OSAGAIAK:

- Atuna

- Patata

- Ogia

- Tipula

- Piper gorriak eta berdeak.

- Olioa

- Gatza

- Ura

NOLA PRESTATU:

Errezeta behar bezala prestatzeko eman beharreko pauso guztiak audioan entzun ditzakezu. 

Esataria. Eneko, ez dakit, Ondarroan, seguru gaude badagoela errezeta jakinen bat marmitako ona prestatzeko. 

Eneko sukaldaria. Bueno, badakizue hor kostaldean eta barrukaldean ba marmitakoa desberdina prestatzen dela. Itsasgizonek beste era batera prestatu izan dute tradizioz eta apurtxo bat kolorean ere somatzen da hori, apur bat ilunago ateratzen da kostaldeko marmitakoa barrukaldekoa baino. Eta zer nahi duzue, zuzenean errezeta hori ematea? 

Esataria. Ba bai, laburrean hola botako bazenigu. 

Eneko. Bueno, bai, pausuz pausu gutxi gorabehera.  

Esataria. Bai. Hori da. 

Eneko. Pausuz pausu. Bueno, hemen osagaiak ba izango dira patata, atuna bera, ogia, kipula eta piper gorria eta berdea. Eta gero, noski, gatza eta ura. Eta orduan, pixka bat hasteko ba patata zuritu eta apurtu egin behar dira patatak, txikitu. Txikitzean patata ez da moztu behar, baizik eta aiztoarekin moztea, zatitxoa moztu, eta gero, tira eginez, patata apurtu egin behar da. Horrek beste gozotasun bat ematen dio bere saltsari, eta hori kontuan hartu beharreko gauza bat da. Hori truku, hori truku bat da. Hori, topinean daukagunean edo marmitan daukagunean, zartagin batean, kipula, kilo bat, oliba olioa, oliba olioarekin, su txiki-txikian ba gorritzen utzi, apurka-apurka gozo-gozo. Denbora ematen du horrek, eta erre gabe tipula bera, erre gabe, apur bat gorritzen dagoenean, orduan pataten gainetik bota, eta patatak eragin olioan bertan. Hori ere su txiki-txikiarekin, azken batean ba bueno ba, gozatzen patata hori, eta noiz dagoen ondo gozatuta patata hori jakiteko patata hasi behar da topinean bertan apurtxo bat pegatzen, gainekaldean ongi egina daukanean. Hori eginda gero, ura bota. Ura botatzen dugu ba patata guztiak tapatu arte, eta orduan sua topera jartzen dugu. Sua topera jarri, eta irakitzen duenean urak sua jaitsi eta orduan piper gorria eta berdea txikituta bota, eta horren ostean gatza, e! Patatak egin baino, guztiz egosita egon baino minutu batzuk lehenago, hartzen dugu atuna, txikituta, eta topinera botatzen dugu. Eta horrekin batera ogia, ogia ere txikituta. Ogi lehorra, ogi sikua. Eta trukua, kostaldeko trukua  ez da bakarrik atuna txikituta botatzea, baizik eta atunaren hezurra ere oso-osorik topinean edo marmitan jartzea, eta horrekin, minutu batzuk egosten utzi eta orduan, egina dagoenean, atera hezurra. Kontuz eduki, hezurra apurtu gabe, eta gero apurtxo bat, ba atsedena hartzen edo deskantsatzen utzi behar da ba gustua ongi banatu arte marmita guztian zehar. Eta hori da azken batean kostaldeko, bueno, marmitakoa. Oinarrizko gauza bat da, baina oso gozo ateratzen da hor kontu eta ba bueno, taktu (tentu) handiz eginez gero.