Despentes puta, Despentes proletarioa, Despentes punka, heteroaraudiaren bazterbideetatik abiatu, eta haren muinera heltzen da. Patriarkatu kapitalistaren kanpoko zirkulu marjinaletan dabilelarik, zirimola estutuz-estutuz joan, eta hara non begi-begiraino iristen den: XIX. mendean politikoki inposatzen diren genero-ereduen kontrako piztia da King Kong, generoen aurreko kaosa. Ez alferrik, feminitatea hipokrisia hutsa da Despentesentzat, otzan zuria izateko artea, emakumeen neurrira eginiko presondegi bat, eta neurriz kanpoko emakume munstroak sortzen ditu, behar ez bezalakoak, beti zerbaitegi: santuegiak edo putegiak, lodiegiak edo argalegiak, ergelegiak edo argiegiak... horiexek feminitatearen -egiak.

Ekainaren 25eko 5/2015 Euskal Zuzenbide Zibilari buruzko legearen 1. artikuluaren arabera, legearekin batera, Euskal Zuzenbide Zibilaren iturri dira, ohiturak eta zuzenbide hori eratzen duten printzipio orokorrak.

Andres M. Urrutia Badiola, AVD-ZEAren burua eta notarioak eta Elixabete Piñol Olaeta, AVD-ZEAren buruordea, abokatua eta Deustuko Unibertsitatearen Zuzenbide Fakultatearen irakasleak, berrikitan argitaratu dute goian aipaturiko liburuaren laugarren argitaraldia. Argitalpen berri honen hartzaileak dira unibertsitateko gradu eta master ikasketen ikasleak eta, era berean, zuzenbidearen jardule teoriko zein praktikoak, zuzenbide zibilaren arlo horietara euskaraz hurreratu nahi direnak. Liburuaren edukia eguneraturik dago azken lege eraldaketen arabera, bereziki desgaitasunari buruzko legeria berriarekin; eta egileen aurretiazko eskarmentu akademiko zein lanbidekoa du oinarri. Orobat, Europa mailan unibertsitate irakaskuntzaren eskakizun berriei ere egokiturik dago, tresna eragingarria izan dadin. Zuzenbidearen Euskal Akademiaren Lanbideak sailean 6. zenbakia du liburu berriak eta Akademiaren babespean argitaratu da, Dykinson argitaletxearekin batera.

XXVII Poesia lehiaketa Ernestina de Champourcín 2016

Filosofiaren defentsarako liburu hau, testu laburrez osatua, pentsamenduaren aldeko testuinguru aldarrikatzaile baten baitan kokatzen da: ikasketa plan berrien murrizpenek Filosofiaren Historiari egindako murrizpenen erantzun bezala. Ez da gutxiagorako: LOMCE eta honen interpretazioa den HEZIBERRI 2020k hezurretan utzi dute ikasgai hau. Batxilergo guztientzat derrigorrezko izatetik, hautazko izatera pasatu da eta batxilergoko modalitate batzuentzat bakarrik. Liburu honetan ageri diren testuak jakintzaren hainbat arlotatik eta arlo horietako ordezkari kualifikatuek idatziak dira.

Bakarrik jaio eta bakarrik hiltzen gara. Bitartean, hari ikusezin baten gainean orekari eusten saiatzen gara eta argazkiak ateratzen dizkigute. Gu argazkitakoak izaten saiatzen gara, baina ez gara. Gu argazkiaren atzean dagoena gara, irudiaren ertzetatik kanpo dagoena, eta bizitza ez da lerro zuzen bat, ibili ahala etengabe josten eta askatzen ari garen armiarma-sarea baizik.

Ipuin-bilduma honetako pertsonaiak amaraun horretan bertan daude harrapatuta, beren beldur eta frustrazioekin, beren amets eta esperantzekin. Patua izan da aurreikusi ezin zuten egoera horretara eraman dituena, une ahulenean erabakitzera behartu dituena, kameraren objektiboaren aurrean irribarre egitera behartu dituena.

Baina ez lukete han egon behar.

Witold Gombrowicz-en kezka batetik abiatuta, Anjel Lertxundik sei lagun –idazle eta itzultzaile– bildu zituen Donostian, hizkuntza ez-hegemonietako literaturaren eta bere etorkizunaren inguruan gogoeta egitera, globalizazioaren eraginpean dagoen testuinguru kulturalean. Horixe izan zen idazle oriotarraren proposamena Donostia2016k karta zurietako bat eman zionean.

