Bortxaren kontakizunetik, kontakizunaren bortxara

ETAk jarduera armatua eten zuenetik, azken hamarkadetako historiaren kontakizunak egunerokotasunera jauzi egin du. Joxe Manuel Odriozolak kontakizun hori kartografiatu nahi izan du, jakinik historia-kontakizun eta interpretazio oro ikuspuntu subjektibo eta ideologiko baten emaitza dela. Alegia, liburu honetan dagoen kontalari bakoitzak bere balio-sistema, posizio eta ikuspegi ideologikotik mintzo dela, posiziorik gabeko irizpiderik ez dagoelako. Egileak berak aitortzen digun bezala: Nazio askatasuna eta borroka armatua edozein baldintzetan oximoron bat dela sinetsarazi digute. Gogo-giro horretan jokatzen du gure diskurtsoak, jokoaren arauak aurkariak ezarrita, eta hala eta guztiz ere partida jokatzea merezi duela iritzita sartu gara joko-zelai labainkor honetan.