Eskuratu berriak - Liburutegia

Euskal biblioteka

2022/02/08 | 252

Erizaintza zainketa aringarrietan eta bizitzaren amaieran

Hirurogeita hamar autoreren baino gehiagoren trebetasunak eta ezagutza bildu ditu Erizaintza zainketa aringarrietan eta bizitzaren amaieran obrak. Autore horiek —batzuk atzerrikoak dira— erizaintzako profesionalak dira, eta eskarmentua dute zainketa aringarriak behar dituzten pazienteak eta bizitzaren amaieran daudenak urte luzetan artatu eta gero. 46 kapitulu dira guztira, hiru ataletan banatuak:

- «Alderdi orokorrak» atalak honako galdera hauei erantzuten die: zer diren zainketa aringarriak eta zer antolamendu-eredu dauden zainketa horiek emateko, zer ikuspegi duen gizarteak heriotzaz, eta zer eginkizun duen erizaintzako profesionalak premia aringarriak dituzten pazienteak eta bizitzaren amaieran daudenak artatzeko orduan.

- «Arazoak detektatzea eta haiei ekitea erizaintzaren ikuspegitik» atalak, Marjory Gordonen ereduen araberako erizaintza-balorazioaren bidez, horrelako pazienteen osasun-arazo guztiak jasotzen ditu, bai eta familiei eta zaintzaileei dagozkienak ere.

- «Laguntza-tresnak» atalak arreta hori euskarritzeko oinarrizko tresnak eskaintzen ditu: talde-lana, zainketaren bioetika, arazo fisiko eta emozionalak tratatzeko terapia osagarriak, eta abar.

Kapitulu bakoitzarekin batera, on-lineko baliabide hauek daude: autoebaluazioa, ikasitako ezagutzak sendotzeko, eta bibliografia elektronikoa eta esteka interesgarriak, edukietan sakontzeko. Halaber, baliabide elektronikoen artean, 30 kasu praktiko daude, teoria erizaintza-praktikara hurbiltzen dutenak eta bizitzaren amaieran dauden pazienteen arretan prebalentziarik handiena duten NANDA diagnostikoei, NIC esku-hartzeei eta NOC emaitzei buruzko informazioa ematen dutenak.

Euskal biblioteka

2022/02/08 | 248

Kimika: lehen hezkuntzako graduko ikasleentzat eta irakasleentzat

Gero eta gizarte konplexuago eta globalizatuagoan bizi gara, etengabeko eraldaketan, gero eta konpetenteagoak diren pertsonak eskatzen dituena, jakiteko ez ezik, egiten jakiteko eta bizitzen jakiteko ere gai izan behar dutenak. Kimikak funtsezko papera betetzen du bizi-kalitatean. Herritarren alfabetizazio zientifikoa beharrezkoa da, kaudimenez jokatu ahal izateko eta modu adimentsuan jarduteko adinako gaitasuna duten pertsona arduratsuak prestatzeko. Horretarako, pentsamendu kritiko eta arduratsua funtsezkoa da, mundu bidezkoagoa eta iraunkorragoa sortzeko kolektiboki. Zientziaren didaktikaren alorrean, besteak beste, metodo aktiboak, parte-hartzaileak eta indagatzaileak, eredu mentalen bilakaera sortzen duen ikaskuntza, jarduera teorikoak eta esperimentalak integratzea eta aurretiko ezagueren bilakaera aipatzen dira. Ideia horiek aplikatuz, kimikarekin emozionatzeko, materiaren ezaugarriak lantzeko, ezaugarri berezien esanahiak ulertzeko, sistema homogeneoen eta heterogeneoen ezberdintasunak lantzeko, disoluzioak kuantifikatzeko, aldaketa kimikoak eta fisikoak bereizteko eta materiaren egitura eta aldaketak modu sinplean ulertzeko proposatzen da argitalpen hau. Kimikari buruzko oinarrizko eredua eraikitzen laguntzeko ideiak proposatzea da helburua.

