Bere ibilia eta bere troparena geldiarazi zuen Castillo kaboak. Ahozko agindurik gabe, eskua jasorik, western zaharretan zalduneriaren buru doan ofizialak nola. Mailoan gora ari zirenek, ordea, ez zuten jaka-urdinik soinean, atorra gorriak baizik. Kaboaren atzetik lagun bakarra zihoan, Ander. Eta ez batak ez besteak zaldirik ez zuten ipurdi azpian. Hogeita bost minutu joan berriak ziren, gehiagorik ez, autoa bide bazterrean utziz geroztik. Denbora aski, izerdika eta mekaguenka jartzeko Foruzaingoaren kidegoak une horretan eta toki horretan zuen ordezkari nagusia.
Mendiak baizik ez ditu bizi, asteburua noiz ailegatuko beti, betizuak larrera bezala ateratzeko: horra zer diren mendi-joak. Inguruko gailurrak etxeko gelak bezain ezagunak eta korritua dituzte; Pirinioetara joan ohi dira ia aste birik behin; eta oporrak iristen diren aldiro plan handiago eta urrunagokoak egiten dituzte: Kilimanjarora igotzea, trekkinga Saharan, zeharkaldia Kaukason… Mendi giroko ipuinak idatzi ditu oraingoan Aingeru Epaltzak, baina atrezzoa besterik ez dira makilak eta kranpoiak, pioletak eta polainak, motxilak eta botak. Dekoratu horren atzean, giza harreman ñabar eta askotarikoak ageri dira: bikote-bizitza higatuak, familia maiz ozpinduak, beldur gauzatuak, poz geroratuak, ilusio zapuztuak, baita asetasun labur eta zorion-une ustekabekoak ere, egileak ohi duen begirada zorrotz-maltzurraz eta esku trebe-jostalariaz.

Zergatik uste duzu –esan zion Jessicak azkenean– zuk ikus nazakezula eta besteek ez?

Jessicak ez zuen Francis bezalako inor ezagutu ordu arte. Eta ez bakarrik elkarrekin barrez lehertzen zirelako egunero… bera ikusteko gai zen pertsona bakarra zelako baizik!

Norrissen estiloa lagunartekoa da, hurbila, eta salto egiten du pertsonaia baten ikuspuntutik bestearenera, noizean behin bere aipu propioak tartekatuz. Pertsonaiak nerabe atseginak dira, argi eta garbi mintzo direnak, umoretsuak, azkarrak. Jessicaren itzala desberdin izatearen alaitasunaren aldeko himnoa da, bai eta zorionerako –edo zoritxarrerako– ezohikoak diren nerabeek jasaten dituzten trauma serioen azterketa zintzoa ere.

Ez du batere gogorik senar ohia zaintzera joateko, baina alabak hala eskatu dio eta gizonari bizialdi laburra geratzen zaionez, ahalegin txiki bat egin behar luke agian. Liburu honi izenburua ematen dion kontakizun luzeena eta lehendabizikoa da “Bihotz handiegia”, garai baten amaierari buruz diharduena, maitasunaren hondakinez.
Arroztasun sentipena dute Eider Rodriguezen sei ipuinetako pertsonaiek: nolakoa izaten ari da bikote bizitza hau, zein desio ote ditu auzokide perfektuak, nor bihurtu gara sute ikaragarriaren ondoren, ginekologoak erakutsiko al dit nolakoa naizen barrutik, zer espero zuten izango nintzela, norenak dira esku hauek.
Konplexuak eta arruntak dira aldi berean hemengo bizilagunak, jarrera ideologikoaren eta irrika eutsiezinaren arteko lehian dabiltzanak batzuetan, zalantzati edo kontraesanean, baina gorabeherei beti aurre egiten. 

Ez du batere gogorik senar ohia zaintzera joateko, baina alabak hala eskatu dio eta gizonari bizialdi laburra geratzen zaionez, ahalegin txiki bat egin behar luke agian. Liburu honi izenburua ematen dion kontakizun luzeena eta lehendabizikoa da “Bihotz handiegia”, garai baten amaierari buruz diharduena, maitasunaren hondakinez.
Arroztasun sentipena dute Eider Rodriguezen sei ipuinetako pertsonaiek: nolakoa izaten ari da bikote bizitza hau, zein desio ote ditu auzokide perfektuak, nor bihurtu gara sute ikaragarriaren ondoren, ginekologoak erakutsiko al dit nolakoa naizen barrutik, zer espero zuten izango nintzela, norenak dira esku hauek.
Konplexuak eta arruntak dira aldi berean hemengo bizilagunak, jarrera ideologikoaren eta irrika eutsiezinaren arteko lehian dabiltzanak batzuetan, zalantzati edo kontraesanean, baina gorabeherei beti aurre egiten. 

