Novedades - Liburutegia

21/05/2025 | 185

Liburu artean ibiltzea : irakurketa literarioa eskolan

Irakurketa-heziketan eta heziketa literarioan irakasleen lankiderik onenak liburuak direla sinetsita, “Liburu artean ibiltzea” lanean, aurrerapen teorikoetatik eta aplikazio praktikoetatik elikatzen den hezkuntza-jardunaren esparru bat eratzen saiatu da Teresa Colomer.

Liburuak bi atal dauzka. Lehenengoan, heziketa literarioaren prozesuan elkarreraginean dauden hiru alderdiak lantzen dira: eskola, irakurleak eta liburuak; bigarren atalean, elementu horiek lau irakurketa-aukerarekin nola erlazionatzen diren proposatzen da, irakurzaletasuna sustatzeko jarduerak programatzen laguntzeko irakasleei: bakarkako irakurketa eta irakurketa kolektiboa, horien hedapena jakintza-arlo guztietara eta eskola, testuen interpretaziorako gidari aditu den aldetik.

“Liburu artean ibiltzea” oinarrizko kontsulta-liburua da ikasgeletan ez ezik, ikasgeletatik kanpo ere irakurzaletasuna sustatzeko jarduerak berritzeko interesa duen ororentzat, deskribatzen baitu "liburuek eta irakasleek nola jarduten duten elkarlanean ikasleentzako irakurketa-ibilbide bat sortzeko, ibilbide horren bitartez belaunaldi berriek parada izan dezaten literaturak mundua ulertzeko eta bizitzaz gozatzeko eskaintzen dizkien aukerez baliatzeko.

21/05/2025 | 129

Erreskatatzaile Magikoak Magiolinpiar Jokoetan

Magiolinpiar Jokoak hastera doaz! Herensuge, iratxo eta gainerako izaki magikoak proba oso dibertigarrietan lehiatuko dira. Zoe, Lukas eta Marina, Erreskatatzaile Magikoak, ikusleen artean eserita egongo dira... Baina, misterio batek behartuta, pistara jaitsi eta kirolarien artean miaka hasi beharko dute. Garaiz aurkituko al dute Magiolinpiar Jokoak nork saboteatu nahi dituen?

21/05/2025 | 62

Erreskatatzaile magikoak mamarroen basoan

Asteburu lasaia izango zela uste zuten, ba... Lukas, Zoe eta Marina mamarroen basora iritsi dira. Toki arrunta dirudi, baina laster gauza arraroak hasiko dira gertatzen eta hirukoteak mamarroei botako die errua, oso bihurriak diren izaki batzuei. Erreskatatzaile Magikoak haiei segika sartuko dira baso barrura... eta misterio zoragarri bat deskubrituko dute.

21/05/2025 | 93

Apurkinak

Mundua aforismoz beteta dago. Liburu hau aforismoz beteta dago. Natura aforismoz beteta dago, eta etxeak, eskolak, egunkariak, lagunen hizketak, mingainak…

Eta aforismoa? Aforismoa munduz beteta dago. Eta liburuz, naturaz, etxez, eskolaz, egunkariz, lagunen hizketaz, mingainez…

21/05/2025 | 61

Otsorik gabeko basoa

Laida beti beldurtu izan dute otsoek. Gurasoek haiei buruzko beldurrezko istorioak kontatu izan dizkiote ttiki-ttikitatik: Pelloren ardi guztiak jan zituen otso zitalarena, txanogorritxuren amona askaritarako jan zuenarena... Gauza bakarrak lasaitzen du Laida: bere etxe inguruan ez dagoela basorik. Badago jolas-parke bat eta bidegorri bat erreka baten ondoan. Txirrindan eta patinetan ibiltzera joaten da hara. Eta, batzuetan, errekan bizi diren ahateei ogi puska batzuk ematera.

21/05/2025 | 84

Emakume zuzendarien euskarazko filmen bilakaera euskal zinematografian

Lan honek euskal emakume zinemagileek historian zehar egin dituzten aurrerapenak eta azken urteotan sortu diren filmen eklosioa erakusten dizkigu.