Euskal biblioteka

2022/02/08 | 372

Askatu edo moztu : euskal hezkuntzagintzaren erronka zahar eta berriak

Bidasoaren bi aldeetara ere, hezkuntza, gurea, egundaino ez zaigu emana etorri. Bi estaturen interesen zerbitzura eraikitako sistemen gainetik, herri honen behar eta nahiei erantzunez egin dugun eta egiten gabiltzan prozesua da euskal hezkuntza. Hori dela eta, euskal hezkuntzagintzaz hitz egiten da liburu honetan; bizirauteko behar gorrian sortu, bulkada komunitarioan hazi eta gaur egunean mehatxu eta erronka berriei aurrez aurre begiratu beharko diena. Euskal hezkuntza sistema publiko-komunitario euskaldun, feminista, demokratiko eta aske baten korapiloa dekolonitateetan askatzea dagokigu, kanpo, barne zein gure baitakoetan. Askatzea diogu... edo moztea!

Euskal biblioteka

2022/02/08 | 249

Langabezia eta herri-lanak : Araban, Bizkaian eta Gipuzkoan Bigarren Errepublikan (1931-1937)

Herri-lanak, administrazio-erakunde batek beharrizan publikoak asetzeko sustatutako obrak bezala defini daitezke. 1929ko krakari aurre egiteko neurrien artean obra publikoak eta hauek bultzatzeko diru laguntzak erabili ziren. Beste lurralde batzuetan bezala, lan-krisiari aurre egiteko erabili ziren Espainian, Araban, Bizkaian eta Gipuzkoan, eta hiru probintzia horien kasuan, batez ere aldundiek bultzatu zituzten. Langabeziaren aurka borrokatzeko mekanismoen artean herri-lanek izan zuten eginkizuna ezagutzea funtsezkoa da krisiaren aurrean hartutako erabakietan sakontzeko eta beste langabezia-prestazio batzuen eraginkortasuna neurtzeko.

Bigarren Errepublikaren garaiko herri-lanak eta enplegu-politikak ikertzeak aukera ematen du urte horietan bat egin zuten aldaketa-prozesuak, ideologia berriak, gainbehera ekonomikoa eta liskarrak erlazionatzeko. Errepublika aldarrikatu aurretik piztu zen krisi ekonomikoak nabarmen eragin zien aztertutako probintziei, eta garaiko agintarien politika baldintzatu zuen.

Liburuak, Bigarren Errepublikaren bilakaera politiko gorabeheratsuaren testuinguruan, hiru probintzietan herri-lan programek eta enplegu bulego publikoen garapenak izan zituzten zailtasunetan murgiltzeko gonbita egiten du. Azkenik, 1936ko gerraren testuinguruan lehen Eusko Jaurlaritzak garaturiko enplegu eta herri-lan politika aztertzen da. Ikerketa honek irakurleari aukera ematen dio 1930eko hamarkadako krisiaren testuinguruan abian jarritako enplegu-politikei buruz hausnartzeko eta horien mugak ezagutzeko.

Euskal biblioteka

2022/02/08 | 226

Jan eta jabe : elikaduraren bidez herria eraikitzen

Mendebaldean, jatea ekintza aski arrunta da, ohikoaren zentzuan, bai eta beharrezkoa ere; hain zuzen horregatik du dimentsio sozial eta politiko ikaragarria. Esperientziatik eta konbentzimendutik idatzitako saiakera didaktiko honetan, elikadura estrategikotzat aurkeztuko zaigu, nazio baten ekonomia, osasuna, kultura eta izaera uztartzen dituen esparrua delakoan. Egun nagusi diren nekazaritza intentsiboa eta agroindustria hizpide hartu eta, alternatiba gisara, zirkuitu laburraren, ekonomia zirkularraren eta saltoki kolaboratiboen alde egiten du. Egunez egun bestelako gizarte eredu bat eraikitzeko bidean lanabes izan nahian, liburuxka honek Euskal Herrian martxan diren proiektuak ezagutzera eman eta plangintza-manifestu adostu baten beharra agertzen du, bai eta botere eraldatzaileen arteko sinergiak proposatu ere. Elikadura baita, akaso, multinazionalen morrontzetatik askatzeko eta euskaldun jendea eta herria saretzeko alor oinarrizkoena.

Euskal biblioteka

2022/02/08 | 285

Aita Mari : bidaia musikala urrutiko uretara

Aita Mari erreskate-ontziari laguntzeko borondatezko lana. Korrontzi Aita Marin ontziratu da, Mediterraneorantz. Ontzi gainean, trikia doitzen dute urrutiko uretara egindako musika-bidaia honetan. Portu bakoitzean istorioak eta doinuak bilduko dituzte, tradizioak eta kulturak, bizitza berri baten bila ari direnei sokaren muturra hurreratzen dieten bitartean, esperantzari heltzeko aukera izan dezaten.

