Nouveaux livres - Liburutegia

15/02/2023 | 196

Gerra : 1521eko Nafarroako indarkeria eta gatazkak bizitzea : erakusketa, Nafarroako Errege Artxibo Nagusia, ekaina-abendua, 2021

1521eko ekainaren 30ean gertatutako Noaingo batailaren V. Mendeurrena ospatu genuen 2021ean. Gure historiaren funtsezko gertaera horren amaiera erabakigarria izan zen Nafarroako erresumarentzat. Noain eta Ezkirotz herrien arteko bataila-eremua, orduko bi armada boteretsuenek sortutako nazioarteko oihartzunen aurkako borroka izan zen. Bertako armadetan nafar borrokalariak sartu ziren, batzuk Asparrosko jauna buru zuten Frantzisko I.aren eta Henrike Albreten armada frantsesari laguntzen, eta beste batzuk Gaztelako armadari, Karlos V.aren gobernadoreek, kondestableak eta almiranteak gidatuta.

15/02/2023 | 323

Euskal Herriko horma biziak

Horma, mural bihurtuta, jada ez da objektu bizigabea, inboluntarioa, haren gerizpean gertatzen zenaren arrazoirik eta errurik gabea. Irudi eta koloreen bidez eraldatu eta gertakarien kronikalari edo aldarrikari bihurtu da, historian protagonismoa hartuz. Gure kasuan, Euskal Herriko historia garaikidearena. Eta zehazkiago, jasandako zapalkuntza eta errepresioaren aurrean herriak agertutako erresistentzia eta borrokatik eratorritako gertakariena. Muralaren filosofiak paretak anonimoak eta mutuak izateari utzi eta asalduraren eta askatasun oihuen subjektu bilakatzea lortu du. Zenbaitetan, abusuak eta bidegabekeriak salatzeko diana akusatzaileak dira. Beste batzuetan, erregimen menderatzaileek urratzen dituzten eskubideak aldarrikatzeko leiho irekiak. Esan liteke auzo, herri zein hiri-aldirietako erakusleihoak direla eta bertako beira-arasetan geure burua behatu eta gure nahi eta errealitateen zatiak islatuta ikus ditzakegula. Euskal Memoriak, euskal herriaren memoria historikoa berreskuratzeko helburuarekin bat, era anonimoan, bakarka zein taldean, muralaren adierazpen grafikoa borroka kultural, sozial eta politikoan “kausadun errebeldiarako” tresna gisa sustatu duten horiek omendu nahi izan ditu liburu honen bitartez. Irakurleak bere eskuetan duen lana horma-irudiari eskainitako lau hamarkada baino gehiagoren emaitza da. Euskal Herriko horma biziak lanaren egileak 4.000 horma-irudi baino gehiagoren argazkiak atera ditu garai horretan. Liburuki honetan adierazgarrienak jasotzen dira, guztiak ezin izango baitziren argitaratu. Beraz, ez da ikerketa akademiko bat, inurri lana baizik. Egilearentzat, une historiko bakoitzeko herri-sentimenduaren adierazpen zuzenak dira muralak. Aurrekaririk gabeko bilketa-lana egin du, eta, emaitza ikusita, ahaleginak merezi izan du.

15/02/2023 | 243

Euskal pedagogoa lokatzetan : Joxe Mari Auzmendi, Hik Hasiren arima, A-tik Z-ra

«Joxe Mari Auzmendiren hezkuntza balioak» jasotzen ditu liburuak: «Joxe Mari Auzmendi pedagogoa, herrigilea eta euskaltzalea A-tik Z-ra definitzeko ahalegina da liburu hau; haren lana eta bizitza, baina batik bat bere baloreak, jasotzen ditu».

15/02/2023 | 190

Morlans denboran zehar

Morlans denboran zehar / Morlans a través del tiempo liburuak Donostiaren historiari lotuta dagoen Morlans auzoaren historia hobeto ezagutzen lagundu nahi du. Gaskoien iritsiera, gerra gertakarien zenbait ezaugarri, baina, batez ere, auzoko bizimodua aldatu zuten hiru mugarri jasotzen ditu: lehen aldiz ura ekartzea Morlanseko iturburuetatik Donostiara, Donostiako Udalaren Gas Fabrika berria instalatzea, eta orduko Ferrocarriles Vascongados konpainiak (gaurko Eusko Trenbideak) Bilbo eta Donostia lotzea bide estuko trenbideaz. Liburua hainbat plano eta garaiko argazkiekin osatzen da, edukia ulergarriagoa eta erakargarriagoa eginez.