Nobela honetan Jon Arretxe idazle bidaiariak jaioterrian kokatu du trama: Basaurin. Hasiera-hasieran ageri zaigu konkistatu beharreko altxorra, lapurreta baten fruitu eta urmael batean gordeta omen dagoena. Altxor hori eskuratzeko ahaleginean lehiatuko dira nobela honetako pertsonaia nagusiak. Azpijokoz, intrigaz, gezurrez betetako trama honetan, ezer ez da ematen duena. Zinema giroko sekuentziazio batekin, erritmo lasterrean garatzen da haria eta jazarpen grotesko batekin bururatzen da.

Arretxek hain ondo deskribatzen duen submundu transgresore horretako jendea da Arrutiren banda osatzen dutenak: Urrutxurtu, Delgado eta Ereño, Arruti beraz gain. Laurak Basauriko institutuan elkarrekin ikasitakoak, Hego Uribeko droga trafikatzailerik handienetakoaren itzalean ibilitakoak aspalditik. Panorama osatzen dute neska mulata batek eta eskultore intrigazale batek, arrazoi ezberdinengatik bandakoen xede bihurtu direnak nahita edo nahi gabe.

 Hamasei urte ditu Marenek, eta bizitzan gauza asko deskubritzeko: maitasuna, zaletasunak, lagunak, ikasketak… Esperientziak biltzen eta abenturak bizitzen joango da, baina, bide horretan, konturatuko da bere burua dela, batez ere, deskubritu beharrekoa: deskubritu, ezagutu eta onartu.
Gazte nahiz helduek irakurtzeko moduko bilduma bat abiatzen du Alaine Agirrek liburu honekin, “Txandaka” izenekoa, eta bertako personaiak txandaka joango dira, ale batetik bestera, protagonismoa hartzen: orain Maren, gero Libe, hurrena Oier…

Liburu hau Ikerkuntza Operatiboa ikasi nahi duen edozein pertsonari zuzenduta dago, bereziki ikasketa teknikoetako ikasleei.

Ikerkuntza Operatiboa gai desberdinak elkartzen dituen nahasketa bat da, konplexuak diren eta sarritan konexio gutxi duten gaiak, alegia. Liburu honen helburu nagusia oinarrizko kontzeptuak argitzea eta alor honetako aplikazioak aztertzea da, horretarako kasu praktiko ugari erabiliz. Kapitulu bakoitzean ebazpen-metodo desberdinak azaldu eta metodo bakoitza garatzeko kasu praktikoak planteatzen dira. Ariketa praktiko horiek aztertu eta ebatzi egiten dira, eta ebazpena ahalbidetzeko, sarritan, EXCELek duen Solver tresna edota PHPSimplex programa erabiltzen dira. Bukatzeko, ebazpena lortu ondoren, lortutako emaitzak aztertu eta ondorioak ateratzen dira.

Ikerkuntza Operatiboari begirada praktikoa ematen izeneko liburu hau irakurlea Ikerkuntza Operatiboaren mundu zabalean sartzean hari gidaria izatea espero dugu.

Zubia errekaren inbidiatan bizi da. Astoa eta oilarra, beti sesioan. Otsoak zakurra izan nahi du eta zakurrak otso. Euria eta elurra, berriz, ez daude gustura daukatenarekin. Katua eta sagua ez dira elkarrekin batere ondo moldatzen…Askotan zenbat kostatzen zaigun gure alderdi on eta atsegina ikustea eta onartzea. Iruditzen zaigu besteak hobeak direla; besteek beti zorte ona dutela eta guk, berriz,txarra. Eskerrak gu bezalakoak ez direnak, aurrez aurre jartzen zaigun ispilu baten moduan, erakusten dizkiguten gure alderdi onak, eta laguntzen diguten gure gabeziak elkarren osagarri direla konturatzen.

Poesia eta pentsamendua, 10. urteurrena

Trajeria honek Arberoako Joan edo, goitizenez, “Joanikot” kapitainaren bizia kontatzen dizü. Nafarroako konkistan parte hartü zizün 1512an, Albako dükearekin esküz eskü, Kastilla et Aragoiko erresümen alde. Haatik, horiek egin basakeriak ikusirik, Joanikot kapitaina Albreteko Henriren alde jarri züzün Nafarroaren arra gibel hartzeko. 1521an, Donibane Garaziko gotorleküko soldadoen bürü züzün.

Kastillarrak indarrean jin zirelarik 1521eko üdan, Noaineko batailla famatüan gainea hartü zizüen eta Joanikot eta bere soldadüak 21 egünez setioan etxeki Donibane Garazin, Amaiurko setio famatüa beno aste zonbait lehen. Azkenean, Joanikot presoner hartü zizün etsaiak eta Iruñeara eraman. Han erho, korpitza puzkakatü eta herriko sargüneetan agertü zizüen. Ordüan Oztako Maia bere emazteak denak oro ützi behar üken zitizün Nafarroan, hantik ihes egiteko Baionarat.

Pastoralak Joanikoten eta Maiaren trajeria kontatzen dizü, zorte basaren legeari oldartü nahi izan zirenak herri batean, Nafarroan, zoinen izatea gerla gaitz horiek kanbiatuko beitzüen, bai eta bürüjabetza galaraziko.