Euskal biblioteka

2022/02/07 | 261

Larruazalaren periferiaz haraindi

«Beharrezkoa ote da oraindik ‘emakume’ kategoria erabiltzea politika feministetan, kontuan hartuta etiketa horrek barne hartzen dituen askotariko historiak eta bizipenak, ala baztertu egin behar genuke, Butler-ek eta beste teorialari postestrukturalista batzuek proposatu bezala? Are gehiago, identitate politiko oro baztertu behar ote genuke, fikziozkoak direlako ezinbestean, eta soilik aurkakotasunean oinarrituta eraikitako unitateen alde egin? Nola ebaluatu behar ditugu ugaltze-teknologia berriak, zeinek promesten baitigute gure osaera fisikoa berrantolatu eta gure gorputzak berregingo dituztela, gure nahietara hobeto egokitzeko? Teknologia horiek gure gorputzen gainean dugun kontrola areagotzeko balio dute, ala esperimentatzeko eta irabaziak lortzeko objektu bihurtzen dituzte, merkatu kapitalistaren eta medikuntza-lanbidearen zerbitzurako?»

Euskal biblioteka

2022/02/07 | 161

Utilitarismoa

John Stuart Mill (1806-1873) filosofoa, politikaria eta ekonomialaria Utilitarismoa deitzen den korronte filosofikoaren pentsalari gorena izan zen. Gizartearen hobekuntzarako eta ahalik eta jende gehienaren zoriona bultzatzeko asmoari eutsiz, hainbat erreforma sustatu zituen Millek: ordezkapenezko demokrazia liberalaren alde, askatasun pertsonalaren defentsa sutsua, edo emakumeen sufragioaren eta berdintasunaren mesedetan. Korrontearen inguruan zeuden gaizki-ulertuak desegin eta teoriaren oinarriak modu argian azaltzeko idatzi zuen. Helburu horrekin utilitatearen printzipioa azpimarratzen du: ekintzak zuzenak izango dira ahalik eta jende gehienaren zoriona edo ongizatea sustatzera bultzatzen duten heinean, hau da, mina leundu eta plazera handitzen duten neurrian; okerrak, aitzitik, sufrimendua eta zoritxarra eragiten badute.

Euskal biblioteka

2022/02/07 | 268

Enborretik : antologia poetikoa

Joxan Artze gure poeta esanguratsuenetariko eta maitatuenetako bat da. Gai ugari jorratu izan ditu, hala nola, herria eta geure kulturaren aitorpenari dagozkionak, naturaren oihartzunari buruzkoak, gizakiaren ñabardura ezberdinak, joera mistikokoak… Betiere hizkuntza dotore eta landu baten bidez, lerro bakoitzean argitasuna eta distira lortuz. Xume baina sakon. Poeta izateaz gain, kantua ere menderatzen zuen, eta bien arteko talkan gure sustraien ttakun-ttakuna berreskuratu zuen. Nabaria da hori bere hitzetan eta bere hitz-jokoetan, non musikaltasuna eta erritmoa nagusi diren. Haren poesia keinuz, zehaztasunez eta apuntez josita dago. Aski ezagunak ditugu, halaber, Laboaren ahotsean ezagun egin ziren haren zenbait testu: Txoria txori, Maite ditut maite gure bazterrak… Zalantzarik gabe, gure kultur ondarean eta iruditerian luzerako geratuko da iltzatuta Artzeren langintza.

Euskal biblioteka

2022/02/07 | 179

Sua : Sutagar

Narrazioa SU TA GAR rock talde ospetsuaren kanten pasarteetan oinarrituta dago. SU TA GAR taldeak bere ibilbidean zehar transmititu dituen kanpo eta barne borrokak Sua izeneko protagonistak bere egingo ditu, fikzioa, fantasia eta errealitatea uztartzen dituen kontakizunean.

Sua gaztea bere bizimoduarekin atsekabetuta dago, baina, hondoa jo ostean, musikarako grinak hauspotuta ilusioa berreskuratuko du. Bere sentipenak askatuko ditu, testuinguru soziopolitiko nahasi batean.

Eskuratu berriak - Liburutegia

Novedades