Joxean Muñozen 24 irudi Ramon Saizarbitoriaren Ene Jesus nobelaren gainean

Hau ez da ilustrazio bilduma arrunta. Irudiek ez dute kontakizuna azaltzen, testua bera irudi bihurtzen du Muñozek, ikusizko baliabideetara ekarriz nobelan aurkitzen dituen ezaugarri nagusiak: kode desberdinen arteko tentsioa, ordena narratiboaren apurketa, diskurtsoaren zatikatzea, esandakoaren estaltzea eta berreraikitzea, nobela bat nobela baten hausturaz kontatzeko  ahalegina. Irudiok esan nahiaren eta esan ezinaren arteko tentsio emozionala transmititzen dute, Ene Jesus nobelari omenaldi eginaz.