Amerika, Clint Eastwooden arabera : westernaren heriotza eta berpizkundea

“Amerika, Clint Eastwooden arabera. Westernaren heriotza eta berpizkundea” zinemagile kaliforniarraren ikus-entzunezko testuetara hurbiltzen da bidezidor semiotiko-estrukturalista batetik. Liburu honek zinegilearen obran dauden gaiak, figurak, aurkezpen formalak eta egiturak erakutsiko dizkigu, Clint Eastwood (autore-eredu gisa) nor den ezagutzeko balio dizkigutenak; hauek ditugu ikertu beharreko aztergaiak: 1) landu dituen gaiak, 2) haren idazkera zinematografikoa zizelkatu duten indarrak eta 3) haren ahots zinematografikoaren behaketa. Horretarako, haren western kanonikoen (“Unforgiven”, “The Outlaw Josey Wales”, “Pale Rider” eta “Bronco Billy”) eta gaur egungo garai historikoan girotutako beste lan batzuen (“Mystic River”, “Gran Torino”, “American Sniper”, “The Mule“ eta “Space Cowboys”) arteko alderaketa egin da.

Mendebaldeko Basatiaren mundua mugatzen duen koordenatu kronologikoaz eta geografikoaz harago, genero amerikarrari datxezkion ezaugarriak, berezitasunak, egiturak, gaiak, formak eta arketipoak ere aurkitu daitezke Eastwooden beste lan batzuetan. Gauzak horrela, esan liteke westernak osatzen duela, hein handi  batean, kaliforniarraren filmografiaren bizkarrezurra.