Antonia Pozzi XX. mende hasierako italiar poeta izan zen, 1912an Milanen jaioa. Gailurrak eta magalak, basoa, likena, zeruak: Pozziren obran natura da jokaleku. Baina natura, norbere burua bezala, berdin suerta liteke hurbila eta lagunkoia zein urruna eta arrotza: isolamendu garratza darie bere poema batzuei; sarri, gainera, giro oniriko batean bilduta. Gazterik hil zen, 1938an, eta bizi zen artean ez zuen publikatu poema bakar bat ere. Haren heriotzaren ondoren, haren aitak bildu eta plazaratu zituen. Hasieran ez zuten ospe handirik izan, harik eta zenbait kritikari eta idazle Pozziren obra sustatzen hasi ziren arte. Joannes Jauregik arreta delikatuz ekarri ditu euskarara bere poemak.

Nazim Hikmet XX. mendeko turkiar poeta handienetakotzat jotzen da gaur egun. Goi-klaseko familia batean jaio zen Tesalonikan, 1901ean. Gaztaroan Anatolian eskola txiki batean irakasle egindako urteak, ordea, berea ez bezalako Turkia bat jarri zion begien aurrean eta betiko konprometituko zen komunismoarekin. Horren ondorioz, hamabi urtez egon zen kartzelan eta erbestean hil zen, Sobietar Batasunean, 1963an. Hikmetek ordura arteko poesia molde zaharkitu eta elitistekin hautsi, eta herriaz eta herriari zuzenean mintzo zitzaion idazkera bat proposatu zuen. Haren poemak gizakiaren duintasunaz mintzo dira, onkeriatik urrun eta zintzotasunez. Gotzon Barandiaranen ahots indartsuak ekarri digu antologia hau euskarara.

Erregea, gudaria, erraldoia... eta mitoa kateekin? Antso VII.a, Nafarroako errege ospetsua, kateak askatu eta berriro badoa... Navas de Tolosako bataila, kateen kondaira, Gipuzkoa, Araba eta Durangaldearen galera 1200an. Umorea, historia eta trazu zehatza nahasten ditu nafar monarka gogoratuaren erretratu desmitifikatzaile bezain erakargarria eskaintzeko.

Emakume baten mundualdi latzaren kontaketa lehen pertsonan; kastitate-gerrikoa senar jeloskorren emazteentzat; maitemindutako gazte batzuen amaiera tristea; ama baten istorioa, hazama ere badena, izurrite garaian; agintea eta ospea lortzeko liskarrak; ezinezko maitasuna; sorgin garaietako inkisiziozko paranoia; dirua eta igoera soziala eskuratzeko obsesioa; indiano baten abenturak etxetik urrun; hainbeste emakumeren eguneroko bizitza; emakume kirolari baten borroka bere helburua lortzeko; teknologia berrienganako itsukeria; arrakastagatik dena uzten duen pertsonaren bakardadea; kontatu ziguten gezur handi hura…

Denek espero zuten nobela mardularen ordez, Silueta lan esperimentalarekin itzuli da Ibarbia. Bahiketa baten istorioa kontatu digu bertan. Ez du inor epel utzi; alde edo kontra, sotil edo suhar, denek nahi izan dute zerbait esan —“bazen garaia”, “aukera galdua”, “antidotorik gabeko maisulan pozoitsua” —, eta, hain justu, nobelaz idatzi diren 31 iruzkinek osatzen dute liburu hau, Silueta-ren silueta.

Doktrina kristau guztiak biltzen ditu euskaraz, Trentoko Conciliotik Vatikanoko II. Conciliora bitartean argitaratuak (1545-1962).

Liburua argitaratzearen helburua da, garai honetako dotrinak aztertzea eta horrela, euskara eta erlijioa lotzen dituen historia ezagutzea.

Argitalpenak bi liburukitan argitaratu dira, bata Bizkaieraz eta bestea Gipuzkeraz.

Perdido, 1928. Caskey familia bananduta dago, Mary-Loveren eta Elinorren arteko tentsioen ondorioz. Hori aski ez dela, caskeytarrek bestelako krisi batzuei ere egin behar diete aurre: ekonomia amilduz eta harremanak mikaztuz doazen bitartean, zorigaiztoko zerbait dabil caskeytarren etxeko zokorik ilunenetan zelatan, eta zain dago, egonarriz eta gupidagabe, hurrengo biktima bere sare hilgarrian noiz eroriko…

Urdina ikusten da liburu honen leiho guztietatik. Itsasoarekin bat egiten duen zeruertza, udatiarrak, polizia argiak eta arrainontziak. Barruan, berriz, zabor-poltsak, iratzargailuak eta labean harrotzen pizzak. Geografia oso konkretu baten begiralekutik, kasik arrozteraino behatzen du eguneroko hurbilena poemotako ahotsak; albisterik gabeko egunak, lankideak eta grebalariak, euria zarra-zarra, maitasuna eta minbizia. Erbesteratu bat atzo arteko etorkizunari galdezka, bai eta zorionari ere. “Eta norabidea balitz eta ez leku bat?”

Euskal Herriaren independentziarako aldarria hamarkadaz hamarkada jaso dute belaunaldiek; nola gauzatu, ordea, gure herriaren askatasuna? Baina, are garrantzitsuago: zer forma hartuko luke Euskal Herri burujabe horrek?

Gabilondoren hamar ipuin bihurriotan, errealitate alternatibo «ez-utopiko» bana proposatu digu idazleak. Politikak eta literaturak, eskutik helduta, etorkizunaren aukeren artean barneratuko dituzte irakurleak. Turismoaren, gatazka armatuaren, zapalkuntza-ardatzen, adimen artifizialaren edota aurrekari historiko zalantzazkoen gainean gogoeta egiteko istorioak ondu ditu idazleak Independentziaren dekalogoa liburuan.

2022an ospatu zituen Euskal Herriko Trikitixa Elkarteak (EHTE) urrezko ezteiak. Data esanguratsu hori aitzakia bikaina izan zen orain arte egindako bidearen inguruan hausnartzeko. Dena dela, proiektu honen abiapuntua ez zen efemeride kontua izan. Aitzitik, lehenagotik sentitu genuen gisa honetako lan bat egiteko beharrizana.