaur egungo gizarteak eraldaketa sozial sakon eta konplexu batean murgilduta daude. Alde batetik, krisi ekonomikoen eta sozialen kateamenduak, aldaketa demografikoek, migrazio-prozesuek, krisi klimatikoak nahiz eraldaketa teknologikoek eragin nabarmena dute gero eta desorekatuagoa den gizartearen behar sozialetan. Bestetik, eskubideen aitorpenean gizarteak egin duen aurrerabideak agerian jartzen ditu egungo behar eta errealitate sozialak, eta horiei modu eraginkorrean erantzuteko premia.

Testuinguru horrek agerian uzten du Gizarte Zerbitzuen Sistema sendoa eta integrala behar dela, gero eta konplexuagoak diren gizarte-behar eta -desberdintasunei erantzuteko gai izango dena.

Hartara, liburu hau Gizarte Zerbitzuen Euskal Sistemak ematen dituen erantzunen analisian zentratzen da; eta, horretarako, haren egitura, ezaugarriak, eskumenak eta eskaintzen dituen zerbitzuak aztertzen dira.

Bost atal nagusitan egituratuta dago liburua. Lehen atalean, Gizarte Zerbitzuen Euskal Sistemaren bilakaera, oinarri teorikoak eta ezaugarri nagusiak aztertzen dira. Bigarren atalean, sistemak kontingentzia desberdinen aurrean ematen dituen erantzunak jorratzen dira. Hirugarrenak, berriz, zerbitzuen horniduraren inguruko azterketa eskaintzen du. Laugarren atalean, sistema definitu eta baldintzatzen duten zeharkako gaiak lantzen dira. Azkenik, bosgarren atalean, Gizarte Zerbitzuen Euskal Sistemak aurre egin beharreko erronkei buruzko hausnarketa sakonak aurkezten dira.

Liburu hau kontabilitate-hizkuntzaren oinarriak ulertzeko gida praktikoa da. Aproposa da finantza-kontabilitatearekin lehenengoz kontaktua izango duten ikasle eta ekintzaileentzat eta kontabilitate-informazioa lehen aldiz interpretatuko dutenenentzat. Liburua finantza-kontabilitatearen oinarrizko kontzeptuetatik abiatzen da, eta enpresa baten finantza-eragiketak nola erregistratzen, antolatzen eta interpretatzen diren azaltzen du. Lehen gaietan irakurleak oinarrizko kontabilitate-ekuazioa, kontabilitate-zikloa eta urteko kontuak zer diren ikasiko du, bai eta kontabilitate-praktika arautzen duten printzipio eta arauak zein diren eta non topa daitezkeen ere. Ondoren, enpresa batek eguneroko jardueretan gehien egiten dituen kontabilitate-eragiketak urratsez urrats azalduko dira adibide aplikatuen bitartez; eta aurrera egin ahala, eragiketa kontable konplexuagoak landuko eta jarriko dira praktikan ariketen bitartez. Behin guztiak landuta, irakurlea gai izango da kontabilitate-hizkuntza ulertzeko eta ekitaldi ekonomiko bateko eragiketa kontableak erregistratzeko.

Kulturak bizitzaren alde egiten duen ekimen eta indar guztia kontuan harturik ere, Mendebaldeko ongizatea teknozientziaren garapenean, ekonomiaren hazkundean eta gozamen hutsaren bilaketan oinarritzen denez, zentzuaren mailako galdera-erantzunen eta pertsonagintzarako balio-sistema moral eta espiritualen lanketa erabateko deskuidoan dago. Are gehiago gurean, Euskal Herrian, zapalketaren eraginez, besteak beste, tradizio propioa ezagutu, zaindu eta lantzeko zailtasuna izanik. Liburu hau pentsabiderako helduleku gutxi batzuk ematera dator, XX. mendeko euskal gizabidearen emarian. Izan ere, zentzuaren bilaketa loturik egon daiteke fedearen inguruko gogoeta eta eztabaida abstraktuarekin, edo, Barandiaran, Arizmendiarrieta, Azurmendi eta gizabideaz arduratu diren gure tradizioko autoreen sokatik, bizitza praktikoarekin ere bai: sustraiak dituen gizagintzarekin eta herrigintzarekin. Horregatik, liburu honetan jasotako testuak euskal pertsonagintzan errotutako zentzuaren bilaketak emandako oinarriez ari dira. Iragan hurbilean gurean izan den tradizio humanista eta humanizatzailearen adar batzuei erreparatuz, egileok gogoeta antropologiko, filosofiko eta soziologikoak eskaini ditugu.