Asko gustatzen zait publikoari pertsonaia nola eraikitzen dudan  erakustea. Gustukoa dut beraiek ekintza honekin identifikatuta sentitzea. Azken finean egunerokotasunean gure burua eraiki eta deseraikitzen dugu, tarteka, jolas baten moduan ezta? Gure gorputza den mihisearen gainean hainbat elementu kendu etajartzen ditugu, eta egunero jolasten dugu garen horrekin. Norberaren egunaren arabera aldatuz goaz. Dauzkagun hitzordu desberdinek, eskura dauzkagun
elementuek eta gure desio eta fantasiek, besteak beste, garen hori modu batera edo bestera birsortzera edo birdiseinatzera garamatzate. Nahiz eta batzuetan behartuta sentitzen garen eta hori ez den.batere atsegina izaten, transformazioak, nire ikuspegitik, plazerarekin ere dauka harreman handia. Azken finean, edonoren ispilu aurrean egunero gertatzen den errituala da, kasu batzuetan nabarmenagoa besteetan baino, baina, betiere logela eta komun guztietan gertatzen den alkimia.
Miren Gaztañaga

 Gida azkar honen helburua da erizaintzako ikasleei botikak behar bezala kudeatzen laguntzea praktika klinikoak egiten ari direnean. Orrialde bakoitza botika baten banakako deskribapenari dagokio, fitxa tekniko moduan, eta han jasotzen dira produktuaren deskribapen labur bat eta haren indikazio nagusiak, merkatuko aurkezpen-forma parenteralak, emateko bideak eta moduak, prestatzeko modua eta hura modu seguruan erabiltzeko erizaintzako zainketak. Fitxa batzuek gehien erabiltzen diren dosiak edo perfusio-abiadurak jasotzen dituzten taulak dituzte. Erosoagoa gerta dadin, botikak printzipio aktiboaren araberako ordena alfabetikoan daude. Farmakologia praktikoari buruzko beste gida batzuk ez bezala, gida hau erizainentzat da erabat; dosietan hainbeste sakondu ordez, arreta berezia eskaintzen zaio prestatzeko eta diluitzeko moduari, eta gomendio batzuk ematen dira denbora aurrezteko eta kalkuluak eta unitateen arteko bihurketak egin behar izatea saihesteko.

 Liburu honetako kontakizunetan hainbat istorio, ipuin, kondaira eta bitxikeria ageri dira, eta irakurleak horiek guztiak beregana ditzake liburuaren barneko mundu nahasi eta eroan murgildu eta bidaiatzea erabakitzen badu. Suerte apur batekin, zerbait ikasiko du, eta, agian, familia artean jaki gozoak prestatzeko gai bihurtuko da munduko sukaldaritza etxeetara hurbiltzeko bide izan nahi duen jolas-liburu-tresna honen bitartez.

Metodoari buruzko bi ñabardura egin behar dira. Lehenengoa da, ezin dela Gipuzkoaren gaia ikertu bere inguruan dituen euskal probintzietatik bereiziz eta, eremu zabalago batean, Europako Hego-mendebaldeko testuingurutik aparte. Euskal Herria, bere osotasunean, eremu zabalago batean kokatu behar da: Europan.

Euskal Herriari ezagutzen dizkiogun mugak Gaztelaren eta Frantziaren interesen araberakoak dira. Historian zehar liskarrak, gerrak eta inposaketak haiek eragindakoak izan baitira. Ezin da ulertu Euskal Herria Nafarroaren eta euskararen lurralde historiko zabalean kokatu gabe. Bi estatuen debekuen aurrean herri berberaren aitortza egin gabe. Hor kokatzen da geografikoki Gipuzkoa. Historiaren pasarte asko, herri honen kokapen geografikoak baldintzatuak izan dira. Espainiako eta Frantziako, bi erreinu erraldoiek Nafarroaren banaketa hitzartu zutenetik, Gipuzkoak mugako izaera izan du Europako komunikazio bideen testuinguruan. Euskaldunok 1659ko Pirinioetako banaketaren ondoren, herriz herri bereizi gintuzten frantses ala espainolen gudu-lerroetan, salbuespenik gabe. 

1966ko euskal pizkundearen barnean sortu zen Oskarbi taldea. Garai berean sortu ziren Ez Dok Amairu eta beste zenbait kultur mugimendu. Harrigarria da urte beretsuetan izandako loraldia, are harrigarriago Oskarbi taldeak 50 urte kantuan irautea.

Oskarbi taldeak jende aurrean emandako 580 kantaldi ageri dira liburuan, hauetatik 411 hasierako hamar urteetan (1966-1976).

Grabatutako diskoak: 11. Milaka entsegu eta ehundaka afari kantatuak osatzen dute Oskarbiren altxorra.

Liburu honetan kronologikoki kontatzen ditu Joxelu Trekuk Oskarbiren ibilbilde luzeko emaitzak: aurrekariak, taldearen sorrera, Eibarko txapelketa, lau urtetako Ez Dok  amairuti partaidetza, Baga biga higa Sentikaria, zentsurarekiko arazoak, Madrilgo Ateneoan emandako kantaldia, 24 Ordu Euskaraz, hamaika diskoren sinopsia, grabazioetako kontakizunak, kantaldiak, egitarauak, ehundaka kantutako errepertorioa, afari kantatuak, hogeinaka taldekideren gorabeherak, Quebec, Argentina eta Uruguaiko bidaiak, 2016ko 50. urteurrenaren ospakizunak ...