2016ko abenduaren 12an eta 13an elkartu ziren Lertxundiren erronkari baiezkoa emandako idazle eta itzultzaileak. Topaketa horien iritzi-trukearen ondoren, nork bere inpresio eta bizipenak jaso zituen liburu hau osatzen duten testu banatan. Idatzi guztiak euskaraz eta gaztelaniaz jaso dira, eta Darrieussecq-en eta Zelik-en jatorrizkoak ere erantsi zaizkio (frantsesez eta alemanez, hurrenez hurren).

Sei testu horiez gain, Anjel Lertxundiren eta Harkaitz Canoren saio bana biltzen ditu liburuak. Liburuari izena ematen dion Demagun ehun urte barru da Lertxundiren lana (berak ekarri du gaztelaniara Si dentro de cien años izenpean), eta Agente bikoitz baten aitorpenak, Canorena (Gerardo Markuletak gaztelaniaratua).

Amerikako Estatu Batuetan Donald Trump da presidente; EAJ nagusitu da eskuarki ezkerrekoak ziren Bizkaiko zenbait herritan; Ingalaterrako biztanleek erreferendum bidez Europar Batasunetik ateratzea erabaki dute; El Correok eta Diario Vascok kanpaina jasi dute RGIaren aurka... Egungo politikaren logika eta kondizio Nagusia bihurtu da populismoa.

Euskal Herritik abiatuta, EAJ, EH Bildu eta Elkarrekin Podemosen jarrerak bereziki aztertuz eta psikoanalisiaren eskutik, egoera globala aztertzeko eta proposamenak egiteko erronka bere gain hartu du Joseba Gabilondok: euskal independentziaren jomuga ez dago lehenaldian baizik eta geroan, globalizazioari eta neoliberalismoari aurre egiteko dugun aukera bakarra izanik.

Euskal saiakeragintza berriaren ahots original eta freskoenetakoa dugu Gabilondorena eta bere proposamenak dagoeneko euskal pentsamendua berritzeko ezinbesteko akuilu bihurtu dira. 

Bilduma honetan argitaratu diren lehen bi liburuen aldean, badu hirugarren honek beste zera bat agerikoa: ez zela jatorrian euskaraz sortu. Ingelesez kaleratu zuen Monique Wittigek estreina 1980an, eta lau itzultzailek ekarri dute gurera orain, harrezkero hogeita hamabost urtetik gora joan diren honetan.

Horrek guztiak zehazki zer esan nahi ote duen ez da zaila azaltzen. Lisipe bildumako aurreko bi liburuetan, gutxi-asko hemen eta orain gertatzen ari direnei begira jarri ziren autoreak: hemen eta orain dauzkagun borroka armatu eta kartzelei, hemen eta orain nahi genituzkeen feminismoei eta politikaren eraldaketei. Wittigek, berriz, zehatz-mehatz gure ez den baina gure ere baden beste nonbait bati eta beste noizbait bati esango lieke orain eta hemen. Eta hala ere, zelako indarrez astintzen dugun burua, baietz eta baietz, hari irakurtzen dizkiogunean, argi, zurian beltz, izan bagarenez geroztik gorputza ziztatu diguten izendapenei buruzkoak. Hemen eta orain baita pentsamendu heterozuzena; hemen eta orain, heteroaraua.

Batxilergoko eta unibertsitateko ikasleei Espainiako Historia Garaikidearen agiri garrantzitsuenak helaraztea da eskuliburu honen helburu nagusia. Testu hauek euskaraz eskaintzen dituen lehen liburua duzue honako hau. Modu honetan, kontuan izanda euskal hezkuntza sisteman, gaur egun hizkuntza nagusia euskara dela, euskaratutako testuak baliatzean, euskaraz ikasten duten ikasleek errazago ulertuko dituzte XIX. eta XX. mendeko historia prozesurik garrantzitsuenak orduko testuen bidez.
Bestetik, euskaldun irakasleei euskaraz ikasi duten ikasleentzako eskolak prestatzea eta ematea erraztuko die, baita unibertsitatean sartzeko probei begira ere lagungarria izan dakieke.