New books - Liburutegia

12/07/2023 | 187

Iurretako kofradiak : iraganari etorkizuna ematen

Argitalpenak kofradien ibilbide historikoa jaso du eta azken 50 urteetako lekukoen testigantzak ere bai. Dibulgazio-lana da argitaratutako liburuaren helburua, baina, batez ere, kofradiak jendarteratzea.

12/07/2023 | 185

Iruñeko Batasunaren Pribilegioak, 600 urte (1423-2023) = El Privilegio de la Unión de Pamplona, 600 años (1423-2023)

1423ko irailaren 8an, Karlos III.a Nafarroakoak Batasunaren Pribilegioa eman zion Iruñeari, XII. mendetik hiri hura osatzen zuten hiru biztanleguneen artean gertatzen ari ziren liskarrei amaiera eman zien dokumentu garrantzitsua. Akordio horren arabera, Nabarreria hiria, San Zernin burgua eta San Nikolas herria hiri bakar batean, udal bakar batean, udal-barruti bateratu batean eta jurisdikzio batean bateratu ziren. Iruñearen historiako gertaerarik garrantzitsu horrek 600 urte bete ditu. NUPek bat egin du efemeridearekin eta erakusketa bat antolatu du, eta, gainera, Asisko Urmeneta marrazkilari iruindarrak ilustratutako katalogoa argitaratu
du.

12/04/2023 | 396

Sahara, herri bat erresistentzian

Mendebaldeko Saharakoa gatazka ahaztua da, isilarazia. Hamasei urteko gerraren eta ia 30 urteko su etenaren ostean, sahararrek armak hartu dituzte berriz ere. Mendebaldeko Sahara Espainiako kolonia izan zen, 53. probintzia, baina frankismoak ez zuen behar bezala amaitu deskolonizazio prozesua. Traizioen kateaketa etengabea da orduz geroztik.
Marokoren okupazioak munduko harresirik luzeenaren bi aldeetan banatuta bizitzera behartu ditu sahararrak; batzuk errepresiopean bizi dira, eta beste batzuk, berriz, ihes eginda, basamortuen basamortuan. Fronte Polisarioak, klandestinitatean sorturiko askapen mugimendu nazionalak, estatu bat eratu du erbestean.

12/04/2023 | 245

Biziaroak : herri kultura

Xamarren liburuen ezaugarri nagusienetarikoa, gaiak interesgarri bezainbat jakingarri izateaz gain -hizkuntza, kultura eta ondareari buruzkoak, gehien bat-, ongi oinarrituriko ikerketa eta bibliografian maila ulerterraz bezain zehatzean garatuak izatea da; orobat edukiei dagozkien irudiekin eder eta propioki hornituak.
Oraingoan ere aurrekoen ildotik dakar bere Biziaroak liburu berria. Euskara Jendearen ez hain aspaldiko kultur sozialean indarrean egon diren biziaroetan barnako erritual, ohitura eta ospakizunetan pausatzen du begirada, batzuk ezagunak, beste anitz ez hainbeste, garaiko testuinguruan garatuak, erran nahi baita indarrean zeuden sineste, irizpide sozial, interes eta beharren baldintzetan. Egin ohi duen gisan, aldikal haiekiko loturan dauden hainbat xehetasun eta berri osagarri eransten ditu, euskaldungoaren izaerari eta egoteari dagozkienak, hots, bizitza ulertzeko eta munduan kokatzeko maneraren eta antolamendu sozialaren berri ematen dutenak. Halako maneran non herri-kultura hori, gure egunetara iritsiz, historiaren garabidean kokatzen den.
Ordezkapeneko egoeretan baitezpadakoa den oroimen-ariketa ere bai, beraz. Nondik gatozen jakiteaz gain ?memoriarik gabe ez dago bizitzarik, ez pertsonal mailan, ezta kolektiboan ere?, gaurko jendartearen nondik norakoa ezagutzeko eta ulertzeko ere, maiz, gako izan daitezkeelakoan. Izan ere, ohiturek eta errituek komunitatea trinkotzen eta bersortzen dute aldikal, eta alderantziz: komunitateak ohitura eta erritu berriak sortzen eta egokitzen ditu, etengabe. Gure garaiko gizarte teknologikoan ere bai.

12/04/2023 | 178

Geneak editatzen : ebaki, itsatsi eta koloreztatu : CRISPR tresna zoragarriak

Edizio genetikoa indarrez sartu da laborategietan zein gizartean, bereziki CRISPR tresnak agertu zirenetik. Hainbat aplikazio aurkitu zaizkie biologian, osasun-arloan eta bioteknologian. Liburu honek oinarrizko informazio eskurakoa eskaini nahi du edizio genetikoaz eta CRISPR teknologia berritzaileaz. Metodoaren abantailak nahiz mugak edo arazo ebatzi gabeak nabarmentzen ditu, teknologia-iraultza honetatik espero litekeenaz ikuspegi zintzo eta errealista bat eskaini nahian.