Hasierako urteetan Jorge Oteiza, Luis Romero eta Bitoriano Gandiagaren eragina azaltzen da kontakizunean.

Oskarbiren kantugintzak bi zutabe nagusi izan ditu musika arloan. Bata, herri kantak jaso, konposatu, egokitu eta zabaltzea eta bigarren zutabea, sorkuntza propioa. Bi arlo hauek askotan nahita nahastu dituzte entseguko laborategian. Hirugarren zutabe bat ere aitortu behar zaio Oskarbi taldeari: euskara. Hasieratik musika noten lagun bakarra euskara izan da.

Haría eten gabe izan da Oskarbi taldea mende erdian; eskuan haria hartu, hartu eskuan hari. Aurrera egin kantu berriak sortzen eta arbasoen abesti altxorraren hariari helduta.

Euskal artearen historia. Gerra Zibiletik, gaur egunera (1936-2016), kronologikoki, saileko azken atala da, eta euskal arte garaikidea du gai nagusi eta ardatz. Bi liburukitan banatuta dago, eta, horietan, Javier Viarrek ibilbide sakona egin du euskal artearen distira bizieneko eta nazioarteko proiekziorik handieneko aro batean zehar, gerrak eta haren segidako gerraosteak sortutako egoera dramatikotik Chillida agertu eta Oteiza Latinoamerikatik itzuli ondoren ia berehala nazioartean oihartzun handia izan zuen abangoardiako arte baten gorakada arte. Liburuak berresten ditu, halaber, Euskal Herriko gorabehera sozio-politikoetan izandako aldaketak eta mugimendu artistiko berriek, txandaka, batak bestearen atzetik, euskal artistengan izandako eragina, artista horien kopurua belaunaldiz belaunaldi hazi delarik, harik eta gaur egungo panoraman proposamen estetikoetan dagoen oparotasunera iritsi arte, arte plastikoek euskal kulturari eta euskal gizarteari eman dioten aberastasuna agerian uzten duen kontaketa batean.

 Ipuin liburua duzu hau, ipuin beltzak agertzen dituena. Gauaz ibiltzen dana liburuaren hiru kapitulu hasteko eta bortz ipuin segidan.
Lehenago idatzi bazuen ere, 1967an argitaratu zuen Txomin Peillenek Gauaz ibiltzen dana nobela beltza, bertze zenbaitzurekin batean aitzindaria izanik.
Nobelaren hiru kapitulu dituzu eskura liburu honetan, intrigako pasarte argigarriak.
Omenaldi gisakoa da 50 urte bete dituen nobelari. Horrekin batean bertze bortz ipuin, beltzenetan beltzenak eta ongi girotuak, horietako bakarra aitzinetik argitaratua.
Herentzia batekin desagerpen baten berri duen anaiaren bilaketa; mafiako buruaren hilketa eta ordezkoarengatik lehia; Milanon ondarearekin batean arrebaren joko zikina ezagutzen duenaren ibiltzeak; lan bila dabilen gazteak familietan gertatzen diren zikinkeriak deskubritzen; hildakoekin lanean eta bizidunekin jostetan aritzen den lege-medikua…
«Lurreango bizitza beti izan da zurian beltza, eta hori mundu globalizatu honetan agian argiago ikusten da. Txomin Peillenen idazlan guztiek argiztatzen dute iluntasun hori, mila kontatu eta aldiro beste kontu argigarri bat dakarrela. Ipuin beltz hauek ere argituko dute zerbait.»

 Biotopoko balio naturalen zein askotariko espezien nondik norakoak jasotzen du

 Liburu honetako 49 kontakizunek bizitza baten iturri eta sendipenetara eremaiten gaituzte. Belateko maldatik jeitsi urek mundu zabalera ereman dute autorea, Afrika eta Ameriketako eguzki beroak dakarzkigula. Testu minbera hauetan bihotz eta gogoak irekitzen ditu, gure lurretako egoera larriek moldatu kate luzean, bizia ororen gainditzeko eta sendatzeko beti hor dugula oroitaraziz.

Euskadiko Gazteriaren Kontseiluak (EGK) 2017an Sexualitatearen Koloreak gida argitaratu zuen Aniztasuna gazteekin eta gazteen ikuspegitik landu ahal izateko. Aniztasunaren kontzeptua LGTBI+ kolektibotik haratago doa. Alegia, Aniztasuna zeharkako balore gisa txertatzeak ezinbestean dakar dauden identitate, izaera eta orientazio eredu guztiak berdintasun egoera batean eta onarpenaren ikuspegitik mahai-gaineratzea. Hala ere, ezin daiteke alde batera utzi historikoki LGTBI+ kolektiboak bizi duen eta oraindik ere bizi duen bereizketa egoera eta honek LGTBI+ kolektiboko gazteen ongizatearengan duen efektua. Hezkuntzan Aniztasunaren balorea zeharka txertatzeko oinarri teoriko eta praktikoak eskaintzen ditu gida honek, oinarri izan dituelarik LGTBI+ hainbat gazte eta eragilerekin izandako harremana diskurtsoaren eraketarako.