Sofiak lehenengoz igaro ditu udako oporrak kostaldeko herri batean; bertan, ume talde baten lagun egin da. Batez ere Migelekin moldatzen da ondo. Migelek 11 urte ditu eta arazo larria du: bere aitonak herentzia banatu du eta Gines osabak bere zatia higiezinen agentzia bati saldu nahi dio, musikaz bizitzen saiatzeko. Horrek esan nahi du hondartza eraikinen eta turistentzako hotelen urbanizazio bilakatuko dela. Saldu ez dezan konbentzitzeko, ikertzen hasi dira eta jakin dute bere amonak –hilda dago– izugarri maite zuela leku hura. Horren berri eman, eta lortu dute Ginesek azkenean bere lursail zatia kanpina eraikitzeko saltzea, eta ez urbanizazioa egiteko, umeak beldur ziren bezala.

Nerabe madrildar bat dugu Sebastian. Amarekin bizi da.
Bideo jokoekin duen zaletasunaren haritik, enpresa batek simulagailuak probatzeko egin dion eskaintza onartuko du. Itxuraz, baditu gaitasuna eta izen ona («Hiltzailea» esaten diote giro horretan). Hala, gero eta proposamen zailagoak iritsiko zaizkio eta dronen simulagailuak probatzen hasiko da; alegia, gerran dauden tokiak erasotzen dituzten piloturik gabeko hegazkinen simulagailuak. Berak batere jakin gabe, gatazkak dauden tokietako benetako pertsonei erasotzen dieten benetako hegazkinak pilotatzen ditu. Sebastianen bizitzaren kontakizuna beste zenbait istoriorekin gurutzatuko da eta beste istorio horiek pantailaz beste aldera zer gertatzen den kontatuko digute. Hala, protagonistak ez du inoiz jakingo zer gertatzen ari den, baina irakurleak jakingo du Sebastiani hain xaloak iruditzen zaizkion joko horiek zer ondorio suntsitzaileak dituzten.

Pederastia-kasu zenbait gertatu dira herrian, eta horrek ondorio nabarmenak izango ditu protagonista gaztearen familian. Susmagarri nagusiaren laguna da aita, eta jakinaren gainean ez ikusiarena egiteaz salatuko dute; errugabetzat jotzen duten arren, goitik behera aldatuko da etxekoen bizimodua: aitak atzerrian lan egiteko eskaintza bat onartu eta ospa egiten du; ama guztiz abailduta dabil, psikologo eta pilulen laguntza beharrean; gainera, biktima baten ingurukoek, mendekua hartzeko, anaia txikia harrapatuko dute kotxez, nahita. Beste bi neba-arreba geratzen dira, beren artean harreman esturik ez duten arren, nolabaiteko defentsa antolatu beharko dutenak. Edo erasora pasa…