12/04/2023 | 279

Teknopedagogia praktikoa : teknologia digitalak hezkuntzan integratzeko ereduak eta diseinu didaktiko digitala

Urte asko dira teknologia digitalak hezkuntzan nola aplikatzen diren lantzen ari garela. Hurbilpenak askotarikoak dira, baina, gehienetan, ikuspuntu abstraktu eta teorikotik gertuago egoten diren ekarpenak izaten dira. Oso beharrezkoak dira horiek sentsibilizaziorako, baina pauso bat haratago emateko beharra dago: teknologia digitalak ikaskuntza- eta irakaskuntza-prozesuetan aplikatzeko gakoak eta estrategiak behar-beharrezkoak dira, bai irakasleen hasierako prestakuntzan (Graduan edo Masterrean) bai etengabeko prestakuntzan.
Liburuak ekarpena egin nahi dio digitalizazioak bultzatutako eraldaketa pedagogikoari. Alde batetik, teknologia digitala hezkuntzan nola integra daitekeen azaltzeko dauden hainbat ereduren deskribapena, azalpena eta adibideak eskaintzen ditu. Bestetik, diseinu didaktiko digitalaren gakoak lantzen ditu, konpetentzia digitalaren presentzia diseinu didaktikoetan nola berma daitekeen azaltzeko. Oro har, liburu honek ikuspegi eknopedagogikoan janzteko aukera eskaintzen du, digitalizazioa hezkuntzan ulertzeko dagoen ikuspegi instrumental eta teknozentrista alde batera uzteko arrazoiak eskainiz.

12/04/2023 | 163

Sentsorea zentzu bila : interakzio-poetikak = Sensor busca sentido : poéticas de interacción

Esperimentaltasun artistikoa zenbait prozesuk elikatzen dute. Prozesu horien bilakaerak aurreikusi ez diren konbinazioak sortzen ditu -ahalbidetu baino ez dira egin konbinazio horiek-, eta etengabeko entzutea eta feedbacka gertatzen da ustekabeko ahots horietara eta haietatik. Gorputzaren eta objektu artistikoaren materialtasunaren arteko harremana -objektua edozein motatakoa dela ere- modu gutxi-asko teknologikoan ezartzen da, baina beti modu gutxi-asko zuzenean. Hala ere, bitartekaritza teknologiko digitalean -programaziokoan, elektronikakoan eta hardwareetan-, gorputza eta materia horrekiko kontaktua desagertu egiten dira makinaren prozesuetan eta haren lengoaiaren abstrakzioan, eta agertoki desberdin bat aurkezten dute. Aipatu dugunaren kontrako muturrean, badirudi makina digitalak emaitzak lortzera eta ziurgabetasun oro ezabatzera bideratuta daudela. Algoritmoaren definizioak berak, problema bat ebazteko jarraibide ordenatu eta finituen multzo gisa, argi adierazten du hori: hasierako egoera eta sarrera bat emanik, hurrengo urratsei jarraitu eta ebazpen deritzon azken egoera batera iristea.

11/23/2023 | 203

Zirriborroak eta gero: Mundu posibleei buruzko istorioak eta fabulazioak

Etorkizunean pentsatzeak ziurgabetasuna kudeatzen erakusten digu, eta, ildo horretan, etorkizunaren dekalogo bat proposatzen digu liburu honek. Azala kreazio-espazioren gonbidapen batetik abiatuta eta irudimenaren bereziaren indarrez, hamar egile ospetsuk eraikitzen dituzte kontakizun horiek, gaur egun funtzionatzen duten eta beste egiteko modu bat bilatzen duten Euskal Herriko benetako alternatibetatik abiatuta. Etorkizunean proiektatzen diren fabulazioak, natur, giza eta teknologia baliabideekin dugun harremana kudeatzeko beste modu batzuk ikusteko asmoarekin. Fikzioa ez da gizartearen aurkako zerbait, baizik eta haren isla, eta, beraz, funtsezkoa da eskaintzen dizkigun narratiba motak aztertzea. Disidenteak eta kontrahegemonikoak izan nahi duten narrazioak, eraldaketaren narrazioak.

11/23/2023 | 240

Historia : XIX. mendea

XIX. mendeko historia dokumentuen bidez, Euskal Herritik mundura. Edukiak Euskal Herriko dokumentu mota anitzetan oinarritzen dira bereziki: argazkiak, gutunak, prentsa artikuluak, grafikoak, eta abar.

11/23/2023 | 260

Persepolis

Marjane Satrapi ilustratzaile irandarraren komiki-lan ospetsua, komikigintzaren historian klasiko bilakatu zen 2000 urtean argitaratzen hasi zenetik. Irango Iraultza islamikoa kontatzen du lehen pertsonan, garai hura bizi izan zuen haurraren begietatik, eta gero ere kontakizun autobiografikoarekin jarraitzen du, Europako ikasaldia, Iranera itzultzea eta abar kontatuz. Bertsio definitiboa kaleratu da orain mundu zabalean, eta aukera hau baliatu da Irene Arraratsek egindako itzulpen bikaina gozatzeko.

New books - Liburutegia

Novedades