21/05/2025 | 110

XX. mendeko euskal pentsamendua Joxe Azurmendiren talaiatik

Joxe Azurmendiren obra unibertso literario zabal eta aberatsa da, euskalduna eta europarra, euskalduna izanik unibertsala, eta bertan hainbat arlo eta sail zedarri litezke. Hein batean aztertua dago; izan ere, pentsalariari eskainitako «Euskal pentsamenduaren ur-jauzia» kongresua egin zen Donostiako San Telmo Museoan 2019ko abenduan, eta, sei sailetan banaturik (Kultura, nazioa, estatua; Gizaberea; Gogoeta etikoak; Pentsamendu soziala; Kooperatibismoa; Hizkuntza eta pentsamendua), berrogeita hamabi aditu aritu ziren bertan euren ponentziak aurkeztenurik (Eizagirre & Zabaleta (argk.), 2021). Haritz Azurmendik doktoretza-tesia egina du Joxe Azurmendiren nazioaren kontzeptuaz, nazionalismoen gaineko ikerketen argitan (Azurmendi, 2019); alabaina, oraindik, Joxe Azurmendiren obrari dagokionez, azterkizun askoz ere gehiago dago, aztertua dagoena baino.

Lan honen izenburuarekin erara, irudika dezagun Azurmendi une batez, behinola marinelak talaietan baleen arrastoen peskizan nola, gain egoki batean hala, handik xx. mendeko euskal letrei, hots, euskal idazle handien eta ez handien idazkiei beha, eta haiek beste hainbat testurekin eta gizarte- zientzien arloko autorerekin harremanetan jartzen, eta bera ere beste hiru jakinkide nagusiekin (Intxausti, Torrealdai, Agirrebaltzategi) iritziak partekatzen, eta buru-lantegi hori guztia noiz bolalumaz idazten, noiz idazteko makinaz jotzen eta noiz ordenagailuan erregistratzen. Ildo bertsuari ekin zion Joxe Azurmendik baino lehen Salbatore Mitxelenak “Unamuno ta Abendats” (1958) saiakerarekin, baina Azurmendi askoz luzazkiago eta konplituago aritu izan da.

21/05/2025 | 73

Onin eta aintzirako munstroa

Gatzi, mendetan aintzira batean harrapatuta egon den itsas munstroa, gure beharrean dago. Gurupando da harekin komunikatzeko boterea duen bakarra, eta denboran bidaiatu beharko dugu munstroa salbatzeko. Baina ez da bidaia erraza izango: soldadu erromatarrak, gaita magiko bat, bele bihurri bat eta gatzez betetako mundu bat dauzkagu zain.

21/05/2025 | 98

Haizearen erpeak

Egileak bere ama hartu du idazgaitzat: XX. mendearen erdia pasatuxea zela jaiotako emakumea, baina bizimoduan askoz lehenagoko ezaugarriak dituena: etxean urik ez zeukan baserri batean jaioa, txikitatik lan eta lan jardundakoa, amets eta ilusioetarako tarterik gabe hazitakoa, era guztietako autoritateen aginte eta beldurraren pean bizi izandakoa: neskame lanetan orain, mojen mende gero, guardia zibilen astinduak noiznahi, ugazaben mespretxuak aldiro. Estilo berezi bezain pertsonala ageri du idazleak: kolorez bustia eta txinpartaz jantzia, inpresionismoaren pintzelkada arinak eta espresionismoaren argi-itzal bortitzak uztartzen dituena, erromantizismo ukitu batekin beti. Hala, historiak bazterturiko gizon-emakume xume guztiekiko enpatia sentiarazteaz gainera, geure ingurura begiratzen ere erakusten digu, lehen behakoan oharkabean pasatako min eta injustiziei erreparatzeko.

21/05/2025 | 93

Erruki onez

Boston, 1974. Mary Pat Fennessy ama langilea da, eta langile-klaseko auzo irlandar batean alaba aurrera ateratzeko borrokan bizi da. Jules, bere alaba nerabea, udako gau bero batean desagertu da, eta Mary Patek bilaketa gupidagabe bati ekin dio. Bilaketa horretan, delinkuentziaren, arrazakeriaren eta bere komunitateko boterearen arteko lotura ilunekin egiten du topo. Hiria irakiten ari da eskoletako arraza-integrazio gatazkatsu bategatik, eta, aldi berean, Mary Pat mundu arriskutsu batean ari da sartzen. Mundu horretan, leialtasuna odolez ordaintzen da eta egia hilgarria izan daiteke. Etsipenari eta erresistentziari buruzko istorio lazgarria da Erruki Onez. Thriller handien pultsu narratibo bizi-bizia du eta girotzeak 70eko hamarkada aztoratura garamatza. Dennis Lehanek —Mystic River eta Shutter Island eleberrien egileak— tentsio handiko nobela hunkigarria idatzi du. Orrialde bakoitzak eskuak erretzen dizkigu, infernuari ere aurre egiteko prest dagoen ama baten suarekin.