13/02/2023 | 299

Nazioarteko Zuzenbideari buruzko oinarrizko testuak (II) : nazioarteko erantzukizuna, nazioarteko arauen aplikazioa segurtatzeko prozedurak eta estatuen jurisdikzio-immunitateak

Legeak-Leyes bildumako 23. ale honek euskara juridikoaren funtsezko eremu bat -Nazioarteko Zuzenbide Publikoa- garatzeko eta finkatzeko ezinbestekoak diren testu batzuk jartzen ditu Zuzenbideko profesional, ikasle eta ikertzaileen eskura, baina baita Zientzia Politikoetan, Kazetaritzan, Nazioarteko Harremanetan eta beste zenbait jakintza-arlotan dihardutenen eskura ere.

13/02/2023 | 304

Euskal emakume zinemagileak

Liburu hau (azala Isabel Herguera zinemagileak ilustratu du) Euskadiko Filmategiaren bildumari eransten zaio, gure zinemagintzako izen handiak biltzen dituen bildumari, alegia: arestian aipatutako Ana Díez, Helena Taberna edo Yannick Bellon eta Álex de la Iglesia, Fernando Larruquert, Antxon Eceiza eta Enrique Urbizu bezalako zinemagileak, beste askoren artean, osatzen dutena.

13/02/2023 | 335

Ikusezinak : erbesteratuen haurrak

Gurasoen exilioan edo deportazioan jaio, hazi edo bizi izan ziren haur eta gazteen ikuspegitik idatzitako liburua. Kroniketan inoiz agertu ez diren "maletadun haurrak". Ikusezinak ziren

13/02/2023 | 365

Non eta Bilbon

"Bilbon hara-hona: leku-izenak eta euren arrastoak" liburuaren jarraipena da
Bilboko historiaren gaineko 40 artikulu biltzen dira, urian han eta hemen banatuta dauden beste horrenbeste toponimo baliatuz, denak ezagunak, eta batzuk oso ezagunak.

13/02/2023 | 445

3052

Murtzia eta Dakar artean dagoen distantzia 3052 kilometrokoa da

13/02/2023 | 299

Quaderni del carcereren antologia. I, Materialismo historikoa, zientzia modernoa eta Benedetto Croceren filosofia

Antonio Gramsci (Ales, Sardinia, 1891–Erroma, 1937), politikari sozialista, hizkuntzalari gisa trebatu zen Turingo Unibertsitatean. Ikasketak utzi, eta kazetari aritu zen 1914tik aurrera, eta protagonista gisa esku hartu zuen Italiako «biurteko gorri» iraultzailean, 1919-20 bitartean. 1921ean, Italiako Alderdi Komunista sortzen parte hartu zuen, zeinaren idazkari bihurtu baitzen ondoren. 1922-26 artean, Internazional Komunistako buruzagi gailenen artean jardun zuen. Erregimen faxistak 1926an kartzelaratu zuen, eta, hil zenean (1937), ohar sorta mardul bat utzi zuen, zeinak Quaderni del carcere (Kartzelako koadernoak) izenburuarekin argitaratu baitzituzten 1948-51 bitartean.

Quaderni del carcere Antonio Gramscik 1937an hil zenean utzitako testu-bilduma nabarmen bat da. Hainbat formatutako 33 koaderno eskolastiko dira, 1929 eta 1935 artean sortuak. Kartzelan idatzi zituen, baldintza kaskarretan; izan ere, liburu eta aldizkari gutxi zituen eskura, eta etengabeak ziren espetxe-agintarien konfiskatze-mehatxuak. Koadernootan, Italiaren historiari buruzko ikerketa zabal baten inguruabarrak eman zituen Gramscik, Europako eta munduko historiaren esparruan eta hainbatetan birformulatu eta egokitutako lan-planetatik abiaturik. Haren xedea ez zen iraultzak Mendebaldean izaniko porrota azaltzea bakarrik, baizik eta sakonagotik hausnartu nahi izan zuen Mendebaldeko zibilizazio osoaren krisi politiko, sozial eta kulturala. Ikerlan honen arkitekturan –zatika idatziriko lana da, baina ez barne-sistematikotasunik gabea–, askotariko gaiak jorratzen dira, hala nola antropologia, ekonomia, historia, literatura-kritika eta teoria politikoa. Alabaina, guztiak daude loturik marxismoa «praxiaren filosofia» gisa birformulatzeko proiektuarekin; hots, mundu garaikidea ulertzeko eta eraldatzeko gai den filosofia gisa. Nonahi aitortzen dira gaur egun ikuspegi horren zabaltasuna eta originaltasuna. Hori horrela, xx. mendeko pentsalari zorrotzenetakotzat jotzen da Gramsci, eta, horretaz gainera, gaur egun gehien irakurtzen diren italiar autoreetako bat da.

Nouveaux livres - Liburutegia

Novedades