Bidasoa ibaiak, bere mugako izaeragatik, gertaera historiko asko eta askotarikoak ikusi ditu, haren ibaiertzetan hizkuntza ezberdinak entzun ditu, ospakizun eta tragedia handiak jaso ditu, eta, ezinbestez, denboraren joanaren lekuko bihurtu da. Bidasoa ibaia da erakusketa honetako protagonista, eta bizia hartzen du, bertako biztanleen ahotsen bidez. 

Bitamine Faktoriak (Helga Massetani Piemonte) eta Los Viajes de Aspasiak (María José Noain Maura) egindako ikerketa batetik abiatzen da Atlas Emocional del Bidasoa proiektua. Bertan, talde-inkestak eta -elkarrizketak eginez, Txingudiko badiako eta bere inguruko biztanleek ibaiaz duten pertzepzioa jaso zen. Gai aipagarrienak aukeratu ziren artista-liburu bat argitaratzeko. Elena Odriozolak ilustratutako hamar koaderno literario eta historikok osatutarikoa. Orain, erakusketa hau osatzen duten hamar moduluak bihurtzen dira, instalazio artistiko gisa, oroitzapenak gogora ekarri, emozioak piztu eta nahastu, eta izan ginena, garena eta izango garena ahanzturatik berreskuratu nahi dituena. 

Atef Abu Saif Gazan jaio zen, baina 2019an, Palestinako Aginte Nazionalak Kultura ministro izendatu zuenean, Zisjordaniara aldatu zen. 2023ko urriaren 7an, baina, atzera berriz Gazan zegoen. Bere karguarekin lotutako hainbat konpromiso zituen, eta pentsatu zuen konpromiso haiek eta senideak bisitatzea uztargarriak izan zitezkeela. Horregatik berekin eraman zuen Yasser, hamabost urteko semea. Egun hartan, infernuko ateak parez pare ireki ziren Gazan. Israelgo armadaren inbasioaren lehenengo momentutik kale gorrian, aita-semeek hara eta hona ibili behar izan zuten iheska, gainerako gazatarrek bezala, aterpe bila baino gehiago –Gazan aterperik ez dago-eta– herioari izkin egiten. Horrela, 85 egun, harik eta handik nola edo hala atera ahal izan zuten arte. Egun haietan, ikusitakoari eta oroz gain bizitakoari buruzko kronikak idatzi eta Gazatik mundura bidali zituen Abu Saifek, ahal bezala, adibidez, sakelakoaren mezu laburren bitartez. Gertatuaren lekukotasun aparta ematen duten kronika horiek, biltuta, GAZAKO EGUNEROKOA osatzen dute. Gazakoa sarraski telebisatua da, bai, baina lan honek berriz ere agerian uzten du ez dela guztiz egia irudi batek hamaika hitzek baino gehiago balio duenik.